¹ Ihwania illarak hoŋ, awak ni itagiluniere itai asayyo hun oyiji hunya ettiyenio ni bwo fe hunya ifwotuna tai ittata tai wotya tesi. ² Bwo fe italahuni adi itai kuyya igolihina tai ta asayyo huna hunya ettiyenio ni, arari al ara eruk hatai asai. ³ Nyo esyarak ni jihatai ahosyere eram inya efwotu ni ojo, Oye nya Kristo te eyyata hohoi itasiruniere egyerita. ⁴ Onuhani nya inyi bwo oloŋ itahunihi ibuhu inyi to ye itasiruniere egyerita. ⁵ Oleyo bwo fe inyi jyo Kefa iko jyo lefahat hulo ’tomon harrihai. ⁶ Ihalu inyyak inyi leyo to obo oloŋ jyo omuk laati hul olwaji agalihini esiha miet, bwo arasai omuk hul olwaji, ati ayei omuk. ⁷ Ihalu oleyo inyi jyo Yakobo iko jyo lefahat daŋ. ⁸ Bwo ihalu hosi daŋ, oleyo inyi jihoŋ ihwa leito alahalu. ⁹ Nyo ara ni alahalu jyo lefahat daŋ bwo obeŋ dwadi bu osiru ani iloŋori alefahata nyo ettigemyo nya ni eklesya ono Hollum. ¹⁰ Ati ara ta amehino ono Hollum an awanari ni ihwa awon ni ahana, bwo obeŋ amehino honyi ara jihoŋ asai. Nyo egyama ni bebe agalik isi daŋ, obyaŋara ani ati amehino ono Hollum on owon’to jihoŋ. ¹¹ Tania kuyya ara ani al ettiyenio’to kuyya bu isi, ettiyenio hohoi daŋ bwo itai iruhoto. ¹² Ihwania kuyya ettiyenio hohoi jo ibuhu Kristo to ye, aŋai ojori omuk hulatai jo obeŋ etubuhuna ono ayak? ¹³ Ati kuyya obeŋ ebuhuna ono ayak obeŋ nya bwo fe Kristo ibuhu. ¹⁴ Kuyya obeŋ nya Kristo ibuhu, ara ettiyenio hohoi asai, ara adi bwo fe neruk hatai asai. ¹⁵ Kuyya obeŋi adi ayak ibuhuni bwo obeŋ nya Kristo ibuhu, era hohoi ahetamijanak hul egesem te eram ono Hollum, nyo ettiyenio hohoi jo itubuhu nya Hollum Kristo. ¹⁶ Nyo kuyya dwo obeŋi ayak ibuhuni obeŋi dwo bwo fe itubuhuni Kristo. ¹⁷ Kuyya obeŋ nya Kristo ibuhu ara neruk hatai asai bwo irasati tai iyyata hatai. ¹⁸ Bwo fe hul oyei nya itwa Kristo, olitohini adi tulaŋ. ¹⁹ Kuyya ta nesu ana hama eyihi hohoi jyo Kristo, orroho jihohoi bebe agalik laati daŋ. ²⁰ Ati ihwania ahode, ibuhu nya Kristo to ye bwo ara inyi etteri wati hul ibuhuni adi to ye. ²¹ Nyo ihwa ottu nya naye ta atulo, ottu bwo fe ebuhuna to ye ta atulo. ²² Nyo ihwa oyei aati daŋ huttotwa Adam, bwo fe isui hulya daŋ hulo Kristo. ²³ Ibuhuni adi isi daŋ ihalu, nyo ibuhu nya Kristo ahosyere bwo ihalu ta attuna honyi ibuhuni hul arai’to ahulo Kristo. ²⁴ Ottu adi esidi hirre al isyo inyi olobye jyo Hollum Monye, ihalu honyi itatturyo eleittaha iko okumahyen bwo edwariti daŋ. ²⁵ Nyo oŋida Kristo ilettohori afau many ihananiere inyi amyorok honyi daŋ iwoyo hejek honyi. ²⁶ Ara naye amyotononi an itattur inyi te esidi. ²⁷ Nyo ihanak Hollum erre daŋ iwoyo hejek Yesu, ati al ojo inyi jo, Ihanani erre daŋ iwoyo hejek honyi, emijak hohoi jo obeŋ inyi ikyana to Hollum al ihanak’to erre iwoyo hejek honyi. ²⁸ Bwo al ihanani erre daŋ iwoyo hejek Yesu, ottu adi inyi bwo fe iruk jyo Hollum jo oŋida Hollum agalik erre daŋ. ²⁹ Kuyya obyaŋara ihwania, ihanie adi isi anyo hul ifwotuni’to batisimo ta ayak? Kuyya obeŋi ayak ibuhuni, nyo ifwotuni laati batisimo tesi? ³⁰ Nyo ilyaha naye jihohoi asahyen daŋ? ³¹ Illarak hoŋ, ettuŋo ni ta amuno hoŋ jihatai to Yesu Kristo Hobu hohoi