¹ Tolobo, kalifuruno ilulung lo alifi kuna iborengi manyu onyonati kenite ake ake, icak Yesu tenya re ko kalihitak kunenge ojo, “itigeny itoric kenite iyo ibula kulo Parisayohin na lara talerun. ² Oru lobo tohi limuho ida mute ongajuni kode iduha ida mute itibotuni. ³ Tohi na liteny isi to karwe ofwonuni oforohini to kolong ko tohi na limongahi isi kiyok lo tungani to kudule ofwonuni iwawangahini to kwe lo kaji. ⁴ Ahirihohi ite morot kunei, kebang kuna lifade ken oru lobo tohi na ngitii icieng to kifongi, ⁵ ati ahitotorohi ca nan ite tungani na ngibang ite; itobang inyi na koli fade ken ibirohi manyu okorif kimatare lo geena. Ibo ahirihohi nan ite itobang inyi. ⁶ Ida re itilotitati titihin miet o robiahin are? Ati oru kileng lobito to kiji neicieng na lotum lobanga luluhino. ⁷ Tona kileng fofi kulo kweci kuningi likeni fad. Kebang ogol lofere ningi ilany tii tiihin becek. ⁸ Ahirihohi ite, na lohitikwat nan to ketemoni lo cio, itikwat manyu mute kito lo tungani inyi to ketemoni lo malaikahin kulo Lobanga. ⁹ Ati na lohiberu nan to ketemoni lo cio, oberuni mute to ketemoni lo malaikahin kulo Lobanga. ¹⁰ Manyu tungani fad na loteny lobo tenya omena kito lo tungani olauni mute ati tungani na lomor okorif na inyu ida mute olauni. ¹¹ Kalohiyauni ite ketemok kulo lotubarihin, kabolorok kode kalanyunok, keudo koditi na ca ngifurare isi kode tohi na ca liteny. ¹² Tonyio kitiyen ca okorif na inyu isi tohi na ngiteny isi tona tik. ¹³ Ojo lobo tungani to katwa lo ilulung diho inyi, “katiyenani torihohi rece nei okor sangite kulo lunyo ko nan”. ¹⁴ Inyiahahi Yesu ojo, “Ele, ngai lohidumu nan ara kangotoni lo tenya kode kasingani kiji ningi?” ¹⁵ Oto ojo diho icieng, “itigeny, iririati kenite kuningi iyo koditi kulo kingaru fad. Ida ara sangite kuna lotehita tungani lifak warun nenge”. ¹⁶ Oto orihohi icieng ene kitisirani, “Odo afa mana lo lobo tungani kasamani. ¹⁷ Oto ojo ake ake, nyio ca ngatii nan? Oru faji ngadengohi nan samata kunei. ¹⁸ Ko jimitan, tohi na ca ngatii nan inyi ene; atisara ca nan gogahin kunei afak kuna hitoha. Ato hati atifutahi ngamang kunei fad ko sangite kuna kude. ¹⁹ Ato hati arihohi ken nei ajo, ingon isi ko sangite kuna ijiri kuno lotum daha karihin becek. Totenu dong warun tonyia, imat, ikwama. ²⁰ Ati ojo Lobanga diho inyi, ‘isi kadataruni. Ene karwe orujori ca warun nino diho isi. Oto ca ngai orumu sangite kuna likukumahi isi to ken nino? ²¹ Ori mute ji diho tungani na loric kikuma sangite ara kunenge ida hati obara to ketemoni lo Lobanga. ²² Oto Yesu ojo diho jayona kunenge, “tona ahirihohi nan ite, kebuha to warun nino, nyio ca inya isi, kode to ken nino nyio ca icief ²³ ogol warun ilany daha manyu ilany ken kyelani. ²⁴ Itide kweny; ida icieng oremo kode odengo. Oru gogahin kode derona kuneicieng orihe hony Lobanga ifita icieng. Ida lofere ningi ogol diho Lobanga ilany kweny? ²⁵ Ngai to kiji nigi lotum osodohi hati kileng tik lobito hilong iyo warun nenge to kiudo? ²⁶ Kalida isi itum kitiyo ene tohi sidi nyio iudo isi kude? ²⁷ Itide koditi na lolitare keek, ida icieng itiyo kode orifa. Ati ahirihohi ite kileng kabu Solomon afa ko kwatun nenge ko bara nenge fad, ida icief kyelani kuna idwaruha iya katurahak. ²⁸ Kaliti ciefita Lobanga nyiari kulo mwang kuna longoni jija ojo kiwanyi ocure kima, kiticief dong ca isi aja? O isi na lisidi kiruk. ²⁹ Manyu kefik tau nino iyo tohi lo daha ko lo mata, keudo to kuna