¹ Anagayo nya n’anjelo ebahit n’amanini ethacofe, awon nya adularu dihiji h’omiru di paradiso. ² Thiya nang atehu anjelohio cofa owethi dihithemi h’Ojok, ethafothohini dosong amoni cofa. ³ Anjelo lobo, lendafaitho atafu ayelithi n’alothogong, aindu, awetha dipogo h’awanghat namojorik. Isarahini nya donyong alothogong ara nalwa, domojorik inyong omojitha h’ohothing h’Ojok hodwa dihide h’awanghat nalothogo ayelithi namojorik dihithemi h’okara. ⁴ Afuro n’alothogong – thomojitha thoh’ohothing h’Ojok hodwa – adotho dihide dihithemi h’Ojok tho hinang h’anjelo. ⁵ Anjelo eduhu atafu n’alothogong ethafuthak th’ahimang than’eduhuni tho wanghat h’ehuma. Thiya, acohok inyong adihap dihap; awoni nya diya ethasahitha h’emedek, h’ethir, apeyo n’ahide karik arithirithi n’ahap. ⁶ Ara nya anjelohio cofa howoni h’amoni cofa, arai ahutha. ⁷ Ara anjelo ohoithemoni ahutha amo nanyong; awon nya emamaja h’ahimang neharwo h’ahotho. Amirohini nya adihap dihap, 1/3 amuda, 1/3 n’oyandik amuda, karik ara amiyang ethaja fodok ediya. ⁸ Ara anjelo oitharehe ahutha amo nanyong, ara aning nabo najahitha odonge lohittok awulo ara ahimang, amirohini ditha h’ahari nahittok. Ara 1/3 n’ahari nahittok, awon ara ahotho. ⁹ Ara i/3 n’asang hayeuni ara hamijo dith’ahari nahittok, ayethi; karik ara 1/3 n’arokoni etharohojai. ¹⁰ Ara anjelo oithaunihoi ahutha amo nanyong, ara ohilyep lohittok lo adou thohide, awulo iring ahirya n’ahimang, dihide 1/3 n’owori karik ologuguduthi h’ahari ¹¹ Ofure l’ohilyep lya lara Ohithurwothi. Ara 1/3 n’ahari awon ara ohithurwo, ara ohothing holwa ayetha th’ahari heloitho ara hadwa. ¹² Ara anjelo oitharangwane ahutha amo nanyong, ara 1/3 n’oholong, n’oyefa karik n’ohilyefi abahai. Ara 1/3 nasong eloitho ara amoli, 1/3 n’ofaning karik n’aharie, awoni kwong afangan. ¹³ Engengelu nang, nang atehu okobu, owa tholohosi, ahibu inyong ilolongo omurut dihide, “Ara afuro, ara afuro, ara afur, d’ohothing hoisuka dihap, anyo, th’afwada than’amoni aunihoi hafithoro, haindek anjelohio aunihoi ahutha.”