¹ Iobo far kolowoita Yesu kutuk lo nam lo Genezaret ko cio irit inyi oningoti tenya lo Lobanga, ² odeu tigoli are kalele lo nam kuna logerihi kaniefak kulo kayam kuna lorumu ilala bwaihin kunecieng. ³ Ko kirwoho lobito tigol na lara lo Saimon ko rihohino inyi ojo ojir iyaru tigol iya namhatwa lobo gaa, oto itongohino itiyena cio to katua lo tigol. ⁴ langun lokeru inyi tenya ko jimitan diho Saimon, “Yaru tigol faji na iluko ibirohi bwaihin kulo kayam.” ⁵ Inyiahahi Saimon inyi ojo, “Lahitok kitii ohoi karue mwaa oru ko lobo tohi lohiniefu, ati kalijo isi jii abirohi ca nan bwaihin.” ⁶ Langun litii icieng jii oto iniefuni kayam kuna iborengi many icak bwaihin cira. ⁷ Iwatu icieng kaletok kunecieng kulo nu tigol mito ojo ojir ofwonu olwak icieng ofwonuni itifuti tigoli are fad to kayam many omana tigoli loyoro katua lo nam. ⁸ Kolodeu Saimon Petero jii oto ko urohino to kunga ketemoni lo Yesu ko jimitan, “ilo ten diho nan Lahitok nan tungani kapalani!” ⁹ Tonyio inyi ko kaletok kunenge fad orumu ipanyiti borengojun lo kayam kuna liniefu icieng. ¹⁰ Jems ko Jon tee kulo Zebedi manyu kaletok kulo Saimon manyu orumu ipanyiti. Oto Yesu ko jimitan diho Saimon, “kebang kicaha tolefar iya ketemoni ira ca isi kaniefani lo cio.” ¹¹ Icieng ko kipihuno tigoli kunecieng tode kongerihinoti sangite fad ko kijijfita inyi. ¹² Kolongon Yesu lobo kang, olotu lobo tungani na lokeru talulu ken fad, ojo inyi odeu Yesu ko urohino ketemoni nenge ofik komom kov ko kilelia diho inyi ojo, “Lahitok, kaliwak isi itweru isi kitinyujo nan.” ¹³ Ocule Yesu kana nenge ko tiro inyi ojo, “ awak nan! Tonyu!” deudeu talulu ko rujon to ken lona tungani. ¹⁴ Oto Yesu ko ciha inyi ojo, “kerihohi lobo tungani ati ilo itotorohi ken nino diho kadwarani manyu icwara kikumi lafa locik Moses to kitinyujo nino ara saden diho icieng. ¹⁵ Ati layomit lo ken nenge isarihi kof, tona ilulung lo cio ko fuonuno ningo tenya nenge ko kiyauno mwaita kunecieng kitifurioro. ¹⁶ Ati tihitik ingadarita Yesu fajihit kuna ipoloho kilifa. ¹⁷ obo far kalitiyena inyi, ofwonu parisihin ko katiyenak kulo cik to kangite pili kulo Galilea ko Judea ko Jerusalem itongoti inya. Manyu golun lo Lobanga ongon diho inyi lo kitifurioro mwai. ¹⁸ Ofwonu kude cio otingunoti tungani kangwalani to biris otemi rutorore kaji diho Yesu. ¹⁹ Kolo lanyu kikoi lo rutoro kaji icieng to ilulung, irwok icieng onga kwe lo kaji ko kiticuloroti inyi ketemoni lo Yesu. ²⁰ Kolodeu Yesu kiruk neiceng, ko jimitan diho kangwalani, “mortele lolauni kipalipali kunino”. ²¹ Parisihin ko katiyenak kulo cik ko kicaha kiiyo to taulo kuneicieng ojo, ngai lerok lomoro Lobanga? Ngai lotum launo kipal kalida ara Lobanga ake? ²² Yesu ko yenun na kiiyo neicieng ko kitifia icieng ojo, “Nyio iiyo ite kuna to taulo kuningi? ²³ Ani lo tanga jimitan ; lolauni kipalipali kunino kode jimitan; towoju ilo? ²⁴ Ati ojir iyenare ite ijo ongon kito lo tungani ko golun lo laa kipal ten to kof… oto ojo iyo na kangwalani ahirihohi nan isi ajo towoju todumu biris nino ilo kang.” ²⁵ Deu deu to ketemoni neicieng, owoju inumu kigetit nenge ko loro kang omaja Lobanga. ²⁶ Ipany cio fad ko kicwarati maja diho Lobanga. Ifut icieng ko kwama many ojimi, “lohideu ohoi sangite kuna igoli ene far”. ²⁷ To kifwongi lo ne, olo Yesu odeu lobo tungani na lobara Levi katisofoni lo mocoro itongo iyo meja lo katisofok kulo mocoro. Ojo diho inyi, “kijif nan”. ²⁸ Levi ko wojuno ongerihi sangite fad ko ki jifita inyi. ²⁹ Levi ko loro fiha karama na hitok to Yesu oto ilulung nahitok lo katisofok kulo mucoro ko kuna kude cio ofwonu odahati ko icieng. ³⁰ Ati Farisihin kjo katiyenak kulo cik kuna longon ngati necieng ofwonu kimomodo diho jayona kunenge ojo, “nyio idaha ite manyu imata ko katisofok kulo mucoro ko kapalak? ³¹ Inyiahahi Yesu icieng ojo, “ida ara cio kuna ijiri lowak daktari ati kamwayak. ³² Ida nan alotu kilolongo kanyujok ati kapalak ojir irwoti. ³³ Ojimi iyo inyi, “kalihitak kulo Jon ko kulo Parisihin ofaraniti kinga ko kilifa ati kunino osodoro daha ko mata.” ³⁴ Inyiahahi Yesu ojo, “Itweru welo kulo lateran faranun kinga kolorihe ilihitati ko inyi? ³⁵ Ati olotu ca far na lodamarorihin lateran to kiji necieng; to kunu faritin ofaran mute icieng kinga.” ³⁶ Orihohi icieng ene kitisirani ojo, “Oru tungani lociru kyela ngejuk otadare ongore. Kalitii jii irumu inyi locir kyela ngejuk cie manyu nu kitadit ida ori ko na kyela ongore. ³⁷ Manyu oru lobo tungani liturahita vino ngejuk iyo okodo ongore. Kalitii jii, otwaje ca vino ngejuk na okodo ongore oto ca okodo ko vino fad ³⁸ ipalaru ida, vino ngejuk ocam ijuhohini iyo okodo ngejuk. ³⁹ Manyu oru tungani na kolomat vino ongore orihe manyu owak ngejuk tonyio ojo inyi ojir ongore ilany.''