¹ Ijifatyete namuno, bwo ottifyati esyorita huno Oloyiri ati an agalik daŋ ottifyati ittiyeniere laati. ² Nyo lya al ikyana’to nekyana on olufa obeŋ inyi ikyana jyo laati ati ikyana inyi jyo Hollum, nyo obeŋ tulo itaniŋu, ati to Oloyiri ikyana inyi erre hun idimani. ³ Bwo lya al ittiyenio’to, ikyana inyi jyo laati itagolyere isi bwo ittittoyere isi iko itilihyere isi. ⁴ Lya al ikyana te ekyana on olufa itagol inyi ahwan honyi hama, ati lya al ittiyenio’to itagol inyi eklesya. ⁵ Oyyu al ikyanati tai daŋ te ekyanita hun olufaji, ati oyyu agalik ittiyeniere. Bwo obolo lya al ittiyenio’to agalik lya al ikyana te ekyanita hun olufaji, arari al iloit inyi ekyanita itagolyere eklesya. ⁶ Ati ihwania illarak, kuyya attu ni jihatai ikyanari te ekyanita hun olufaji, alwak adi ni itai aŋai? Oŋida ani ettiyenio bwo fe ettittoyo jihatai erre hun italeyehi Hollum jihoŋ iko hun amijak ni. ⁷ Kuyya obeŋi laati ohuti acawali kuyya bu obeŋi irribye olokeme on oyyu, aŋai adi imijana tai edolo hosi? ⁸ Nyo kuyya obeŋ atulo otik edoŋ on oyyu, ŋai adi ihuhumak ahwan honyi ta arrem? ⁹ Ihwania jihatai bwo fe, ŋai omijak anyo an ikyanati tai kuyya ibyaŋata tai ikyanati te ekyana an itaniŋuni laati? Nyo ara ihwa ikyanati tai jyo oyyami asai. ¹⁰ Egigilo ni owoni ekyanita arryai ifau, bwo owoni isi daŋ iko awoi hiram hosi gele gele. ¹¹ Tania kuyya abeŋ ni etaniŋu nekyana ono lya, ara ni atamononi al alufa jihonyi bwo ara inyi atamononi jihoŋ. ¹² Tania al iwahata tai bebe esyorita huno Oloyiri, ottifyati isi hun itaboloruni adi eklesya. ¹³ Tania ijara lya al ikyana ekyana on olufa omojo to ofyoro iloicere nekyana. ¹⁴ Nyo kuyya amojo ni te ekyana on olufa, omojo oloyiri hoŋ ati obeŋ egigilo hoŋ omijak ekyanita. ¹⁵ Anyo attadi? Amojo adi ni to oloyiri hoŋ iko te egigilo hoŋ. Edolo adi ni to oloyiri hoŋ, iko te egigilo hoŋ. ¹⁶ Tania kuyya itahabuyo iye Hollum to oloyiri, aŋai adi omijak obo atulo itahabuyere ikoye? Nyo isyo iye ahumo to oloyiri, bwo otimo inyi ekyanita hoi. ¹⁷ Nyo ahode isyo iye ahumo on oyyu ati obeŋ olwak lya. ¹⁸ Ajo ni humo jyo Hollum nyo ekyana ni te ekyanita hun olufaji agalik itai daŋ. ¹⁹ Ati al awon ni iklesya awak ni ikyanari ekyanita kai hama hun itaniŋuni laati agalik ekyanita arryai te ekyana on olufa nyo obeŋi isi olwahi obo. ²⁰ Illarak, herata ihwa aduri te egigilita hatai ati oŋida irata tai ihwa odolyo jyo eyyata. Ati te egigilita oŋida irata tai ihwa alyawa hul ilofyoroji. ²¹ Igyoroni ifahita jo, “Ojo Hobu, Ekyana adi ni jyo laati hulo te ekyanita hun olufaji bwo te etuhe tamonok. Ati dwadi ara ihwania obeŋi hya itaniŋuni ekyanita hoŋ.” ²² Tania arai ekyanita hun olufaji etamijani jyo hul obeŋi’to iruhi, obyaŋara jyo eruhok. Ati ara ettiyenio te eruhok, obyaŋara to hul obeŋi’to iruhi. ²³ Ati kuyya ottubai eklesya daŋ bwo ikyanai isi daŋ te ekyanita hun olufaji bwo ofwonni omuk laati hul otimoi kuyya obeŋi iruhi, obeŋi adi isi ojori isitajata tai? ²⁴ Ati kuyya ittiyenie aati daŋ bwo ottu obo ol obeŋ’to iruk bwo otimo, itahutani isi inyi eyyata honyi, bwo ijiriŋa adi inyi tesi. ²⁵ Oleye bwo fe erre hunya idimak inyi itaji honyi. Tania origoŋ adi inyi ette itahabuyo Hollum bwo ojo, Owon Hollum ihiji hatai ahode. ²⁶ Illarak hoŋ anyo adi? Al ittubaniete tai arabotye ijara laati daŋ ababo ofwonni iko afureta, kuyya ettiyenita, kuyya etaleyehina, kuyya ekyanita hun olufaji, kuyya eloico ono ekyanita. Ihaniete erre daŋ itaboboloryere laati. ²⁷ Kuyya awak obo atulo ikyana te ekyana on olufa, ijara inyi ikyana, kuyya arai isi arrihai dwadi bu hunihoi, ati oŋida isi ikyanai ta amaji hosi ababo, bwo ijara obo iloit ekyanita hwa. ²⁸ Kuyya obeŋ obo teyya ol oremik iloit ekyanita, ijara isi odwai ’totwa klesya. Ijara isi ikyanai itajya hosi hama iko jyo Hollum. ²⁹ Ijara hul ittiyenie’to hetekyanahi ababo, kuyya arai isi arrihai kuyya hunihoi bwo hul omuk hetetaniŋyehe jihosi. ³⁰ Ati kuyya italeyo Hollum ekyanita jyo obo al itoŋo dia ijara etteri hotodwai. ³¹ Nyo iremehina tai daŋ ittiyenio ababo jo oŋida laati daŋ ittiyenuni, bwo itilihi ettiyenita atajya hosi. ³² Oniŋye oloyirihyen huno ettiyanak jyo ettiyanak jo oŋida isi ikyanai ababo. ³³ Nyo obeŋ Hollum ara a Hollum olo eharuto ikyana ati ara inyi olo nelik taji. Ihwa ihanie eklesyahyen daŋ, ³⁴ oŋida aŋorwo hotodwahi ’totwa klesya nyo obeŋi aŋatani jihosi ikikyanari, ati ihwa ikyana efahi ijara aŋorwo hotoniŋyehe. ³⁵ Kuyya awahi isi mijana omuk erre ijara isi ifiye habiak hosi ihaŋitek, nyo ara ariri jyo aŋorwo ikyanari iklesya. ³⁶ Anyo adi? Oleyo nekyana ono Hollum tetai hama? Kuyya ottu inyi jihatai hama? ³⁷ Al igigilo obo atulo jyo ara inyi aheyani sayyo kuyya bu ifut inyi iko Oloyiri, ijara inyi ihum igigilo te erre hun egyorok ni jihatai nyo arai isi efahita huno Hobu. ³⁸ Ati kuyya iha obo atulo efahita hunia iha adi bwo fe Hollum inyi. ³⁹ Tania illarak hoŋ ottifyati bebe ittiyeniere, ati hetihoto hul ikyanai te ekyanita hun olufaji. ⁴⁰ Ati ihaniete erre daŋ on obis, obyaŋara te eharuto.