1
Tolobo sabit orumu Yesu olot ara katwa lo manatak, oto jayona kunenge ogesunitati ngamang onotati to kac kunecieng oningati.
2
Itifi kude Parisihin, “Nyio itiyo ite tohi na litidwara to sabit?
3
Inyahahi Yesu icieng ojo, “ida ite liken tohi lafa litii David afa kolonyia kinga inyi ko kalihitak kunenge?
4
Orute inyi kaji lo Lobanga ko dumuno mugati kulo ketemoni lo Lobanga onyia tohi na locam to kadwarani keken ico manyu kalihitak kunenge.
5
Yesu ko jimitan diho icieng, “kito lo tungani lara lahitok lo sabit.”
6
To sabit ari orute inyi lotubare orumu inyi itiyena, manyu ongon tungani ija na lowei kana iteten.
7
Parisihin ko katiyenak kulo cik orumu otahitati kikoi lo kidoro Yesu, tona iriria icieng inyi otoc lodeya kalitifurie inyi to sabit.
8
Ati orumu Yesu loyen tohi na libuha icieng ko rihohino na tungani iwei kana ojo, “towoju to woita ketemoni lo cio fad.” Inyi ko wojuno ko woita ija.
9
Yesu ko jimitan diho icieng, “ahitifi ite, ani locam to sabit; kitiyo jiran kode kitiyo rohojun , lwahuno warun kode kifadaru?
10
Ongolo inyi ode icieng fad, oto ko jimitan diho na tungani, “todong kana nino.” Itii inyi jii, kana nenge ko jiran.
11
Ati ilongo icieng noo icahi kigugumo tenya kiji necieng tohi na ngitii icieng ken lo Yesu.
12
Lobito far tokuna faritin, olo Yesu kai lo donge kilifa karwe mwaa diho Lobanga.
13
Kolowang kof ilolongu kalihitak kunenge diho inyi ko nyumuno tomon ko are kuna lofik inyi ara jayonaj kunenge.
14
Saimon (na litibarahini inyi ojo Petero), rece nenge Andru, Jems, Jon, Pilip, Batulmaio,
15
Matiu, Tomasj, Jems kito lo Alipeu, Saimon na orumu lilongoti ojo Zilot,
16
Judas kito lo Jems ko Judas Iskariot na ca mute lara katoboni nenge.
17
Iculoro inyi ko icieng ko woita faji na ifete. Ilulung nahitok lo kajifitak kunenge orumu ongoni ko cio becek kuna iborengi kuna lofwonu to kof lo Judea fad, to Jerusalem ko todeco kulo Taya ko Sidon.
18
Kuna lofwonu ningo inyi ko fwonuno kitifurioro mwai kuneiccieng. Kuna liticana okorifi kuna irohori itifuriori.
19
Manyu cio fad otemi tiro inyi tonyio olotuno orumu golun to ken nenge itifurio icieng fad.
20
Kolodeu kalihitak kunenge oto ojo, “Ingoni ko gum ite kuna likidahi tonyo ningi okabwe lo Lobanga.
21
Ingoni ko gum ite kuna likingaha jija tonyio kitimonei mute ite. Ingoni ko gum ite kuna licira jija, tonyio ikweni mute ite.
22
Ingoni ite ko gum kolohiberu cio ite, kolohigelati ite kimoroti, manyu oberuni karana nino ojo orohoi to kito lo tungani.
23
Itikwamati nafar manyu ifiritati to kwama tonyio obolo bahacic nino tokai, tonyio koditi lafa litii monyeri iyo kamocak inyi na.
24
Ati kidak diho ite kabarak tonyio likeru ite rumuno warun na ijir.
25
Kidak diho ite kuna limoneho jija, tonyio kinya mute kinga ite. Kidak diho ite kuna likwenita jija, tonyio itoyo mute ite ko kicira.
26
Kidak diho ite kolohimaja cio ite, tonyio koditi lafa litiyore monyeri kamocak kuna italeri inyi na”.
