¹ Esarahini nang nya apadongothi dithemyerek ahodori karik asuhon, anyahini nang, “Odothoi karik othemye Atemplo n’Ojok karik awanghat namojorik karik ara iye iheryo ohothing homojo diya. ² Ti, hoithemyo apar nothodak h’Atemplo, aca athuhi nya esarahina d’ohothing hoikela th’Ojudei, iryeryehini de abore nadwa d’oyefathik athomone arangwan larehai. ³ Esarak nang de akolon d’ohothing arehai hotehak nang acoryo iyofoi oputino d’operok 1,260.” ⁴ Ohotihak hundang hulya isong oyandik arehai h’olif, ewejitha arehai h’arye, hawetha dihithemi h’Ohobu l’ahap. ⁵ Ara lowak eryafuna isong, oindu ahimang thohuthuhye hosong, adiliro omerok hosong. Lowak eryafuna isong, ottohori de isong thoyihoi tholya. ⁶ Owoni ohotihak hulya h’akolon nehenohinerek isong ahde, daang ahide nasa d’operok h’ocoryerek isong. Owoni h’akolon neloyicyerek isong ahari ara ahotho, owoni h’akolon nabahyerek isong ahap th’adihathik iring owak isong. ⁷ Ara hathuhi anyahina arami hasong, oindu de oicang thath’angulume nathulo amukok diremorik isong. Oindu de iteluna, attoho isong. ⁸ Ofuni de ahwandek hasong ijyotho diyihoi h’abore nahittok (Nelongooi ara Sodom karik Egypto) amaji nanya obehohinerek Ohobu di kruce. ⁹ D’operok aunihoi ho tiibai, homok ohothing th’ohothing, th’amukok karik th’ahuthuk, afuni engengelyo ahwandek hasong. Aang de ofuni ihorihina isong thonuhahini. ¹⁰ Ofuni de ohothing homanya dihap imuno karik abalai thosong. Ofuni de dang ithangara esoritha thosong, anyo, ohocorok hulya arehai ethagyemye ohothing homanya dihap. ¹¹ Ti, diholu h’operok aunihoi ho tiibai, oindu de aloyiri th’Ojok ijingahina ditha hosong, awethi th’ahejek thahasong. Oindu de abangi nahittok idohina d’ohothing hotehu isong. ¹² Thiya ofuni de ithairuna omurut lohwat thohide ojyo dosong, “Ifuna dihide dini!” Thiya isong afuni ifwan dihide ditha hadiko ahibu omerok hosong ingengelyo. ¹³ Th’orii le, oindu de arithirithi nahap iwonan, ara 1/10 loyirik l’abore atuyama. Ofuni de ittohoro ohothing alif cofa ditha h’ arithirithi, ara hoburunu afunni ibangi, esarahini abolori d’Ojok dihide. ¹⁴ Afietha etharehe alang. Idoro! Afietha ethaunihoi naindu kwak. ¹⁵ Thiya anjelo oithacofe ahutha amo nanyong, omutto hohwat acama dihide karik ajyori, “Athuk ohobye l’ahap eloyitho ara ohobye l’Ohobu lohothai karik lo Kristo lonyong, loindu de indafaitho mak.” ¹⁶ Thiya ohobolok athomone arehai larangwan, howni dikani hosong dihithemi h’Ojok apwaharu ahomongithek hasong adihap, amojoi Ojok. ¹⁷ Ajyori, “Ifurak ohoi iye ahinwarang, iye Ohobu, Ojok, Lamolo, lowon karik lonya owon, anyo, ethuk iye eyaru akolon nahoi ara iye iculuyo endafaitho. ¹⁸ Ethangerejye nya amisok, ti, athuk engere nahoi ainduna. Athuk orii ainduna lokanyerek ohoyak; aca ethuk iye esoryo ohocorok ohoigyemak hohoi, ohothing h’Ojok hodwa, ohothing hobang ofure lohoi, obami karik ohothing hoko. Aindu orii lethorohojerek iye ohothing hoithorohojyo ahap.” ¹⁹ Thiya, angaye nya Atemplo n’Ojok nothohide, atehuni aroko n’eruhon nanyong ditha Atemplo nayong. Awoni nya: emedehitha n’ahide, ahila, ethir, apeyo n’ahila, arithirithi n’ahap karik ahide n’ofalanga.