¹ Engengelyo nang orii lobucyereo Oker ebahit n’amanini aboithe thocofa; nang ethaningu anging aboithe th’asang hamijo arangwa hayeuni thoilolonge tholobahyo iring ahila, “Iwong!” ² Nang engengelu, owon nya diya agodigodi abong. Nang atehu othulo longetha th’agodigodi, indafaitho atang. Esarahini nya inyong alohuluk. Oindu nya iring othulo lathuk ateluna diteluna. ³ Angayo n’Oker ebahit n’amanini etharehe, ethaningu nang aning etharehe namijo nayeuni, ajaran, “Iwong!” ⁴ Thiya, agodigodi etharehe aindu dindak – adoran nanyong nawulo iring ahimang - ahorihini d’othulo longetha thonyong theyaru elik adi thohop, dongocyo ohothing honyong ohothing homok. ⁵ Angayo n’Oker ebahit n’amanini ethaunihoi, ethairu nang aning nayeuni ara namijo ethaunihoi, ajaran, “Iwong!”Nang atehu agodigodi aomoli karik othulo longetha thonyong indafaitho dihinang honyong ethemit n’auhan. ⁶ Nang ethaningu oling lojak oilolonge lasang arangwang hayeuni ara hamijo, ojyo, “Athemit oboithe n’odyeri, th’ojine aboithe; ara ethemitha aunihio h’osingo, th’ojine aboithe. Ti, hoiryafu elethang karik obalu.” ⁷ Angayo n’Oker ebahit n’amanini etharngwane, ethairu nang oilolonge oitharangwane l’asang hayeuni ara hamijo, ojyo, “Iwong!” ⁸ Nang atehu agodigodi naborya. Ilongoi othulo longetha thonyong Aye, ahibu (Hades?) othifoitho inyong. Esarahini dosong ¼ n’akolon n’endafaitho n’ahap, attohio th’odemi, th’ahure karik ecangi h’afara h’ahap. ⁹ Ajara Oker angayo ebahit n’amanini ethamiyethi, atehu nang tholohop h’awanghat nehumarik ohoilehio h’ohothing hatohori th’ocame thol’Ojok karik anyahina dindak ocame loindafaitho isong lya. ¹⁰ Ikori isong, omurut dihide, “Omiru baya, Ohoindefani l’ohothing bukulung, lodwa, ladiri, kanu de ikanyo iye ohothing homanya dihap karik kanu de irofu iye ahaotho nahoi?” ¹¹ Thiya esarahini isong abok abok abongo abong, anyahini isong thoihtilaw omiru tiibai lwai ohoigyemak karik olarok hosong hatohori, iring nathuhorik isong atohoro, lwai isong athuba. ¹² Tiya, Oker angayo ebahit n’amanini ethainde. Engengelyo nang, owon nya diya arithirithi n’ahap. Eriok nya oholong iring abongo eefufusyerek karik Oyefa ado iring ahotho. ¹³ Ohilyefi hotho hide adouna dihap iring nethadohinerek ohiyani ahayo hanyong hokabong hongidari, ara ahomwa nako nabwanio. ¹⁴ Ahide alitho, iring amanini naduhutho, ethothororo karik alithororo. Odongiok karik afifina, ethahuthohini adi thomasok hosong. ¹⁵ Thiya, ohobwore h’ahap, ohothing hahong, hahong h’ohoremok, ohobarak, ohothing howoni h’akolon nendafaitho ohothing karik ahap, karik ohothing homok iring ongaciani, karik ohothing hoisuka iring owahi isong, edimai nya dilomi ditha omorik h’odongiok. ¹⁶ Ajyori isong d’odongiok karik d’omorik, “Opwahunethek dihide hohoi! Idimahina ohoi adi thohomong hono le, lowoni di kara karik th’engere n’Oker. ¹⁷ Aca, athuk ofaning l’engere nasong ainduna. Ngai ocohi awetha hosong?”