¹ Langun lokerihi Yesu tenya kuno tenyi tenyi fad oning cio, orute inyi kapernaum. ² Tija karwaani lo lobo lahitok lo asegere na limaru inyi bebe orumu omwai na lara kaweyani. ³ Oning ene asegere layomit lo Yesu ko cularu kude lohitwaha kulo Judaya diho inyi kilolonguno inyi ojir olotu itifurie karwaani nenge. ⁴ Kolofwonu iceng diho Yesu, ileliati bebe diho inyi, ojimi diho inyi, “ocam lerok rumuno lwaha nino, ⁵ tonyio imaru inyi kof niyang manyu kiduhohi ohoi lotubare”. ⁶ Tinya Yesu ko kiliharu ko icieng. Orumu inyi lonyiharu kaji, oculu na asegere morot kunenge kitirico inyi ojo diho inyi, “Lahitok ketigena ken, ida nan acam to isi rutuno kaji nei, ⁷ inyi lico nan manyu ake ake jimitan ida nan acam to lotuno diho isi. Ati torihu tenya oto ca karwaani nei ko jiran. ⁸ Tonyio nan token angon nan ko kuna lohilanyu nan, angon manyu ko asegeri kuna lalanyu nan. Arihohi nan ene ilo “olo orihohi nu ou” olotu. Ajo diho karwaani nei itiyo ene itii. ⁹ Koloning Yesu ene tenya, ipany bebe tona asegere. Gaolo diho ilulung kuna lijifita inyi, oto ojo, “ahirihohi ite ida nan larumu koditi lo kiruk na ibolo iya ene kileng to Isirael”. ¹⁰ kuna cio lo culuni ko itoro kaji orumahi nu karwaani lo na lahitok lofurie. ¹¹ Deu to kifwongi, olo Yesu lobo kang lobara Nain manyu jayona kunenge ko ilulung nahitok ilihe ko inyi. ¹² Kolonyiharu lokoli lo na kang, (lobo tungani kaweyani orumu lo tingoroti iya oleng) iric ko cio otingita lobo kaweyani iyaroti oleng. Ara kaweyani kito lobito hilong lo lobo lafuserito. Manyu ilulung lo cio tona kang orumu ilihitati ko inyi. ¹³ Kolodeu Yesu inyi, olo tau nenge giho inyi, oto ojo, “kecira”. ¹⁴ kololo otir kitingit ka tingitak ko woita. Oto ojo, “kito lokilahaji, ajo nan diho isi towoju!” ¹⁵ Kaweyani ko wojuno icak tenya. Manyu Yesu ko kinyiahahino inyi diho ngotenge. ¹⁶ Ifuti icieng fad ko kipany manyu omaji Lobanga ojo, “loboto kamocani lahitok kiji niyang, lolotu Lobanga lwaha cio kunenge”. ¹⁷ Ene layomit lo Yesu ko kisarahino Judaia ko kofikofi fad. ¹⁸ Orihohi kalihitak kulo inyi kuno tenyi tenyi fad. Ilolongu inyi icieng are, ¹⁹ ocule icieng diho Yesu kitifia ojo itifiata itijo, “isi re lafa lojimi olotuno kode ojir ohoi kidodomo lobo ake?” ²⁰ Kologoru kuna cio diho Yesu, oto ojimi diho inyi, “kiculu Jon kabatisani ohoi diho isi kitifia jimitan, Isi re lafa lojimi ilotuno kode ojir ohoi kikodomo lobo tungani ake?” ²¹ Tona tik token, itifurie Yesu cio becek kuna lomwaiha mwaita gele gele ko kuna longon ko okorifi kuna irohori ko ngaja konyeha kulo kangodok becek. ²² Inyahahi inyi kuna ifahi kulo Jon ojo, “Itoite ifwo itorihohi Jon tohi na lideu ite ining manyu, lokwenyi kangodok, lolot kangurak, lonyuji kulo talulu, loningo katuhok, litiwaruni kaweyak manyu layomit na ijir ititimati iyo kakidahak. ²³ Ongon ko gum tungani na lida ouroro to tenya lo ken nei”. ²⁴ langun lofwo ifahi kulo Jon, icak Yesu tenya diho ilulung tenya lo ken lo Jon. “Nyio afa ifwo ite deya to kuny? Gerecati na lokuta iyoma? ²⁵ Kalida ara ji ifwo afa ite deya nyio? Tungani