¹ IbelunoYesu to Jordan ifut ko okorif na inyu, oto okorif orihe inyi iya kuny, ² faji na lotemare sitan inyi langun lokeru farihin keek ongon. Oru lobo tohi lonya inyi to kuna faritin fad, langun loru onyia kinga inyi. ³ Ojo sitan diho inyi, “kalira isi kito lo Lobanga torihohi kuno moruto ibelo ara tafa”. ⁴ Ifotu Yesu ojo, “Igero ojo ida tungani owar to tafa keken, oto to tenyi tenyi kulo Lobanga fad”. ⁵ Orihoro sitan inyi kai faji na itedo ko kitotorohino inyi to tik lobo sidi okabwehin kulo kof fad. ⁶ Ko jimitan diho inyi, “ahico ca nan isi obolore nenge ko dwarajun neiceng fad, tonyio lohicori afa nan, manyu atweru nan kicwara lobo tungani keken lawak nan. ⁷ Tona kalohiwor isi nan, oto ca ara kunino fad. ⁸ Ifotu Yesu ojo, “Igero ojo iwora Lahitok Lobanga nino manyu irwaa diho inyi ake”. ⁹ Iyaru sitan inyi Jerusalem otedohi inyi many olele lo kaji lo Lobanga, ko jimitan diho inyi, “kalira isi kito lo Lobanga, ibiroro kof ten. ¹⁰ Tonyio igero ojo, ocik ca inyi malaikahin to isi lo kiriria isi otoc, ¹¹ kiting ca iceng isi kai to kac kuneiceng.'' ¹² Ifotu Yesu ojo, “igero ojo, kotem Lahitok Lobanga nino”. ¹³ Kolokeru sitan kuno ilabati fad, ongerihi inyi many lobo tik ake.Oberuni Yesu to Nazaret. ¹⁴ Oitu Yesu Galilea to golun lo Okorif na Inyu, layomit nenge ko kisararu na kov fad. ¹⁵ Itiyen inyi to lotubarehin kunecieng oto cio fad omaja inyi. ¹⁶ Olo inyi Nazaret faji lo lomolojore inyi, kologoru far lo sabit olo lotubare necieng iya langun larahare koditi nenge. Manyu ko wojuno kikena. ¹⁷ Icori inyi buk lo kamoconi Isaia, kalonga inyi oto orumu faji na ligero ojo, ¹⁸ Ongon Okorif lo Lahitok kennei Tonyio lohitwe inyi nan Kititima layomit naijir iyo kakidahak Lohiculu inyi nan rihohino laharu Diho kuna lotora Ko kitikwenya diho kangodok Lolahahino cio kuna litigimati, ¹⁹ lo rihohino cio kari lo kisisio lo Lahitok.'' ²⁰ Oto ko bibira buk inyiahahi diho katiyoni ko kitongohino kof. Cio fad to lotubare ko fihahinoti konyeha ken nenge. ²¹ Oto icung to jimitan diho diho icieng; “Enefar litifuta ene kigero iya na lining ite” ²² Omaj cio fad inyi manyu ipanyiti tenyitenyi kuna ilemi lofwonu to kutuk nenge. Itifiati ojo, “Ida re kito lo Joseph ene?” ²³ Ojo Yesu diho icieng; “dede irihohi ca ite nan ene kitidafi, diho nan ijjo; Daktarini, itifurioro ake. Itiyo ene kileng sangite kuna lohining ohoi ojo itii isi to Kapernaum. ²⁴ Osodoro inyi ojo; Ahirihohi ite tenya lo dede, oru lobo kamoconi liruhuni to kalecieng. ²⁵ Ahirihohi ite ajo omorengi afa lafuseritohin ene Israel to karihin kulo Elia kula karihin ligonorore kai to karihin uni ko nusu manyu olotu kinga na hitok kofikofi fad. ²⁶ Oto ida afa oculari Elia iyo lobo to kiji necieng ati diho lafuserito lo Zerapas idi kov lo Sidon. ²⁷ Manyu oborengi afa cio Israel kuna lomwai talulu to faritin kulo Elisa ati ida afa itinyuji lobo to kiji necieng, ara Naman tungani lo Siria keken. ²⁸ Ilongo cio to lotubare fad koloningiti ene tenya. ²⁹ Ko wojunoti ifuhari inyi to kanghatua, ko ki yaroti kalele lo donge na loduho kang kai nenge ojo ojir kicule inyi to lofias. ³⁰ Inyi ko lotita to kiji lo ilulung ko loro kikoi nenge. ³¹ Olo Yesu iya kapernaum kang na longon Galilea manyu to Sabit icak kitiyena cio. ³² Ipany icieng kitiyena nenge tonyio ongon kitiyena nenge ko golun. ³³ Inyia lotubare orumu ongon lobo tungani longon ko okorif na irohoi. Igore inyi to ogoro na ikwat ojo, ³⁴ “Aa Nyio iwak isi diho ohoi Yesu lo Nazaret? Lilotu isi keruno ohoi? Ahiyen nan isi, isi na Inyu lo Lobanga. ³⁵ Iryeng Yesu inyi ojo, “Tobuho! Torutu to ken nenge!” Na okorif ko borahino latungani kof ketemoni necieng fad ko rutuno to ken nenge ida opot ko lobo faji. ³⁶ Cio pili ko kipany itifiati kenite kunecieng ake ake. Nyio ene kitiyena? To golun ko twero iryenga inyi okorifi kuna irohori orutu! ³⁷ layomit nenge ko kisararu iric na kof. ³⁸ Ongerihi Yesu lotubare ko loro kolo Saimon. Orumu komoni lo Saimon omwai onok ken noo. Oto icieng orihohi Yesu oijr olwak inyi. ³⁹ Olo Yesu ocumo diho inyi ko kiryenga nohun oto ko ngerihino noho inyi. Inyi ko wojuno deudeu icak kirwaa icieng. ⁴⁰ kolodoyoro kolong, iyauno cio diho Yesu kamwayak kuna lomwaiha mwaita gelegele. ofik inyi kana kenite kunecieng ko kitifurioro icieng. ⁴¹ Oto manyu, imura lodonyok to kenite kulo cio kuna iborengi igoritati ojo, “isi kito lo Lobanga.” Ati irieng inyi icieng ida iruk icineng otenya tonyio oyeniti jimitan ara inyi kristo. Kiwanyi berien olo Yesu faji na ipolo. ⁴² Orumu cio otahita inyi, ojo ofwonuni orumuni, otemi kitiho inyi loro ngerihino icieng. ⁴³ Ati ojo inyi, “owak nan atitim layomit na ijir lo Okabue lo Lobanga many kangite kunakude tonyio tenya na lohiculunorihin nan inyi na. ⁴⁴ Ati osodoro inyi kititima tenya lotubarihin kulo Judea.