¹ Ara to laharu lohilahe Kristo ohoi. Itiwoitati bo dong igoli, kelahahiti kenite kuningi kiticuni ter lo rahun opi ari. ² Itiric tenya nei! Nan Paul latenya ajo kaliruk ite kicwara kenite kuningi kiliri oto faida lo Kristo ko rujon diho ite. ³ Ari arihohino nan cio fad kuna liruk kiliraru jimitan ojir ha dong iric kijifita cik fad. ⁴ Ite kuna lijo ojir kitibiri to cik, likore ha dong ite kenite iyo Kristo, liuroro ite oleng to kisa lo Lobanga. ⁵ Ati to kiruk kitila ohoi manyu kigeria to Okorif kitibira na lohigeno ohoi. ⁶ Tonyio iyo Kristo Yesu, kiliraru kode ida iliraru oru ko lobo faida. Tohi na logol lofere nenge inyi kiruk na litiboto ken nenge iyo kimaruno. ⁷ Ifeita afa ite angwala lo kitilanya na ijir. Ngai manyu lohingotohino ite kitigogolu ite iyo rican tenya lo dede? ⁸ Ida koditi lona tana olotu iyo tungani na afa lohilolong ite. ⁹ Ibula kude kuting otum itifuru tobok fad lo kofuo kulo mugati kuna lingohi. ¹⁰ Angon nan ko kiruk iyo Lobanga jimitan ida cia ite irumu lobo lowoitare na lara ake ko nei. Na tungani longon kitingoya ite kileng ngara ba inyi ngai odeu cia inyi ngoto lo tenya lo Lobanga. ¹¹ Recera ngara orihe nan atitima tenya lo kilira, nyio hati kitigemarihin nan? Kalara jii irumu bo dong tenya lo kiruce lifufusori. ¹² Kalara to kuna kasusudak ojo iyo nan ngosodoroti ogeleni ko kenite kuneicieng. ¹³ Recera kilolonguni ite iyo manya la laharu. Ati ketiyore laharu ningi ara lo kitiyo ticitici kulo kipal ati irwaati kenite kuningi ake ake to kimaruno. ¹⁴ Owoita cik fad iyo tenya lobito keken na lojo, “imaru loriehat nino iya na limarunore isi ken nino”. ¹⁵ Kalisodoro ite konya kenite ake ake ko kitiremo kenite, itigol ikeru cia ite kenite ake ake. ¹⁶ Jijia ajo nan itiwar to Okorif ito cia ite ida itimangu kenite wahun lo koditi lo kipal. ¹⁷ Tonyio owak ken lo kipal tohi na loberu Okorif, manyu Okorif owak tohi na loberu koditi lo kipal. Orem icieng ake ake ojir isi ida itii tohi na liwak isi. ¹⁸ Ati kalara Okorif lohirihita isi, ida isi ingon fotiri lo cik. ¹⁹ Obotoho ticitici kulo koditi lo kipal icieng ticitici kulo somun, kitikwera konyeha, ²⁰ kiwora lopidingahin, kilalamita, oberwe, kokora, okaine, kilongo, rija obolore, peha, liwa, ²¹ kifada lo cio, ruma ko daha lo kwama na irohoi ko kude kuna lori ko kuna. Ahicik ari iya lafa lahicihare ketemoni ajo cio kuna lomanya koditi lo na manya ida oluny okabwe lo Lobanga. ²² Ati ngak lo Okorif na Inyu inyi kimaruno, kwama, kisiliban, diha lo tenya, kibaya lo tau, jiran, kigenoro, ²³ riejun ko kidonyo lo tau. Oru lobo cik loberu sangite kuna lori iya kuna. ²⁴ Kuna lara kulo Kristo Yesu logurohini afa koditi lo kipal ko wahun nenge fad. ²⁵ Iya na lohiwarare ohoi to Okorif, ngalihitati ara lobito ko Okorif. ²⁶ Keco kitidara, kingirunita cio kulakude ko damun sangite kuneicieng.