¹ Thiya anjelo oithamiyethe ahutha amo nanyong, nang atehu ohilyep lonya oduo thohide dihap lo. Athuhi nya esarahina d’ohilyep ongayit l’amaji natti natehunerek obibile l’afangan dith’agulume nathulo amukok. ² Inyong angayo afirik n’agulume nathulo amukok; ara afuro aindu adi thal’afirik ne, iring afuro naindu thathah’emudet nahittok. Eloithoi oholong karik aloiri ara heriok th’afuro naindu tho firik h’ agulume nathulo amukok. ³ Thath’afuro aindu ama dihap, esarahini isong akolon iring n’othoni hothohp. ⁴ Athuhi nya anyahina isong thaang hoitharohojye ayani dia ohiyani loli, ti, arahari ohothing haang ethamijani n’ebahit n’amanini n’Ojok thohomongithek hosong. ⁵ Kabong ohorihini dosong eruhohina di tohoro ohothing hule, ti, ahorihini isong eruhohina n’ethagyemio nasong oyefathik miyet. Ojahitha de emalanga nasong n’adihari n’angorio n’ohithoni, ara langor othulo. ⁶ D’omiru hule, othifeyo de ohothing aye, ti, aang orimahini inyong. Owahi de isong aye bebe, ti, awangi de orimahini aye. ⁷ Ajahitha nya ama agodigodiho hathuhi ehuhumyo d’aremi. Dihosi hosong owoni nya asang hamok hayaa iring alohuluhi ayeli, karik hayaa iring ahomongithe h’ohothing. ⁸ Owoni nya h’ohofir hajahitha h’angorwo, karik ohala hosong ajahitha ohala h’oumeho. ⁹ Owoni isong nya hemuhetha h’asuhe hayaa iring emuhetha h’asude ebilat, ara ekor n’ewa hasong ajahitha ekor nasang hefihoitho agodigodihio ara hangetha dimaji h’aremi. ¹⁰ Owoni h’alisara hawoni h’outha hongryerek iring othoni. Dilisara hosong owoni h’akolo diryafyo ohothing oyefathik miyet. ¹¹ Owoni iring ohobu tholohide hosong, anjelo l’angulume nathulo amukok. Ofure lonyong th’ahuthuk thono Hebrei Abaddon karik th’ahuthuk thon’Ogriki Apollyon. ¹² Afiethahina ehethemoni, athuho. Idoro! Diholu h’etharohoja ne, opeceni arehai h’akaran hofuni. ¹³ Anjelo oithainde ahutha amo nanyong; nang ethairu oilolonge loindu th’omwaraha h’awanghat namojorik ayelithi nawon dihithemi h’Ojok. ¹⁴ ojyo d’anjelo oithainde lowon h’amo, “Ohohi anjelohio arangwan honya efithahini ditha h’Owor Lohittok Euphrates.” ¹⁵ Ehuhumyo nya anjelohio arangwan hule ahwandek, orii hule, ofaning le, Oyefa le, oyinga le ara haburahini dittohoro 1/3 n’ohothing. ¹⁶ Ohifala h’ohoremok haonya thohurongithek h’agodigodihio nya 200,000,000. Ethaningu nang ohifalai lya. ¹⁷ Oyihoi lya lengengeluna agodigodihio karik ohothing hongetha thosong. Emuhetha h’asuhe hasong nya adori ara ahimang, iriohi awoni ara ehwilirik karik abuletho iring sulfur. Ahosi h’agodgodihio ehelarai ahosi h’oumeho, ahibu ahimang, afuro karik sulfur odaha tholohuthuhye hosong. ¹⁸ Attohori nya 1/3 n’ohothing th’adihathik thohuna: ahimang. afuro karik sulfur hafuni thohuthuhie hosong. ¹⁹ Aca owon nya akolon n’agodigodihio dihuthuhie karik dilisara hosong – aca ojahithi nya alisara hasong amunuok, owoni h’ahosi hahonyahinerek isong asongosik d’ohothing ²⁰ Ohothing fodok honya apwahi, isong ohothing honya kabong adihathik hune hottohok, ohothing hokabong oburunu th’egyemathik hotho ahas hasong,ohothing hokabong ithawejyo amojo d’ohoilehio homonyong karik ajohi h’ayeli, ebindang abong, anaporong karik omorwong – asang haang otehu, ithaningu dia odaha. ²¹ Kabong dang oburunai d’attohyo nasong ohothing homok, adaha d’oiboniak, arwanga n’obusuha h’angorwo nepal dia ahoholio nasong.