¹ Lobo far ilifa Yesu tolobo faji. Langun lokeru inyi ojo jayona nenge lobito diho inyi, “Lahitok kitiyen ohoi kilifa iya na litiyenare Jon jayona kunenge”. ² Ojo inyi diho icieng, “kalilifa itijo; Apa Karana nino obangiti Okabwe nino olotu. ³ Kicio ohoi to faritin daha niyang lo tik tik. ⁴ kilau ohoi kipali pali kuniyang Tonyio kilau manyu ohoi kuna lipal diho ohoi Manyu kehirihoro ohoi diho lab.'''' ⁵ Oto ojo diho icieng, “Adi ba gongon lobo to kiji ningi ko morte, oto hati olo diho inyi tuk lo karwe ojo, mortele kikurohi nan mugatihin uni, ⁶ tonyio lobo morte nei lolotu diho nan oru tohi na ngaco nan diho inyi. ⁷ Oto nu longon kaji ifotu ojo, “kehiticana nan. Ligiena agwala li punga manyu tee kunei lohingon ko nan logetore ida nan atweru wojuno ahicio isi lobo tohi. ⁸ Ahirihohi kileng ngida owoju icio inyi lobo tohi tarahun morte nenge ati to kingere lo lerok, owoju ca iciorihi inyi sangite fad kuna lowak inyi. ⁹ Tona ajo nan diho ite itifia kicori ca, totak irumu ca, itotoho kingajihini ca isi agwala. ¹⁰ Tonyio tungani fad na litifia icori, inyi na lotahita orumahi ko diho inyi na litotoho ongajihini agwala. ¹¹ Ngai to kiji ningi apaico, kalilifia kito nino kayamiti icorihi munu? ¹² Kode kali tifia katarati icorihi lokidokoro? ¹³ Adiha ite kileng lirohori kaliyen kicwara tee kuningi sangite kuna ijiri, many baya ca Apa ningi na longon kai icio okorif na Inyu diho cio kuna litifia inyi?” ¹⁴ Ifuhita orumu Yesu lobo lodonyohiti lida otenya. Kolo lo na lodonyohiti na lotungani lorumu lida otenya ko tenya oto ilulung ipany. ¹⁵ Ati ojo kude, “to Belzebub lahitok lo lodonyok ifuhita inyi lodonyok”. ¹⁶ Kude otema inyi to kitifia kitotorita to kai. ¹⁷ Yesu ko yenun kibuha neicieng ko jimitan diho icieng, “lobo kabwe na li kokor ken orem ake ake ouroro, manyu kaji na lokokora ouroro. ¹⁸ Kolokokora sitan ake otum inyi owoita aja? Ajo nan ji tonyio ijo ite afuhita nan lodonyok to Belzebub. ¹⁹ Kalafuhita nan lodonyok to Belzebub ifuhita hati kajifitak kuningi to ngai? Inyi jimitan ara mute icieng kangotok kulo tenya kweci kuningi. ²⁰ Ati kalafuhita nan lodonyok to kafiele lo Lobanga, inyi jimitan lolotu okabwe lo lobanga diho ite. ²¹ Kalikura tungani ka goloni kalenge otehita sangita kiremita kunenge inyi jimitan otuba sangite kunenge. ²² Ati kololotu lobo lilany golun nenge inyi odume ko kuladi kiremita kunenge ligeno inyi ojo kilwak cia inyi ko sangite dot to kalenge. ²³ Tungani na lida kingon ko nan, kiberu nan manyu na lida kitutuba ko nan, ara katisarani. ²⁴ Kolorutu okorif na irohoi to ken lo tungani, olo ilor fajihit kuna itowi otak lohiyomare ida orumu. Oto ojo, “aite ca lafa kaji langerihi nan” ²⁵ kololotu orumu kaji ofiaru onyu ikukumahino. ²⁶ Oto ko itoro olo iyauno okorifi kuna kude mietare kuna irohori ilany inyi ko rutoroti kitongo ija. Oto warun tona tungani ko rohojun ilany lafa lo ketemoni.” ²⁷ Kolo tenya Yesu kuno tenyi tenyi, lobo ngorwani to katwa lo ilulung ko jimitan, “ongon gum diho iyang na lohitomonu isi kitinak manyu”. ²⁸ Inyahahi Yesu inyi ojo, “ati ongon ko gum cio kuna loningo tenya lo Lobanga manyu itiyorihin”. ²⁹ Kolo sodo ilulung ojo Yesu, “Ene kofiangiti irohoi. Itifia diho nan kitotorita lo