¹ Ihwania te eram ono eddudduha gurusi hatai ifahiniere jyo aati Hollum, ihaniete ihwa efak ni jyo eklesyahyen hutto Galatia. ² To oloŋ etteri ono esabit ijara laati daŋ ottunie aŋati gurusi ihwa opocouni isi te esabit ania. Tania al attu ni anyurak adi ni agurusi daŋ attubai. ³ Bwo al afany ni jihatai esyo adi ni awaraga jyo laati hul inyimuna tai iyari esyorita hatai Yerusalem. ⁴ Kuyya oyyu jihoŋ, alo adi bwo fe ni, bwo edaha adi isi ikoŋ. ⁵ Bwo attu adi ni jihatai al acohuno ni to Masedonia. Alo adi ni Masedonia ahode. ⁶ Kuyya etoŋo adi ni ikatai ta ayafajin huno acoro jo oŋida ilwahyete tai ani ta adaha hoŋ jyo amaji an alari ni. ⁷ Nyo abeŋ ni awak wotya ikatai ihwania nyo ecul ni. Ati kuyya aŋatak Hobu ani, etoŋo adi ni ikatai do. ⁸ Ati arasa adi ni Efisa many iholoŋ ono Pentikoste. ⁹ Nyo aŋa ekat an alat on osiru jihoŋ igyamari, bwo olwaji amyorok arryai. ¹⁰ Al ottu Timoteo ihumata ifwotuna inyi ŋadi inyi itoŋo jihatai ta abaŋi, nyo igyama inyi egyama ono Hobu ihwa an ehanio ni. ¹¹ Tania helaha obo omyana inyi. Ati olwahata inyi te ekoi jo oŋida inyi ocohuno jihoŋ ta nelik taji, nyo etila ni inyi iko mottyarak hoŋ hul ofwonni ikonyi. ¹² Te eram ono illa hohoi Apolo ekyana nya ni jihonyi bebe jo oŋida inyi olo jihatai Korinto iko illarak hohoi ati obeŋ inyi awak leten ihwania. Ottu adi inyi jihatai al owon asiruna ono amiji jihonyi. ¹³ Ihumata mi. Owotyati ta neruk hatai. Itagoloto atajya hatai ihwa alyawa, bwo owotyati ta agolon. ¹⁴ Ihaniete erre daŋ imunori laati. ¹⁵ Imijana itai bo Stifanas iko aati hutto haŋ honyi; isi nyia etterita waati ta Akaya hunyia oyitoi 'to a Kristiani. Atuhoni isi ahuattek hosi 'daŋ igiamari ta aati Hollum. Illarak iko haniyarak hoŋ, attana ni itai jio, ¹⁶ ijifatiete arihok ihuo hulia, iko aati 'daŋ hulle igiamai 'to ikosi. ¹⁷ Amuno ni ta afanyan ono Setefano iko Fortunato bwo Akaiko, nyo olwahye isi ani imaji hatai. ¹⁸ Bwo olwahye isi ataji hoŋ iko hunatai. Omijana jo oyiji laati ihwo hulo. ¹⁹ Itifonyai eklesyahyen hutta Asia itai. Bwo itifonyai Akwila iko Prisila itai ta afure Hollum arabotye iko eklesya on owon ihaji hosi. ²⁰ Itifonyai illarak daŋ itai. Ifonyana bwo fe illarak hatai ta ahas. ²¹ Ani Paulo, efonyo ni itai ta afure hoŋ en egyoro ni ana. ²² Kuyya owon obo ol obeŋ omuno Hobu ijara inyi hotoye. Ottu adi Hobu hohoi. ²³ Ijara amehino ono Hobu Yesu Kristo hatawana jihatai. ²⁴ Owon amuno hoŋ jihatai daŋ to Yesu Kristo. Isi hunia.