¹ Thiya nang atehu anjelo loboling loko loindu dihap thohide. Ithayofo nya th’adiko, awon inya ethaurak tholohide h’ahu nanyong. Ojahitha nya ahomong nanyong oholong, ara ahejeha hanyong ajahitha asihothihio h’ahimanga. ² Indafaitho nya amanini naduhutho, nanya athuhi angayo dihinang honyong. Easarak aheju nanyong nenget dihide h’ahari nahittok, ara aheju no ihothong dihap. ³ Thiya ekor thomurut tholohwat iring oume. Ekor nanyong, ara ahilahio acama th’oilolongitha thohosong cofa. ⁴ Acama n’ahilahio, aindek nang egero, ti, ethaningu nang omurut thohide, ojyo, “Obaha th’ebahit than’amanini ainyong ojyori ahilahio cofa. Hoigerok dihap.” ⁵ Thiya anjelo latehu nang owetha dihide h’ahari nahittok karik dihap, adok ahinang nanyong nenget dihide. ⁶ Epitha tholomanya mak, tholoyeu ahide karik asang fodok hawon ditha honyong, tholoyeu ahap karik asang fodok hawon ditha honyong, tholoyeu ahari nahittok karik asang fodok hawon ditha honyong, ara anjelo ajyo, “Awang aning nalo ikarahina. ⁷ Ti, ara anjelo oithacofe laindu ihutha amo nanyong, oindu de amysterio n’Ojok ithuhohunu, iring nathuk inyong anyahinerek asayo angejuho d’ohocorok ohoigyemak honyong.” ⁸ Omurut lethaningu nang dihide, acama donang ikoti, “Ilo iyaru amanini naduhutho nathuk anga nawon dihinang h’anjelo lowetha dihide h’ahari nahittok karik dihap.” ⁹ Thiya nang alo d’anjelo, Nang anyahi inyong thoisarak nang amanini naduhutho natty. Ajyo donang, “Iyaru amanini naduhutho, ara iye inyo. Isarak de ahohe nahoi thodwara, ti, dihuthuk hohoi, olo de iyili iring aiso.” ¹⁰ Iduhu nang amanini natti naduhutho thohinang h’anjelo, nang anyaru. Ayil dihuthuk honang iring aiso, ti, athuhon hindang anyo, adwa ahohye hindang. ¹¹ Thiya othulo lobo ajyo donang, “Owah icoryo iye ikoti th’ohothing, th’amisok, th’ahuthuhye karik th’ohobwore thoholwa.”