¹ “D’anjelo l’ekklesia no Sardis, igerok: ‘Ocamitha honyong loindafaitho ohoilehio cofa h’Ojok karik ohilyefi cofa, “Atek nang egyemathik hahoi. Iwon iye h’ofure lojyo imijyo iye, ti, eye iye. ² Odothoi thahide ara iye ithakolyo aning nohofithoro, ti, aindek aye, anyo, kabong nang arimak egyemathik hohoi hathuho dihithemi h’Ojok hindang. ³ Hoikworo, do ti, aning nethuk iye efothuna karik ethairuna. Iruho arami hanyong, ara iye iburun. Ti, ara aang iye ihenyu, aindu nang de iring ohoholani; aang iye de itek omiru honi aindu nang iindehai dohoi. ⁴ Ti, iwon iye h’ofuretho tiibai di Sardis hokabong ithabocyo abongoitho hasong; ofuni de idaha honang ara hoiyofo abongoitho abongi, aca, osiruni isong. ⁵ Oindu de lotelu ithayofo th’abongoitho abongi; aang nang aindu ifufusuna ofure lonyong thath’Amanini n’Esu; aindu nang de anyahi ofure lonyong da Lalamonye, dihithemi h’anjelohio honyong. ⁶ Lowon h’ehiyok, thoithairye ainyong ocama ohoilehio d’ekklesiahio.’” ⁷ “D’anjelo l’ekklesia no Philedelphia, igerok: ‘Ocamitha holodwa karik ladiri – indafaitho inyong lo ongaitha ho Davide; ongayo inyong lo, aang othulo lehyenok, inyong ehyenok, aang othulo longayo. ⁸ “’Atek nang egyematha hahoi. Idoro, athuk nang esarahina dihithemi hohoi oyihet longa, laang othulo locohi ehenohina. Atek nang hijan iwon iye hakolon namutha, ti, eruhu iye ocame hindang; aang nang eda ofure lohoi. ⁹ Otiha! Esarak nang de ohothing ha Sinagogue no Sitan, ohothing hoilongo ahwandek ara Ojudei, ti, ikara Ojudei, odwalak, thofunu, arigongo dihap dihithemi h’ahejek hohoi, karik atehi hijan amuno nang iye. ¹⁰ Anyo ethuk iye endafaitho efahi hindang thadihhahina angongyo; aindu nang de dang iduhuna iye adi, d’omiru h’athemio naindu d’ahap fodok, d’ohothing hoisuka dihap. ¹¹ Nang laindu kwa. Indafaithe aning nawon hohoi rot, tek lobo aindu iyaru alohuluk nahoi; ¹² Aindu nang de isarahina othulo lotelu thoiwona ara oholothi la Templo n’Ojok hindang. Aang inyong oindu inden adi thothonyong, karik aindu nang de igerohina dihide honyong, ofure l’Ojok hindang, ofure l’abore n’Ojok hindang (Yerusalem angejuk, naindu dihap thohide th’Ojok hindang) ofure hindang ongejuk. ¹³ Lowon h’ehiyok, thoithairye ainyong ocama ohoilehio d’ekklesiahio.’” ¹⁴ “D’anjelo l’ekklesia no Laodicea, igerok: ‘Ocamitha h’Amen, othulo lenihini ahwan donyong, karik othulo ladiri latihak, ohoindefani l’ayeyo n’Ojok. ¹⁵ “Atek nang egyemathik hahoi, karik hijan aang iye ilik dia inok. awak nang iye kodien thonoha dia theliha! ¹⁶ Inyong na, anyo, aang iye inok dia aang iye ilik - Aindek nang iye aseuna adi thohuthuk honang. ¹⁷ Aca ijyo iye, Abara nang, awon nang hasang olwarai; aang nang awak aning nabo. Ti, aang iye itek hijan iyanga iye bebe, imyehunu iye, ican iye, ingodo iye karik idaha iye iluluyai. ¹⁸ Ithaningye d’alwahio hindang: Inyangu thonang ayel nathuk amuda, dibara iye, iyofoithe abongoitho abongi tuhudik, dimuhyerek iye ahwan, hoithaithak ajwuon nahu didaha iluluyai; ithalihye ahonde, ditehu iye. ¹⁹ Asaryo nang, nang ethaithak oyihoi lobis d’othulo lamuno nang. Inyong na, hoibala karik ara iye iburunu. ²⁰ Idoro, nang lawetha dipogo h’oyihet, ahibu nang ebabahyo. Ara ethaningu lobo omurut hindang angayo oyihet, nang ajinga de dihang ara ohoi inyong honyong karik inyong honang. ²¹ Ahorik nang de dang lotelu lo awoni honang dihap, dihide h’okara hindang, iring dang nathuk nang ateluna, nang awoni ha Lalamonye dihide h’okara lonyong. ²² Lowon h’ehiyok, thoithairye ainyong ojyo Ohoile d’ekklesiahio.”