jo ayetyo ni oŋitek daŋ. ³² Ekyana ni ihwa atulo, anyo adi ayiji jihoŋ kuyya errem ni iko acaŋi imiji Efisa? ''Kuyya obeŋi itubuhuni ayak, haŋiyete bwo fe hamatati nyo motye eye adi hohoi.'' ³³ Ara eram ana ahode jo, itarrohojye laati hul orrohoji’to ayijok. ³⁴ Imijyete te egigilita hun obisi’to bwo heyyauna, nyo owoni omuk hul otimoi Hollum. ³⁵ Ati ojo adi obo, Itubuhuni adi ayak aŋai? Ofwonni adi isi iko hunani hwattek? ³⁶ Isitaji efita hunia. Aŋer hun idulak iye, obeŋi adi isi isui kuyya obeŋi isi obuli ahosyere. ³⁷ Bwo ibeŋ iye idulak ahwan honyi ihwa an isuru adi, ati aŋer hama, kuyya ara inyi emai kuyya obo aŋeryo. ³⁸ Ati isyo Hollum jihonyi ahwan ihwa awak inyi, bwo jyo aŋer daŋ ababo owoni ahwattek hosi. ³⁹ Obeŋi ahiri hwattek daŋ orrijori, ati owon eriŋo hwan abotye ono atulo bwo eriŋo hwan obo ono acaŋ, bwo owon eriŋo hwan obo ono ahenyi bwo obo ono ahami. ⁴⁰ Owoni elelyefi iko ayafa bwo oloŋ ihide bwo laati ifau, ati ara elamani jyo huttohide abotye bwo fe jo hutta fau owon hama hama. ⁴¹ Owon afaŋan obo jyo oloŋ bwo afaŋan on olufa jyo ayafa bwo afaŋan obo jyo elelyefi. Olufa elamani ono elelyef abotye jyo hanie. ⁴² Ara ihwania te ebuhuna ono ayak. Onuhani ahwan on omuyak ati ibuhu on obeŋ oremik muyahi. ⁴³ Onuhani ahwan ono ariri ati ibuhu ahwan ono akwatan. Onuhani ahwan an ilik ati ibuhu adi on owon iko adwaran. ⁴⁴ Onuhani ahwan tulo ati ibuhu adi ahwan ono oloyiri. Kuyya owon ahwan an amanya’to ifau ana, owon bwo fe ahwan an ara’to oloyiri. ⁴⁵ Ihwa igyoroni jo, “Atulo etteri inyi Adam ol ottu nya rahan atulo al isu’to.” Ottu nya Adam esidiz rahan Oloyiri al isyo’to nesu. ⁴⁶ Ati obeŋ ahwan ono oloyiri ottu ahosyere ati ottu ono atulo ahosyere, bwo ihalu ono oloyiri. ⁴⁷ Oyyeuni atulo etteri ta aboro hutta fau ati ottu atulo etarrihia t’edou. ⁴⁸ Hul arai’to ahulo afau arai isi ihwa atulo alya olo afau. Bwo fe hul arai’to ahulo edou arai isi ihwa lya olo edou. ⁴⁹ Ihwa eyyalaro hohoi iko atulo otto fau, oŋida bwo fe hohoi eyyalaro iko atulo ette dou. ⁵⁰ Ihwania illarak hoŋ, eramak ni itai jo obeŋ neriŋo iko nooto orutani olobye ono Hollum, bwo fe ariŋ on omuyak’to obeŋ adi orutak ariŋ on obeŋ’to omuyak. ⁵¹ Imijyete, eramak ni itai eram ninya idimani. Ebeŋ adi hohoi daŋ eye ati iloiti adi ahwattek hohoi aŋejuho. ⁵² Kokwak kokwak ihwa arifok honyek, al okwat aforojo esidi itubuhuni adi ayak iko ahwattek hun obeŋi omuyahi bwo iloiti adi ahwattek hohoi. ⁵³ Nyo oŋida ahwan ana on omuyak’to iloiti ahwan on obeŋ omuyak. Bwo oŋida ahwan ana on oye iloiti ahwan on obeŋ oremik ye. ⁵⁴ Ati al iloiti ahwan on omuyak ahwan on obeŋ omuyak, bwo al iloiti ahwan ana on oye ahwan on obeŋ oremik ye, iholoŋ ania idwoŋ adi ekyana on ojo, “Iyyala Kristo naye.” ⁵⁵ “Jai naye, tani eyyala hoi? Jai naye, tani adyaha hoi?” ⁵⁶ Ara adyaha ono naye, neyyau; bwo ottu adwaran ono neyyau te efahita. ⁵⁷ Ati humo jyo Hollum al isyo jihohoi neyyalara to Hobu hohoi Yesu Kristo. ⁵⁸ Tania illarak hoŋ hul amuno ni, owotyati on ogol bwo hehutoto. Oŋitek daŋ ifutata te egyama ono Hobu bwo omijana jo, obeŋ egyama hatai ara asai jyo Hobu.