¹ Tinyia ofwonu katisofok kulo mucoro ko kapalak, itongoti iriti inyi ningo tenya nenge. ² Ati ofwonu Parisihin ko katiyenak kulo cik ongungunita ojo, “Ifotunita lerok kapalak odaha manyu ko icieng”. ³ Oto Yesu ko forohino icieng ene kitisirani ojo, ⁴ “Adi ba ngotehita lobo tokiji ningi kera mia lobito oto hati lobito ori, ngida ba inyi ongerihi keek mietangon ko metangon olemore olo tahita na lori many orumahi? ⁵ Manyu ojo inyi orumahi otingohi okokoho kunenge. ⁶ iyaru kang. Oto ilolongu morot ko loriehati kunenge ara lobito icieng ojo itokwamati ara lobito ko nan, larumu nan langole ker nei lori. ⁷ Ahirihohi nan ite ajo, tona kikoi bito obolo kwama kai to kapalani lobito na lirwo ilany cio keek mietangon ko mietangon kuna lida ipal”. ⁸ “Kode ngongonore ngorwani robia tomon, itiri hati lobito. Ngida inyi inohahi lomo ofie kaji many orumu? ⁹ Ojo orumu ilolongu morot ko loriehat kunenge ara lobito ojo diho icieng, ‘itokwamati ara lobito ko nan; larumu nan langole robiati nei lori. ¹⁰ Tona kikoi bito ahirihohi ite, obolo kwama diho malaika kulo Lobanga idi kai to kapalani lobito na lirwo”. ¹¹ Osodoro Yesu ojo, “ongon afa lobo tingani ko tee kilahaji are. ¹² Ojona sidi diho monye, apa kico nan sang kuna lara kunei, oto inyi ko korahino sang kunenge diho tee kunenge. ¹³ Orihe ida iyaru faritin kuna iborengi, odumu ene sidi sang kunenge fad, ko loro kof na iloma olo okeru sang kunenge fad to warun na irohoi. ¹⁴ Kolo keru inyi sang kunenge pili, olotu kinga na hitok na kof fad, icak dong inyi kiratita. ¹⁵ Olo inyi tahita tic ico lobo tungani lo na kof inyi tic lo kifita iborohi. ¹⁶ Owak ojo ojir ongar ko iborohi kiwonyita kuna lodaha tonyio oru lobo tungani lico inyi daha. ¹⁷ Langun loitu genyun kwe ibuhu ojo baya karwaak kuna longon kolo apa nei odahati otong daha ati nan ene kiwak kinga kifadaru, ¹⁸ awoju ca nan aite diho apa nei alo arihohi inyi ajo apa, lapal nan ketemoni lo kai ka ketemoni nino. ¹⁹ Lida dong nan acam to kilolongo ojo kito nino kitirak dong nan mejo lobito to kiji lo karwaak kunino. ²⁰ Oto inyi ko wojuno ko lotita diho apa nenge. Ati orihe inyi oloma, odeu monye inyi oto kisa inief to inyi, ife itiric kito nenge olo imaruk inyi. ²¹ Ojo kito diho inyi, ‘Apa lapal nan ketemoni lo kai ko ketemoni nino, lida nan arihe acam kilolongi ojo kito nino’. ²² Ati ojo monye diho karwaak kunenge; ‘Deu. Iyaunoti kyela na ijir noo iticefohiti inyi. itifik ring kafiele nenge ko kamuha kejuha. ²³ Iyau kace na ifir ngafadeti. Ngatinyia karama! ²⁴ Tonyio lowei afa ene kito nei ati lowaru ari. Lori afa ati lorumuno. Oto icahi daha karama. ²⁵ Tona orihe kito na hitok ongon mwang. Ojo olotu lonyihuno kang oning wole ko kya lo cio. ²⁶ Kokilolonguno lobito karwaani itifi nyio longon kitiihino. ²⁷ Ojo karwaani diho inyi loitu rece nino, apa nino dong ko kifadaru kace na ifir tonyio lolotu inyi ara na ijir oru kude’. ²⁸ Ilongo rece nahitok oberu ko rutoro kang. Oto apa nenge olo kilelia diho inyi. ²⁹ Ati inyiahahi inyi monye ojo, ‘tode kuno karihin fad atiyo nan diho isi manyu ida laberu tenya nino oto hati oru ko kilelo na lico isi nan kinya ko morot kunei. ³⁰ Ati ojo ene kito nino olotu lafa lipale sang kunino iyo mulayahin ifadahi isi kace na ifir. ³¹ Ojo monye diho inyi, ‘kito nei, kingon isi ko nan ene faritin fad manyu sangite kuna latehita nan fad ara kunino. ³² Ati ocam diho ohoi to daha karama ko to kwama tonyio ene rece nino lowei afa ati lowaru ari, lori afa ati lorumuno”.