¹ Kalilolongu Yesu jayona kunenge tomon ko are, oto icio icieng twero ko golun lo kifuhita lodonyok fad ko lo kitifurioro mwaita, ² manyu itifahe icieng to fworo kitifurioro mwaita ko kititima okabwe lo Lobanga. ³ Orihohi icieng ojo, “keyaru lobo yohi ene owele, oru iluk, oru ogogor, oru mugati, oru robia, oru kirwata lo kyelani. ⁴ Kaji na lirute ite itongoti inya manyu ingerihi na kang. ⁵ Kalida cio kifotu ite idafuhoto fur to kejuha kuningi kalingerihino ite kang neicieng ara saden diho icieng”. ⁶ Oto icieng ofwo kangite to kangite ititimati tenya lo Lobanga ko kitifurio cio fajihit fad. ⁷ Oto Erod oning kuna sangite litiihino fad. Oto itingaihi inyi tonyio orumu kude ojo lowaru Jon kabatisani, ⁸ ojo kude Elia loitu orihe kude ojo lobito iyo kamocak kulafa berien lowaru. ⁹ Ati ojo Erod, angute afa nan kwe lo Jon, ngai hati ene laningo nan itiyo kuno sangite? Oto inyi otahita deya Yesu. ¹⁰ Koloitu iayona, orihohi icieng Yesu sangite fad kuna litii icieng. Inyi ko dumuno icieng ilihe ko inyi, ingadari lobo kang lojimi Betsaida. ¹¹ Ati oning ilulung loro nenge ijia ko kijifaroti inyi. ifotu inyi icieng manyu ititim diho icieng tenya lo okabwe lo Lobanga manyi itifurie kuna lotahita kitifurioro. ¹² Langun lobolo kurou, ofwonu kuna tomon ko are ojo diho inyi, “tolahahi cio ofwo ojir ofwori kangite kuna longoni ene ofwori inyangi sangite kulo daha ko logetorihin tonyio kingoni faji na ipolo. ¹³ Inyiahahi inyi icieng ojo, “icwarata icieng tohi lo daha”. Inyiahahi icieng ojo, “kingoni ene ko mugatihin miet ko kayam are- na lowak ojo ngohifwo kinyianga daha to kuno cio ilulung”. ¹⁴ (otum cio rei alif miet kuna lo ongoni) ati ojo inyi diho jayona kunenge, “ititongohiti icieng kof to keek miet tabani fad”. ¹⁵ itii jayona jii itongohino cio fad kof. ¹⁶ Dumuno kuna mugatihin miet ko kayam are , ode iya kai, icio kwama ko ki bebenya icieng ko ki cwara jayona kunenge ico cio, ¹⁷ onyia icieng fad imoneho oto jayona itutufu otonge aduhuhin tomon ko are. ¹⁸ Tolobo afa kalilifa Yesu to tik ongon ko jayona kunenge itifi inyi icieng ojo, “ojo re ilulung ojo nan ngai?” ¹⁹ Inyiahahi icieng ojo, “ojo kude Jon kabatisani kude ojo Elia orihe manyu kude ojo lobito to kiji lo kamocak kulafa berien lowaru”. ²⁰ Itifi inyi icieng ojo, “adi ite? Ijo ite nan ngai?” inyiahahi Petero ojo, “kristo lo Lobanga”. ²¹ Ocik Yesu icieng rik rik ojo ojir ida orihohini ene tenya iyo lobo tungani. ²² Manyu ojo, “orumu ca kito lo tungani kidak nahitok manyu oberu lohitwaha, kadwarak kuna hitoha ko katiyenak kulo cik inyi manyu ifadari ca inyi ati to far lo uni owaru”. ²³ Oto ko jimitan diho icieng fad, “kolohijifu lobo tungani nan, ojir oberu ken nenge manyu oting kuruce nenge faritin fad kijif nan, ²⁴ tonyio na loric warun nenge itiri ati na litiri warun nenge to nan oric ca. ²⁵ Nyio jiran ngorumu tungani kolodumu ene kof fad ara nenge oto hati itiri kode ijuhe warun nenge? ²⁶ Kolodaha riri tungani to nan kode to tenya nitole onyia manyu mute iriri kito lo tungani kololotu to deyo nenge ko deyo lo apa nenge ko lo malaikahin kuna inyuji. ²⁷ Ahirihohi ite tenya lo dede, kude kuna lowoita ene ida ca imang wei orihe ida lodeuni okabwe lo Lobanga. ²⁸ Koloring faritin mietauni langun loteny Yesu kuna tenyi tenyi, iyaru inyi Petero, Jems, ko Jon ko inyi ko loro donge kilifa. ²⁹ Kalilifa inyi, ibeloro komom nenge, ko kyelani kunenge ko kwerun iya hila. ³⁰ Cio are Moses ko Elia, ³¹ ko boto iyo deyo lo nyujon otenyati ko Yesu. Otenyati to