tangu, ati oru ca lobo liciori icieng maak kalara kitotorita lo Jona. ³⁰ Tonyio iya lafa lorahare Jona kitotorita diho cio kulo Nineve ara manyu ca kito lo tungani kitotorit diho ene kofiangiti. ³¹ Lafa kabu ngorwani lolotu to ngati lo orof owoita mute lokiho ko ene kofiangiti ongotohi icieng tenya tonyio olotu afa inyi many to lohicungi lo kof ningo genyun lo Solomon, manyu jija ongon na lilany Solomon ene. ³² Owoju mute cio kulo Nineve owoita ko ene kofiangiti ongotohi icieng tenya to lokiho tonyio irwo afa icieng kolonigi tenya lo Jona. Manyu jija ongon na lilanyu Jona ene. ³³ Oru tungani linwahahi lomo ofik faji na liduha kode imuk to ilebu. Ati ofik inyi lotedore nenge ojir cio kuna lorutuno kaji odeu wangun. ³⁴ Ara konyek lomo lo ken nino. Kolojiri konyeha kunino ken nino manyu fad ko wangun. Ati kolorohoi konyeha kunino ken nino manyu fad ko ngonun iyo kimuyuk. ³⁵ Kocio bo wangun na longon diho isi ara lokimuyuk. ³⁶ Inyi na, kalifut ken nino fad ko wangun oru lobo faji lomutok, oto ca fad owang iya na nginwahare wangun lo lomo ken nino. ³⁷ Langun lokeru Yesu tenya ilolonge lobo Parisini inyi kalenge daha ko inyi, oto inyi ko loro olo itongohino meja. ³⁸ Ati odeu parisini jimitan ida Yesu ilal kac orihe ida liak daha oto inyi ipany noo. ³⁹ Tinya ojo lahitok diho inyi, “jija ite Parisihin ilala ite oleng lo kubayahin ko sahani ati katwa ifut ite ko kingaru ko rohojun. ⁴⁰ Ite cio kuna idataruha! Ida afa inyi na likukum oleng ikukum ko katwa fad? ⁴¹ Ati icwarata tohi na longon katwa diho kakidahak oto ca sangite fad ko nyujon diho isi. ⁴² Kidak diho ite Parisihin tonyio icorita ite Lobanga lobito lo tomon lo ingete, lotuper ko jationg kuna kude, ati itikaj ngotolo tenya obir ko kimaruno Lobanga. Ji ite itiyo kuna ida ingohi kuna kude. ⁴³ Kidak diho ite Parisihin tonyio imaru ite lohitongorehin kuna hitoha to lotubarehin manyu kifonyoti to cuhi. ⁴⁴ Kidak diho ite tonyio iri ite iya kwecerehin kuna lo ru tohi na litotoro onyona cio manyu orangitati ida kileng oyeniti.” ⁴⁵ Lobito to kiji lo katiyenak kulo cik ko kifotuno tenya nenge ojo, “katiyenani, kalitenya isi ji imoro isi ko ohoi fad”. ⁴⁶ Inyiahahi inyi ojo, “manyu ite katiyenak kulo cik kidak diho ite tonyio iticuna ite cio to ter na lida otumiti tingita ito hati ite ida iting kileng kafiele lo kingara icieng. ⁴⁷ Kidak diho ite tonyio iduk ite kwecerehinkulo kamocak ara manyu munyiri lifade icieng. ⁴⁸ Inyi jimitan itisadeno ite tohi na litii munyiri, ifade icieng kamocak, iduk manyu ite kwecerehin kuneicieng. ⁴⁹ Tone oteny Lobanga to genyun nenge ojo, ‘aculahi ca nan icieng kamocak ko jayona kude ifade ca icieng itican kud. ⁵⁰ Tona, ene kofiangiti ca liyuk okotohin kulo kamocak fad kuna lifadi manyu to lohicahi lo kof, ⁵¹ manyu to okoto lo abel ogorunore diho Zakaria na lifadihini kiji lo ciali ko kaji lo Lobanga. Ibo ahirihohi jimitan iyuk ca ene kofiangiti fad. ⁵² Kidak diho ite kayenak kulo cik tonyio lidume ite kingajit lo genyun manyu ite to kenite ida irute manyu itiho kuna lowak rutoro”. ⁵³ Langun lolo Yesu tija, icak Parisihin ko katiyenak kulo cik kitirisa inyi tonaigol manyu kirita inyi to kitifihin, ⁵⁴ lotahita kiniefuno inyi to lobo tohi ngoteny inyi.