¹ Lobo sabit bito kololo Yesu daha kaji lo lobo Parisini hitok, orumu iririati inyi bebe. ² Ija ketemoni nenge orumu ongon tungani na lomwai mwai lo ulan. ³ Itifi Yesu Parisihin ko ka genyak iyo cik ojo, “Iruk cik kitifurio to sabit kode ida?'' ⁴ Ati obuho icieng, Yesu ko dumuno na tungani, itifurie ko lahahino olo. ⁵ Oto hati ko kitifia icieng ojo, “Kolongon lobo tokiji ningi ko kito kode mongo na louroro katwa lo tula to sabit, ngida isi ipihu oleng deu deu to sabit?” ⁶ Ati oru icieng ko lobo tenya ngotenyi. ⁷ Kolodeu koditi na loterore cio segeri kuna hitoha to karama, orihohi icieng ene kitisirani, ⁸ “kolohilolong tungani isi karama lo kiyemi, keter faji na hitok, ngilolongi ha ba lobo tungani lo hilany isi to obolore. ⁹ Kalara ji olotu ca kalolongoni ningi ojo diho isi. Icorihi ene tungani na faji nino, dong to riri na hitok ilo ca isi itongo faji na longon kifwongi noo. ¹⁰ Ati kolohilolongi isi ilo itongohino seger na sidi noo, ojir kololotu kalolongoni nino ojo diho isi. Mortele ou ene faji lonyau to isi, oto ca na kico isi obolore to ketemoni lo welo kuna kude. ¹¹ Tonyio tungani na loting ken, itisidi, ati tungani na litisidi ken nenge ake otingi”. ¹² Tinya ojo Yesu diho kalolongoni nenge, “Kali lolongohi isi cio daha lo far kode lo kurou, kelolong morot, recera kode kajeba kunino kode loriehati kunino kuna ibaraha, tinyio kali tii isi jii, kilolong manyu mute icieng isi tona oto kidumahini isi. ¹³ Ati kalikukum isi karama ilolongu kakidahak, kangwalak, kangurak ko kangodok, ¹⁴ ito ca isi irumu gum. Kileng ngida icieng kidumahi isi, kidumi mute isi far na lowarunore kajirak. ¹⁵ Koloning lobo na longon ko icieng iyo meja jii oto ojo diho Yesu, “ongon ko gum tungani na mute lolo daha karama iyo okabwe lo Lobanga”. ¹⁶ Inyiahahi Yesu ojo, “Ikukuma afa lobo tungani karama na hitok ilolong cio becek. ¹⁷ Kologoru far lo karama, ocule karwaak ojo ojir ofwo ilolongu kulangole cio lilolongi jimitan, ifwonu tonyio likukumahino sangite fad. ¹⁸ Ati icak icieng kigera tolobito. Ojo lo ketemoni orihe ngole nan anyangu mana aloro nan deya, kingohi ja nan. ¹⁹ Ojo lobo anyangu ngole nan mongi karemok kebuna miet aloro nan tema icieng, kingohi ja nan. ²⁰ Orihe many ce lobo ojo, arihe ngole nan ayema tona, ida nan alotuno. ²¹ Oitu karwaani ko rihohino lahitok nenge kuno tenyi tenyi fad. Oto monye lo kaji ko kilongo noo. Kociha karwaak kunenge ojo, ‘ifwo deu deu kikohin fad kulo katwa lo kang iyaunoti kakidahak, kangwalak, kangodok ko kangurak. ²² Ojo karwaani lahitok, kuna licik isi pili litii ati orihe kaji olalat. ²³ Oto lahitok ojo,Ifwo kikohin fad kuna longon kiji lo kangite itorihohi cio ofwonu ojir kaji nei ifut. ²⁴ Ahirihohi oru lobo to kiji lo kunu cio ngole lilolongi lolotu imang daha lo karama nei.'' ²⁵ Olot orumu ilulung ko Yesu, kibelo diho icienge oto ojo, ²⁶ “Kololotu tungani diho nan ida hati oberu monye ko ngotenge, ngorwani ko tee, recera ko kanecera ibo ko ken nenge token, ida otum rahun kajifitani nei. ²⁷ Manyu tungani na lida oting kuruce nenge, ida otum rahun kajifitani nei. ²⁸ Adi ba ngowak lobo to kiji ningi duho kaji na ikarit. Ngida ba re inyi itongohino kof itutum bolojun ko karitun nenge odeyare kolotum robia kunenge keruno duho? ²⁹ Tonyio kalijuk ca inyi tadati lo kaji ida hati okeru duho, cio fad kuna lodeya omongati ca inyi ³⁰ ojo, ‘icak lerok duho ida hati otum keruno’. ³¹ Kode ngowoju lobo kabu oloro rem ko lobo kabu. Ida re ca inyi itongo kof ode kolotum inyi to asegere alif tomon kitiremo nu lolotuno diho inyi ko asegere alif keek are? ³² kalida inyi otum ocule ca inyi cio lo fworo kitirico lu kabu bito orihe oloma lo foro tenya lo yomo. ³³ Tona kikoi bito lobo to kiji ningi lida otum ngerihino sangite fad, ida otum rahun kajifitani nei. ³⁴ Ojir balang ati kalitiri balang lemun nenge aja ca itweruni ki nyiahahino na lemun? ³⁵ Lida ojir tolobo tohi keken kode to koforo kode to mona, ojir ibirori oleng. Na longon ko kiyoha kulo ningo, ingohi toning”.