¹ Tohi na latenya nan diho ite ajo nan kalunyoni kolorihe ara kito oriworo ko opi kileng lara inyi lolanyu sangite kulo monye fad. ² Orihe inyi ongon iyo twero lo karicak kulo sangite kunenge many kolotumohino faritin kuna locik monye. ³ Kiri manyu ohoi jii orihe afa kira tee, kirihe afa ohoi kira opi iyo ticitici kuna lolanyu ene kof. ⁴ Ati kolotumohino faritin, oculu Lobanga kito nenge na lotomonu ngorwani, manyu otomonohini iyo cik ojir ⁵ olahu kuna longon tora iyo cik ojo ojir kiciori ohoi twero lo tee. ⁶ Tonyio kira ohoi tee kulo Lobanga, oculu inyi okorif lo kito nenge taulo kuniyang, okorif na licira ojo “Abba, Apa”. ⁷ Tona ida isi irihe ira opi lo cik ati kito lo Lobanga, dong to rahun nino kito lohitirak Lobanga isi ara kalunyoni. ⁸ Afa orihe ite ida liyen Lobanga ira afa ite opihin kulo sangite kuna lida ara lobangahin. ⁹ Ati jijia dong liyen ite Lobanga kode lohiyen Lobanga ite, aja manyu iitoro ite iyo kunu tenyi tenyi igoroho? Iwak manyu ite rahun opihin kuneicieng ari? ¹⁰ Orihe ite itidwara kude faritin, kode ofahin kode karihin. ¹¹ Abang nan koditi ningi labuha manyu nan ajo lapapal nan golun nei diho ite. ¹² Alelia nan diho ite recera ajo itiri iya nan tonyio lari manyu nan iya ite. Oru lobo tohi lipal ite diho nan. ¹³ Iya na liyenare ite ara afa to mwai atitimare nan layomit na Ijir diho ite. ¹⁴ Kileng afa lara mwai nei tema diho ite, ida afa ite kitikaj kode kingal nan. Ati ifotu ite nan iya malaika lo Lobanga kode iya Kristo Yesu token nenge. ¹⁵ Nyio lonyia kwama lafa lingonore ite fad? Atenya nan lo kitisadena jimitan ngara afa itweruno ngiwolohosu ite konyieha kuningi kicio nan. ¹⁶ Labelo jijia nan ara meroni ningi to rihohino ite tenya lo dede? ¹⁷ Ongon kuna cio ko lairan lo kibelo ite ati to na irohoi ida ara to jiran. Tohi na lowak icieng inyi kora ite ko nan ojir ite ingonore lairan to icieng. ¹⁸ Ojir jia ngonun ko lairan kalara to tohi na ijir, manyu ojir iwasihi tik tik ida ara jimitan kalahingon nan ko ite keken ¹⁹ Tee kunei kuna lamaru, kuna ari langonore nan kiboria lo otomone many koloduhohino Kristo katwa lo taulo kuningi. ²⁰ Okodomo tau nei ojo ngara ahingon ko ite jijia ojir abel ogoro nei, tonyio apany nan koditi ningi bebe. ²¹ Kirihohiti ban an ite cio kuna liwak kijifita cik ida ite iyen tohi na loteny cik? ²² Tonyio igero ojo ongon afa Abraham ko tee kilahaji are, lobito kito lo ngorwani na lara opi, ara lobito kito lo ngorwani na lolanyu ken nenge. ²³ Ene kito lo na ngorwani lara opi, otomonuni to koditi lo cio ati kito lona ngorwani bito otomonuni to ciha na licio Lobanga. ²⁴ Kitum kifik ene tenya ara kitisirani, tonyio owoita kuno ngorwo to ciharu hin are. Ara ciharu lo lobito na lowoita to donge lo Sinai manyu otomon tee kuna lara opihin; Ara ene Agar. ²⁵ Owoita Agar itetema donge lo Sinai na longon kof lo Arabia na manyu litetema kang lo Jerusalem ene lo jijia, tonyio ongon inyi ko tee kunenge fad iyo opi. ²⁶ Ati Jerusalem na longon kai olaha manyu inyi lara iyang niyang. ²⁷ Tonyio igero ojo, “To kwama isi ngorwani na ikorif na lida itomon tee; Igore bebe ko wole na ikwat, Isi na lida imang kiboria lo otomone; Tonyio oborengi tee kulo ngorwani na locorahini ilany kulo ngorwani Na litongo ara lobit ko retoni ²⁸ Jijia ite, recera, iri ite iya Isaak, tee kulo ciha. ²⁹ To kunu faritin, olotu ene kito lotomonuni to koditi lo cio iciak kitigema ene kito lotomonuni to golun lo Okorif. Ori manyu ene tenya jii jijia. ³⁰ Ati ojo igeriti aja? Ojo, “ifuhe ene ngorwani lara opi ko kito nenge, tonyio ida ene kito lone ngorwani lara opi otum ngara ilunyiti ko kito lone ngorwani ilaha”. ³¹ Tona recera, ida ohoi kira tee kulo ngorwani na lara opi ati kulo ngorwani na ilaha.