na licefita kyelani kuna idwaruha? Oru cio kuna licefita kyelani kulo wel manyu ongoniti ara naijir itongoti Jerusalem. ²⁶ Ati nyio afa ifwo ite deya? Kamocani? Ibo ahirihohi ite, manyu na lilany kamocani. ²⁷ inyi ene lafa ligerohini ojo, Acule ca nan ifak nei ketemoni Nino, Na ca likukum kikoi nino Ketemoni nino, ²⁸ ahirihohi ite, tokiji lo kuna lotomonu ngorwo, oru lobo lobolo ilany Jon, oto hati, na lisidi to Okabue lo Lobanga obolo ilany inyi.'' ²⁹ (cio fad kileng katisofok kulo mucoro koloningi tenya lo Yesu iniangiti jimitan obehi kikoi lo Lobanga tonyio libatis Jon icieng. ³⁰ Ati Parisihin ko katiyenak kulo cik oberuni kikukuma lo Lobanga to icieng tonyio ida icieng iruk kibatisa lo Jon.) ³¹ Ngatiririhi ba nan cio kulo ene kofiangiti ko nyio? Ori icieng iya nyio? ³² oriti iya tee kuna litongo faji lo cuk ilolongo kunu kuno ojo, Kikut ohoi omilere diho ite, Ida ite ikya; Kiwol diho ite wole lo tai Ida ite icira.` ³³ Tonyio olotu Jon Kabatisani ida odaha mugati manyu ida omata vino, ijo ite ongon inyi ko lodonyok. ³⁴ Olotu kito lo tungani, odaha manyu omata, ito de ene kangatani ko karumani morte lo katisofok kulo mucoro ko kapalak. ³⁵ Ati itotoruno manyu oboto genyun ara na ibir iyo tee kunenge. ³⁶ Ilolonge lobo Parisini loro daha kalenge inyi ko loro kolo na Parisini itongohinoti daha. ³⁷ Koloning lobo ngorwani lorohoi warun nenge tona faji ojo ongon Yesu kolo na Parisini, iyauno inyi kutuba lo ngoroni na iur. ³⁸ Ojo inyi owoita to korwong nenge icira icak inyi kiticora kejuha kunenge to kifi kulo konyeha kunenge ofie to fofi kulo kue imaruk kejuha kunenge otwe to na ngoroni iur. ³⁹ Kolodeu na Parisini lilolongu inyi jio, oto ibak to tau nenge ojo, “ngara elerok kamocani ngoyen jimitan ngai lohitiro inyi ko ani koditi lo ngorwani ara inyi, jimitan ara inyi kapalani.” ⁴⁰ inyiahahi Yesu inyi ojo, “Saimon angon nan ko lobo tohi lawak nan rihohino isi.” Ojo inyi, “kirihohi nan katiyenan!” ⁴¹ Ojo Yesu, “ongon afa kude cio are ko den lo robia kulo lobo kabarani, iden lobito robia mia miet, lobito keek miet. ⁴² Olanyu duma lo mongiyo icieng fad. Lerok ko kibalihino mongiyohin kunecieng fad. Ani to kiji lo kuna cio ca limaru nu Lahitok ilany? ⁴³ inyahahi Saimon ojo, “Ojir ara na lobolo mongiyo nenge.” Ojo Yesu, “ingot isi obehi.” ⁴⁴ Oto ko kibelo diho na ngorwani ko jimitan diho Saimon, “ideu isi ene ngoruani? Alotu nan kalilo, ida isi kico nan kifi kulo kejuha ati iticor inyi kejuha kunei to kifi kulo konyeha kunenge manyu ofie to fofi kunenge. ⁴⁵ Ida isi kimaruk nan ati ene ngoruani many to lotuno ida liticung kimaruha kejuha kunei. ⁴⁶ ida isi itwe kue nei to ngoroni ati ene ngoruani ijuhohi ngoroni kejuha kunei. ⁴⁷ inyi na ahirihohi na isi kuna palipali kunenge iborengi lolauni imaru inyi noo ojo inyi na lolauni kude kuting isidi kimaruno nenge.'' ⁴⁸ Oto Yesu ojo diho na ngorwani , “Lolauni kipalipali kunino.” ⁴⁹ icak kulakude welo tenya kiji necieng akeake, “Ngai ene lola ko kipalipali?” ⁵⁰ Ojo Yesu diho na ngorwani, “Lohilwahu kiruk nino isi ilo to kisiliban.”