sangite. ³⁰ Sangite kuna lifuhita cio kuna lolunya Lobanga kuna manyu oyen Apa ningi ojo iwak ite icieng. ³¹ Ati itemo re totak okabwe nenge, oto ca kuno sangite manyu ara kunino. ³² Kebang, ite kera kulo twol nei, tonyio okwama Apa ningi kicwara ite okabwe. ³³ Itiloteti sangite kuningi icwarata kakidahak. Itirif ogogori kuna lida mute ociraha, ibar idi kai na lida oru faji na lida kakatak, kabelak ko kakokok ogoru, ida manyu ingenyuk ipale. ³⁴ Tonyio faji na longon bara nino ijia manyu ongon tau nino”. ³⁵ Icefitati ira kirwaa manyu ingohi lomohin to nok. ³⁶ Iya cio karwaak kuna litila Lahitok neicieng ituno to karama lo kiyemi, ojir kololotu inyi itotoho angwala ongajuni deu deu. ³⁷ Olotu ca ojir diho kuna karwaak lolotu lahitok neicieng orumahi icieng iriria. Ahirihohi tenya lo dede icief ca inyi kyela lo kirwaa, ititongohi icieng diho meja ko lotuno kirwaa icieng. ³⁸ Ojir ca diho kuna karwaak lorumahi lahitok neiceng ikukumahino kileng ngolotu inyi to tik lo are kode lo uni lo karwe. ³⁹ Ati iniangata ene; ngara oyen monye lo kaji tik na lolotunore kakokoni, ngida ongerihi ogili kaji nenge. ⁴⁰ Ojir manyu ite ikukumahino tonyio olotu mute kito lo tungani to tik na lida ite ikodomo”. ⁴¹ Itifi Petero ojo Lahitok, itenya isi ene kitisirani diho ohoi kode diho cio fad? ⁴² Inyiahahi Lahitok ojo, “ngai hati kalanyoni na igeny ligenoro na lofik Lahitok olanyu karwaak kunenge kicwara robia kuneicieng kulo daha to tik na ibehi? ⁴³ Ojir ca diho na karwaani lo lotu Lahitok nenge orumahi itiyo ji koloitu inyi. ⁴⁴ Ahirihohi tenya lo dede ofik ca inyi ara kalanyunoni lo sangite kunenge fad. ⁴⁵ Adi ba ngojo na karwaani to tau nenge ojo ‘ida lahitok nei olotuno deu icak lumo karwaak kuna kude ko daha omata oruma. ⁴⁶ Oto hati lahitok lo na karwaani ko lotuno far na lida inyi okodomo ojo olotuno Lahitok iyo tik na lida inyi oyen. Olotu ingungut inyi ara tuli ico inyi ongar lohitongore ko kuna lida iruk Lobanga. ⁴⁷ Na karwaani loyen wahun lo lahitok nenge ida hati ikukumahino kode ida itii tohi na lowak Lahitok nenge, olumi inyi kario becek. ⁴⁸ Ati na lida oyen itii hati tohi na locamare inyi to lumo, olumi inyi kario kude kuting. Diho tungani na licori obolo okodomoti manyu tohi na hitok, manyu diho tungani na litibarahini becek owahiti manyu becek ilany. ⁴⁹ Alotu nan kiyauno kima kof manyu akodomo jimitan ngara hati adi linohahino. ⁵⁰ Ati atila nan kibatisa na lohibatisrihin ca nan, ce many audo nan many ca koloru. ⁵¹ Itam ite ijo alotu nan kiyauno kisiliban kof? Ida, ahirihohi, ati kokora. ⁵² Kicaha tole far olorore iyo ketemoni ongon cio miet kaji lobito okora ca uni oberu are, are oberu uni. ⁵³ Okorati ca monye oberu kito, kito oberu monye, iyang oberu kito kito oberu iyang nenge, kakanyi oberu kokwa, kokwa oberu kakanyi”. ⁵⁴ Kalideu ite idis ongon lodoyore lo kolong, ijo ite oca ca kuju, oca manyu dede. ⁵⁵ Manyu kolo kuta kiyoma to ngati lo orof, ijo, “onok ca ene far, onok manyu. ⁵⁶ Katelorok iyen ite hera kibebelo lo kof ko kai. Aja hati ite ida iyen hera kof lo kuno faritin? ⁵⁷ Nyio ida ite to kenite kuningi iheru tohi na ijir? ⁵⁸ Kaliloro isi ko kadoroni nino iyo lokiho, totem bebe yomo ko inyi to kikoi kode kiyaru ha ca inyi isi diho kangotoni lo tenya, kico kangotoni lo tenya isi diho lahitok lo polis manyu lahitok lo polis ko kibirohino isi mabus. ⁵⁹ Ahirihohi ida ca isi irihe irutu many ikerehi duma lo kipal nino many tarifati.