¹ Dwadi ekyana ni te ekyanita daŋ huno laati iko anjelohyen ati kuyya labeŋ ni amuno aati ara ni ihwa eromi bilat kuyya nabaha himeri. ² Dwadi aremik ni ikiluna, bwo amijak erre daŋ hun idimani, bwo fe awon iko ofyoro daŋ; dwadi awon ni iko neruk on obolo on oremik’to ituhut adoŋyok, ati kuyya abeŋ ni amuno aati ara adi ni ariŋ asai. ³ Dwadi esyo ni aŋiyo hoŋ daŋ jyo alocaŋak iŋiyere, bwo fe esyo ahwan hoŋ iswahiniere ihima, ati kuyya abeŋ ni amuno aati arai adi hunia daŋ asai. ⁴ Lya ol omuno’to aati odik adi inyi fur bwo fe omehita. Obeŋ inyi owon iko ahaini, obeŋ inyi itabolo ahwan honyi bwo fe obeŋ itadara. ⁵ Obeŋ inyi iko elyerere, obeŋ ottifya itamunoyere ahwan honyi, obeŋ ijorya kwak, bwo fe obeŋ igigilo ta arrohojita. ⁶ Obeŋ lya ol omuno’to aati osuhotyo te eyyata wati ati omuno inyi nelahode. ⁷ Odihu inyi erre daŋ, iruk inyi erre daŋ, iyihi inyi te erre daŋ bwo odihita inyi te erre daŋ. ⁸ Obeŋ esidi jyo namuno. Ati opwahini adi ekilita ’tuŋ; otuhunie adi ekyanita hun olufaji’to; bwo fe opwahini adi ofyoro ’tuŋ. ⁹ Nyo emijak hohoi aŋati hirre ijai bwo fe ettiyenio aŋati hirre. ¹⁰ Ati al afwonni erre daŋ atuhuno adi aŋati hirre. ¹¹ Ninya hara ni ahito ekyana nya ni ihwa eito, amijak erre ihwa eito bwo egigilo ihwa eito; ati ihwania labolo ni atuhunie nerre iloduri. ¹² Ihwania eŋiŋyala hohoi ta amiraya an ittalara, ati egonyu adi hohoi erre ihwa egonyu hohoi omomite wati. Ihwania amijak ni anus hirre ati iholoŋ ania attu adi ni mijana daŋ ihwa omijak Hollum ani. ¹³ Tania odulori erre hunihoi; neruk, neyihina, iko namuno. Ati obolo amuno agalik isi daŋ.