27
“Ati ahirihohi ite kuna lohiningo nan; imaru meroni nino manyu itiyo na ijir diho kuna lohiberu isi.
28
Igatahi kuna lohifico isi, ilifa to kuna lohitigema isi.
29
Kolohinang tungani isi makal ikajong , ibelohi manyu iteten. Koloruje tungani cati nino ketik inyi dumaru long.
30
Icwara cio fad kuna lilifa diho isi manyu kolodume tungani tohi nino kelo kinyahita diho inyi.
31
Itiyo diho cio, iya nadi ngiwahare isi icieng itii diho isi.
32
Kalimaru isi cio kuna lohimaru isi keken, kwama nyio ca ngirumu isi? Kileng kapalak imaruni kuna limaruni icieng.
33
Manyu kolitiyo isi jiran diho kuna lojiri diho isi, kwama nyio ca ngirumu isi? Kileng kapalak itiyoti jii.
34
Manyu kalitideno isi diho cio kuna liyen isi jimitan odum ca, kwama nyio ca ngirumu isi? Kileng kapalak itideno kapalak oyeniti jimita odumi ca fad.
35
Ati imaru merok kunino itiyo na ijir diho icieng manyu itideno icieng ida ikodomo kidumi. Oto mute bahacic nino obolo, manyu ito ca ite ira tee kulo lona longon kai noo. Tonyio ojir inyi diho kamenak ko karohojak.
36
Itingon ko kisa iya na longonore apa ningi ko kisa.
37
Kengot tenya diho kuna kude oto manyi ida kingotohini ite tenya, kengot tenya olanyu kuna kude oto manyu ida kingotohini ite tenya ki lanyu. Itolau kilauni manyu ca.
38
Icwarata kicori manyu ca ite. Kitemit na ijir, na loruji, icihi, many ijujuho ijuhohini ca bongi-bongi kuningi, tonyio to kitemit na litemare isi kitemihinorehin ca isi.
39
Oto manyu inyi orihohi icieng ene kitisirani ojo, itweru kangodoni riho kangodoni? Ida icieng fad ofwo owuroro tula?
40
Ida ka kenani ilany katiyenani. Ati na lokeru kikena nenge fad, olotu ori ko katiyenani nenge.
41
Tonyio ideya isi ingarumiti to konyek lo rece nino ingerihi tul konyek nino?
42
Aja ngijo isi diho rece nino, rece ingohi odume ingarumiti to konyek nino ati isi token ida ideu rabocoti tona longon konyek nino? Isi kataleroni itemo re todume rabocoti to konyek nino ideyare bo otoc idumarore ngarumiti to konyek lo rece nino.
43
Oru lobo ciani ijir longi ngak kuna irohori ida manyu ciani na irohoi ongi ngak kuna ijiri.
44
Oyeniti ciani lobito lobito to ngak kunenge. Ida cio odia bule to ciani lo ngairati kode ngak kulo vino iyo curati.
45
Tungani na ijir oduma sangite kuna ijiri kuna loricahi inyi tau nenge manyu tungani na irohoi oduma sangite kuna irohori kuna loricahi inyi tau nenge. Tonyio to kifut lo tau lo tungani otenya kutuk nenge.
46
Nyio ilolongo ite nan ijo Lahitok, Lahitok ati ida iwak kitiyo tohi na lajo nan.
47
Ahitotorohi ca koditi lo tungani na lolotu diho nan, oning tenyi tenyi kunei ofihahi tic.
48
Ori inyi iya tungani na loduho kaji, oto obok iluko lo fiha fotiri lo guri nenge iyo tabak. Kalitihu kare itang kifi na kaji ati ida itinienieng na kaji tonyio oduho otoc.
49
Ati na loning tenyi tenyi kulitole ida hati ofik iyo tic ori iya tungani na loduhohi kaji kof oru fotiri loguri. Kalitihu kare itang na kaji ouroro uroro na irohoi.