1
Ofwonu kude longoni inya orihohi Yesu tenya lo kude cio kulo Galilea likarutohi Pilato okotohin kuneicieng ko kulo kikumihin kuneicieng.
2
Inyiahahi Yesu icieng ojo, “ifik ite ijo kalitii kunu cio jii, ara icieng kapalak bebe ilany cio kulo Galilea kuna kude fad?
3
Ahirihohi ite jimitan ida ara ji. Ati kalida ite irwo ite fad ikeroro ca ji.
4
Kode kunu cio tomon ko mietare lo wurohino kaji na ikarit to Siloam, ifik ite ijo icieng lara kapalak ilany fad to Jerusalem?
5
Ahirihohi ite jimitan ida ara jii! Ati kalida ite irwo ite manyu ca ikeroro ca ji”.
6
Oto ko rihohino icieng ene kitisirani ojo, “itibulahi afa lobo tungani bule mana nenge ko loro deya ngak kolo ngiju bule nenge ngak, ati ida orumu kolobo.
7
Oto korihohino tungani karicani lo mana nenge ojo, lara karihin uni na lalotunita nan waja ngak iyo ene bule ati ida arumu. Tongode ja! Nyio ha ongerihini ifuho mana ipapala kof?`
8
Inyiahahi karicani lo mana inyi ojo, lahitok, to ngerehi hati ba re to kari lobito ari, akukum ca nan fotiri afik ko kitilitita.
9
Kolo ngiju ngak lukari ojir ojo koloru, kitum ngodaru”.
10
Itiyena orumu Yesu lotubare lobo sabit.
11
lobo ngorwani manyu ongon ija na logil okorif na irohoi inyi to karihin tomon ko mietauni. Ogil rupanyati inyi olanyu biran tur.
12
Kolodeu Yesu inyi oto ko kilolonguno inyi ketemoni ko jimitan diho inyi, “ngorwani lilaharu isi to mwai nino”.
13
Oto ko fiha kana nenge ken nenge, manyu deu deu iyni ko biran omaja Lobanga.
14
To kilongo jimitan itifurie Yesu na ngorwani to sabit, ojo kalanyunoni lo lotubare diho cio, ongon farihin kulo tic ile ifwonu itirumu furioro to kuna faritin ati ida ara to sabit.
15
Lahitok ko ki nyiahahino inyi ojo, “ite kataerok! Ida ite ilahitita mongi ko sigiriahin kuningi to lotorare irihe ifwo itimat?
16
Ojir hati ene ngorwani kito lo Abram na lotor sitan to karihin tomon ko mietauni ida olahi to sabit to kidak na lotorare inyi?
17
Ojo inyi oteny jii odahahi iriri merok kunenge fad ati okwama cio to sangite kuna ijiri kuna litiyo inyi.
18
Tinyia itifi Yesu ojo, “ori okabwe lo Lobanga iya nyio? Ngatiriri ba nan ko nyio?
19
Ori iya kirejati lo
karadali na lodumu tungani itibulahi mana nenge olotu obolo ilany keek kuna longon mana fad ofwonu ko kweny ododo tanitanihin kunenge”.
20
Ari ojo, “ngatiriri nan okabwe lo Lobanga ko nyio?
21
Ori iya ibula kuna lodumu ngorwani kileng lara kude to kana keken ikarutore kofwo kulo mugati ititukan na ibune fad.”
22
Dong osodoro Yesu ko lotita nenge to kangite fad itiyena cio iya na longon inyi owele nenge lo loro iya Jerusalem.
23
Itifi lobo tungani inyi ojo, “Lahitok, cio kude huting re mute lo lwahuno?” Ojo inyi diho icieng,
24
“Ititem bebe rutoro to agwala na itiya tonyio ahirihohi nan ite jimitan cio becek otem mute rutoro ati ida itweruni.
25
Kalowoju ja monye lo kaji igienihi agwala, iwoita mute ite oleng itotoho ilelia ijo, ‘Lahitok kingaju ja ohoi’. Ati inyahu mute inyi ojo, ‘ida nan ahiyen ite kode lofwonunore ningi’.
26
Ito mute ite ijo, ‘kidaha afa ohoi kimata manyu ko isi, manyu itiyena afa isi kikohin kuniyang’.
27
Ati kinyiahahi mute ite ojo, ‘ida nan ahiyen ite kode lofwonunore ningi. Ifwo ten diho nan, ite fad katiyok kulo rohojun!`
28
Ongon mute kicira ko komo lo kala ijia, kalideu mute ite Abram, Isak ko Jakob ko kamocak fad iyo okabwe lo Lobanga ojo ite tokenite kibirori.
29
Ofwonu mute cio to lotulunore ko lodoyore lo kolong ko to kai ko orof manyu itongoti fajihit kuneicieng iyo karama iyo okabwe lo Lobanga.
30
Dede ongon kuna lara lohicungi mute lara katemok ongon manyu katemok lara licung.
31
Kuna farihin ofwonu kude Parisihin diho Yesu oto ojimi diho inyi, “Tongerihi ene faji ilo lobo faji ake. Otahita Erod kifadaru isi”.
32
Inyiahahi inyi ojo, “Ifwo itorihohiti na lobeyok, afuhita ca nan lodonyok ko kitifurio cio jija ko kiwanyi manyu far lo uni akeru.
33
Ati owak nan asodoro jija ko kiwanyi ko lufar ati to dede oru lobo kamocani loweihi lobo faji ake ko Jerusalem.
34
O Jerusalem, Jerusalem isi na lifada kamocak manyu icak to morutok kuna loculuni diho isi, kakeny baya awahare nan itutumuno tee kunino iya na lifurore ikokor tee kunenge iyo fuho kunenge ati ida isi iwak.
35
Tode longerihini kaji nino ara mura. Ahirihohi ite ida ca ite irihe ideu nan ari many mute kalijo, kikwama na lolotu to karana lo Lahitok”.