¹ To kifwongi, onyumu Lahitok cio keek mietare ko ara ko kitifaha icieng tare tare ketemoni nenge iyo kangite kuna lowak inyi loro, ² orihohi icieng ojo, “Obolo mana oto ikuting kadengok. Ilifata lahitok lo mana ojir oculahi kadengok mana nenge. ³ Ifwo ahiculahi nan ite iya tee kulo kera kiji lo lowohoho. ⁴ Keyaru ogogr kode robia kode kamuha manyu ke fony lobotungani to kikoi. ⁵ Kalirute lobo kaji itemo re itijo kisiliban tongon ene kaji, ⁶ kolongon tungani lo kisiliban ija imuk ca kisiliban inyi koloru ibelo ca diho ite. ⁷ Itongoti na kaji idaha komata tohi na lohicori ite tonyio ocam katiyoni lo bahacic kelorita to kajihit. ⁸ Kalirute ite kang ki fotuni ite, itonya tohi na lofihi ketemoni ⁹ ningi itifuriete kamwayak kuna longon ija, manyu iti rihohi icieng iti jo, “lonyiha okabwe lo Lobanga diho ite”. ¹⁰ Ati kalirute ite kang ida kifotuni ite, ifwo kikohin kuneicieng itijo, ¹¹ kileng fur lo kang ningi na lo furihi kejuha kuniyang kifyehi ohoi diho ite ati itoyen ene, “Lonyihu okabwe lo Lobanga” ¹² Ahirihohi ite omayak mute kidak lo sodom ilany lona kang. ¹³ Kidak iyo isi Korazin! Kdak iyo isi Betsaida! Tonyio ngara iti kuna tanguhin litii katwa nino Taya ko Sidon ji icieng lirwo many afa, iciefi kyelani kulo tai manyu itongoti lokuroni. ¹⁴ Omayak mute kidak lo Taya ko Sidon far lo ngoto lo tenya ilany kidak nino. ¹⁵ Ko isi kapernaum kitingi ca isi many kai? Oru ilo ca isi tula na iluko. ¹⁶ Na kohining ite kining nan. Na lohiberu ite kiberu nan ati na lohiberu nan oberu inyi na lohiculahi nan”. ¹⁷ Oyitu kuna keek mietare ko are to kwama manyu ojimi, “Lahitok kileng lodonyohi kiningo ohoi to karana nino”. ¹⁸ Inyiahahi inyi ojo, “Adeu nan sitan ouruno iya hila to kai. ¹⁹ Lahicio nan ite twero lo nyona munuok ko lokidokorohin ko lanyuno golun fad lo meroni oru ca lobotohi lohinya ite. ²⁰ Otohati kekwama ijo kiningo okorifi ite ati ito kwamati tonyio ligero karaneco kuningi idi kai.” ²¹ To na tik na lifutare Yesu ko kwama to okorif na inyu ko jimitan, “Ahimaja nan isi apa Lahitok lo kai ko kof tonyio liduhe isi kuno sangite diho kagenyak ko kakenak manyu itotoru icieng diho tee kuna sidiha. Ibo apa tonyio ara ene kwama nino. ²² Sangite fad lohicorihi apa nei nan. Oru lobo tungani loyen kito, monye ake. Manyu oru lobo tungani loyen Apa ati kito ake ko kuna lowak kito itotorohino inyi”. ²³ Tinya ko kibelo diho jayona kunenge ko rihohino icieng lo lit ojo, “Ongon ko gum konyeha kuna lodeya tohi na lideya ite, ²⁴ tonyio ahirihohi ite ajo kamocak kuna iborengi ko kabuno owahiti orumu deya sangite kuna lideya ite ati ida odeuni”. ²⁵ To lobo far lobo kayenani lo cik ko wojuno tema Yesu. Ojo diho inyi, “katiyenani, nyio ngatii nan arumunore warun na isio”? ²⁶ Inyiahahi Yesu inyi ojo, “nyio ligero iyo cik? Iken isi aja?” ²⁷ Inyiahahi inyi ojo, “imaru lahitok lobanga nino to tau nino fad, to warun nino fad, to golun nino fad manyu to kibuha nino fad manyu imaru loriehat nino iya ken nino. ²⁸ Ifotu Yesu ojo, “Inyahu isi ara na ibir. Itiyo ji ito ca iwar”. ²⁹ Ati owak inyi kitibira ken nenge, oto itifi Yesu ojo, “ngai loriehat nei?” ³⁰ Lo kinyahahino ojo Yesu, “oloro afa lobo tungani to Jerusalem iya Jeriko, ourohino inyi kac kulo kabelak. Oto ko pucaroti kyelani kunenge olumi ko ngerihinoti lomana weyaru. ³¹ Oloro manyu lobo kadwarani ara na kikoi bito ojo olotu orumahi na tungani ko geraru ara kalele. ³² Levini manyu ji ojo ogoru na faji ko geraru ara kalele ongerihi na tungani. ³³ Ati Samariani kololotu orumu na tungani inief kisa inyi. ³⁴ Olo diho inyi obubur korongan kunenge kolokeru kijuhohino ngoroni ko vino, kotingohino na tungani kai lo sigiria nenge. Iyaru inyi lohitimwayare olwak inyi. ³⁵ Kiwanyi nenge ko dumuno robia are ko kicwara monye lo na faji ko ciha ojo “itimwaya inyi manyu kalaitu nan ahidumahi ca isi kologal kude robia”. ³⁶ Ani diho kuna cio itam isi ijo ara loriehat lona tungani lolum kabelak?” ³⁷ Inyiahahi kayenani lo cik ojo, “na linief kisa diho inyi”. inyiahahi Yesu ojo, “ilo itiyo iya na”. ³⁸ Kololot Yesu ko jayona kunenge ofwonuni lobo kang na lorumu inyi lobo ngorwani lobara Marta ifotu icieng kalenge. ³⁹ Ongon inyi ko kanece lobo lobara Meri na litongo kejuha kulo lahitok oningo tohi na lotenya inyi. ⁴⁰ Ati Marta dong obolojohi tic lo kikukuma sangite. Inyi ko lotuno diho Yesu ojo, “Lahitok ida isi ideu jimitan lohilahi kanece nei nan tic fad ake? Torihohi inyi olotu kilwak nan! “ ⁴¹ Inyiahahi Lahitok inyi ojo, “Marta iudo isi manyu ilongojita to sangite becek, ⁴² ati lobito tohi keken owahiti. Lonyumu Meri tohi na lojir ilany manyu ida mute odumari diho inyi.