¹ Thiya, atehu nang dinget holowoni dikara amanini naduhutho dihomong karik diholu, ara naba thebahitha cofa h’ethaithitha h’eruhon. ² Atehu nang anjelo loko onyahi th’omurut tholohwat, “Ngai osiru dingayo amanini naduhutho karik oboryo ebahitha h’ethaithitha h’eruhonina?” ³ Aang lobo thohide, thohop dia tholohop hah’ahap locohi angayo dia ehenio amanini naduhutho. ⁴ Ekor nang bebe, anyo, kaang orimahini othulo locohi angayo dia ehenio amanini naduhutho. ⁵ Ti, lobo th’ohobolok ajyo donang, “Hoikor, Idoro! Athuk Oume l’amukok no Juda, Ohode lo Davide, ateluna. Ocohi donyong dingayo amanini naduhutho karik ebahitha hethaithitha cofa heruhuna.” ⁶ Atehu nang oker owetha dihiji h’amaji n’okara karik ditha asang arangwan hamijyo hayeuni hune karik ditha ohobolok. Omijyo, ajahitha lathuhi ottohoro. Owon h; omwaraha cofa karik ahonde cofa, hawoni ara ohoilehio cofa h’Ojok hosuluni dihap fodok. ⁷ Alo, alo iduhuna amanini naduhutho thoinget holowoni di kara. ⁸ Eduhuna nanyong amanini naduhutho, asang arangwan hayeuni hamijyo huna karik ohobolok athomone arehai larangwan apwaharai dihap dihithemi h’oker. Isong bukulung abok abok, owoni haning nabahye didolorik oyendok karik atafu ayel angenge n’amorwong bee diya, hawoni ara omojitha h’ohothing hodwa h’Ojok. ⁹ Isong edolo oyele ongejuk, “Osiru dohoi diduhuna amanini naduhutho karik dingayo ebahitha hethaithitha h’eruhon. Aca athuhi iye nya angocyo; th’ahotho thanahoi, enyangu iye nya ohothing ara h’Ojok th’amukoko, th’ahuthuhye, th’ohothing karik amiji. ¹⁰ Ehuhumak iye isong ara ohobye karik ara ho fadiri digyema d’Ojok lohothai karik ofuni de indafaitho dihap. ¹¹ Thiya, nang engengelyo; nagng ethairu oilolonge l’anjelohio olwarai hoikolyo okara, asang hayeuni hamijo karik ohobolok. Ohifala hosong bukulung nya alif tomon h’alif tomon karik alif tomon h’alif tomon. ¹² Ajyori isong thoilolonge tholohwat, “Osiru Oker, lathuhi angocyo, difothuna akolon, abara, elofioro, athuthulya, ethahabuyo, abolori karik efufurio.” ¹³ Ethaningu nang asang fodok hayeuni hawoni dihide, dihap karik tholohop h’ahap, dihide h’ahari nahittok – asang hawoni ditha hosong – ojyori, “Do Lowoni dikara karik d’Oker, efufurio, ethahabuyo, abolori karik endafaitho, thoiwona mak.” ¹⁴ Asang arangwan hamijo, hayeuni, ajyori, “Amen.” Ohobolok apwaharu dihap, amojyo donyong.