lotita nenge na lo lelek itiihino to Jerusalem. ³² Petero ko kaletok kunenge orumu ilurati ati langun lokwenyuni, odeu icieng deyo nenge ko kuna cio are owoitati ko inyi. ³³ Ojo lofworo kuna cio longerihinoti Yesu, ojo Petero diho inyi Lahitok ojir diho ohoi ki tongo ene. Ngatiduhohiti tuguno uni ene lobito nino, lobito lo Moses ko lobito lo Elia (ida manyu kileng inyi oyen tohi na lotenya inyi). ³⁴ Kolorihe inyi otenya, idis ko lotuno imuhe icieng oto icieng obangi kolongon icieng idis hatwa. ³⁵ Ojo ogoro to katwa lo idis, “kito nitole ene na lanyumu nan. Itining inyi”. ³⁶ kolokeru ene ogoro tenya orumuni Yesu lotong ake. Oricahi kuna jayona na tenya taulo kuneiceng ida orihohini lobo tungani to kuna faritin tohi na lodeu icieng. ³⁷ Kiwanyi nenge kaliculunoti to donge, itiric ilulung na hitok inyi. ³⁸ Ilolongo lobo tungani to kiji lo ilulung “ katiyenani alelia nan diho isi tolwak kito nei ara lobito hilong, ³⁹ iniefunita okorif inyi oruny kiluluo iti goliorita inyi many ifurita lohapoyok to kutuk. Ida owak ngerihino inyi manyu ifadaru inyi aleliahi nan jayona kunino ojir ifuhe na okorif ati ida icieng itweru”. ⁴⁰ Inyiahahi Yesu inyi ojo.'' ⁴¹ “Ofiangiti na lipalaru ko na loru kiruk, many anu ca nan kitongo ko ite manyu ahidik ite? Iyauno kito nino ene”. ⁴² Kileng orihe kito na ongon lotuno, ibirohi lodonyok inyi kof ko kitigolioro. Ati irieng Yesu lodonyok itifurie kito ko kicwara inyi diho monye. ⁴³ Ati ipany icieng fad bolojun lo Lobanga. Kolorihe cio ipany kuna litiyo Yesu, ojo inyi diho jayona kunenge, ⁴⁴ “itoning otoc tohi na laloro nan rihohino ite; ofworoti ki tobohino kito lo tungani kac kulo cio”. ⁴⁵ Ati ida icieng iniang fotiri lo ne tenya, iduharu diho icieng, ida icieng oyenare manyu obang icieng kitifia inyi. ⁴⁶ Iciak peha kiji lo jayonak kulo Yesu lo jimitan ani to kiji neicieng lobolo ilany. ⁴⁷ Oyen Yesu kigigilo neicieng berien ko dumuno kito nasidi itiwoitahi to mari nenge ⁴⁸ ko jimitan hati diho icieng, “tungani na lifotu ene kito sidi to karana nei, kifotu nan manyu tungani na lohifotu nan, ifotu inyi na lohiculu nan. Tonyio inyi na sidi noo tokiji ningi inyi na lobolo ogal”. ⁴⁹ Ojo Jon, “lahitok kideu ohoi lobo tungani ifuhita lodonyok to karana nino, kitem ohoi kitiho inyi tonyio ida inyi ara lobito to kiji niyang. ⁵⁰ Ojo Yesu, “ketik inyi tonyio na lida kitiremo ite ara ningi”. ⁵¹ Kolonyihu faritin diho inyi kulo loro kai, icak Yesu lotita iya Jerusalem. ⁵² Inyi ko cularu ifak kunenge ketemoni lobo kang lo Samaria ojo ojir ikukumahini sangite to inyi. ⁵³ Ati oberu cio kulo na kang kifotuno inyi tonyio oloro inyi iya Jerusalem. ⁵⁴ Kolodeu jayona Jems ko Jon ji itifi inyi ojo, “Lahitok iwak isi ohoi kilolongu kima to kai ojir okeru icieng?” ⁵⁵ Ati ibelo Yesu irieng icieng, ⁵⁶ kofworoti lobo kang ake. ⁵⁷ Kololot icieng to kikoi, ojo lobo tungani diho inyi, “ahijif ca nan isi fajihit fad kuna liloro isi”. ⁵⁸ Inyiahahi Yesu ojo, “ongon lobeyohi ko ococi manyu ongo kweny kulo kai ko kajihit ati oru kito lo tungani ko faji na ngitigetihi kwe”. ⁵⁹ Ojo inyi diho lobo tungani, “kijif nan”. Ati inyahahi na tungani inyi ojo, “Lahitok ingohire alo amuk apa nei”. ⁶⁰ Ojo Yesu diho inyi, “Ingohi kaweyak to nuk kaweyak kuneicieng ake ati ilo isi kititima tenya lo okabwe lo Lobanga”. ⁶¹ Ari ojo manyu lobo, “Ahijif ca nan isi lahitok ati ingohi re alo acik cio kunitole”. ⁶² Inyahahi Yesu ojo, “oru lobo tungani lofik kana iyo kebu orihe ongolo kifongi locam kitiyo diho okabwe lo Lobanga”.