¹ Recera, kaliniefahini lobo tungani iyo kipal, ojir ite kuna lohirihita Okorif inyiahu inyi to riejun. Ati iririati kenite kuningi ida manyu ite iurohino iyo laba. ² Itingar kiyuhita ter kulo kaletok manyu to na kikoi itum cia ite kitifuta cik lo Kristo. ³ Kalibuha lobo tungani ojo ara inyi lobo tohi ida hati ara, itinononga inyi ken nenge ake ake. ⁴ Ingohi tungani to lobito to lobito totem kiriria ticitici kunenge ake ake. Tona otum cia inyi pufare ken nenge ida itiririo ken nenge ko lobo tungani ake, ⁵ tonyio ojir lobito lobito oting ter nenge ake ake. ⁶ Tungani na lorumu kitiyena iyo tenya lo Lobanga ojir ongar sangite kuna ijiri fad ko katiyenani nenge. ⁷ Kecio kitinonongi ite: ida isongarihin Lobanga. Odengo tungani kinyiemo kuna loiya inyi. ⁸ Tungani na loiya lo kitikwama koditi lo kipal, iyo na koditi lo kipal odengu mute inyi wei. Na loya kinyiemo kulo kitikwama Okorif na inyu, iyo Okorif na Inyu odengu mute inyi warun na losio tur. ⁹ Keco kiniamaha kitiyo jiran tonyio tofar na likukumahini kidengu mute kalida kiticung kitiyo. ¹⁰ Tona, kolohingon ko tik, ngatiyoti jiran diho cio pili, bebe nenge cio kuna longoni iyo ilulung lo karuhok. ¹¹ Itide morohojun lo nuhutahun kuna latiyore nan kigero ene waraga diho ite to kana nei. ¹³ Cio kuna longon kitotoro kenite diho ite to oleng ojo kijiri icieng, owak icieng kifudahino ite kiliraru. Tohi lobito na licio icieng itiyore jii ojo ojir ida kitigemi to kuruce lo Kristo. ¹² Ida kileng cio kuna liliraru ijifita cik, ati owahiti ojo ojir ite iliraru ojir kipufare kenite kuningi. ¹⁴ Kecio nan apufare lobo tohi ati kuruce lo Lahitok niyang Yesu Kristo na licio kof ogurohini to ngati nei ko nan to kof. ¹⁵ Ida kiliraru kode rujon lo kiliraru ara lobo tohi. Tohi na logol inyi rahun tungani ngejuk. ¹⁶ Kisiliban ko kisa ingohi tongon diho cio pili kuna lijifita ene tenya, many diho Israel lo Lobanga. ¹⁷ Lohicungi ajo nan keco tungani kicio nan kitigema, tonyio atehita nan kaforo kulo Yesu to ken nei. ¹⁸ Ingohi kisa lo Lahitok niyang Yesu Kristo kingon ko ite recera. Amen