¹ Aboithe th’anjelohio cofa, lonya indafaitho atafu ethacofe lo, aindu ajyo donang, “Iwong, ethaithak nang iye de edara n’amwak nahittok nawoni dihide h’ahari halwa, ² inyong nanya athuk ohobusi h’ahap esukarik th’epal. Th’obalu tholoisukarik inyong th’epal, ebotho ohothing hothohop narithin. ³ Thiya, anjelo eyaru nang adi ditha h’Ohoile ditha oduyaru; nang atehu athulo nangorwo owoni dihide hoicang odoru loifut ara ofuretho h’amoro. Owon nya oicang lya h’ahosi cofa karik omwaraha tomon. ⁴ Iyofo nya athulo ne abongo anaporong karik adoru, ethaliborye th’ayel, th’omorik thoholibo karik th’onyahwo. Indafaitho nya inyong na th’ahinang oihutye oyel, bee h’asang hamonyori karik hebot heleru nanyong. ⁵ Dihomong honyong igero ofure: amisterio, “Babylonia nahittok, ahathingi n’amwahi karik n’asang abomonyorok hothohop.” ⁶ Atehu nang athulo ne ara nebotho th’ahotho thon’ohothing hodwa h’Ojok karik omartirehio ho Yesu. Atehuna hindang inyong, afalanga nang bebe. ⁷ Anjelo ajyo donang, “Anyo ifalanga iye? Enyanyahak nang de iye amysterio n’athulo ne karik oicang loiyaitho inyong lya; oicang lowon h’ahosi cofa h’omwaraha tomon. ⁸ Oicang letehu iye lya, owon nya; awang ti thenene, karik aindek ainduna thath’agulume naang amukok. Thiya oindu de inden dithorohojyo. Ohothing homanya dihap, ohothing hokabong ofuretho hosong igero dith’amanini n’esu gee thorimahina h’ahap, ofuni de italuho ara hatehu oicang, anyo, owon nya, awang thenene, ti, oindu de. ⁹ Ithayuhi ne ahu nawon h’olofioro, Ahosi cofa, isong adongiok cofa hawoniarik athulo ne hune. ¹⁰ Owoni dang ohobusi cofa. Apwaharu ohobusi miyet, owon aboithe, karik kabong lobo hoindu; ara laindu, oindu de isuka orii tiibai. ¹¹ Oicang lonya owon, oicang laang, ti, inyong lo ohobu oithatisethe. Owon inyong lo ara locofa karik lolo d’etharohoja nanyong. ¹² Omwaraha tomon hoitehu iye hulya, isong ohobusi tomon hokabong hoifothu ohobye, ti, ifothuni de akolon iring ohobusi d’orii aboithe, amaji aboithe hoicang. ¹³ Isong hulo h’ahu aboithe, eesarahini akolon karik endafaitho nasong ahap d’oicang. ¹⁴ Oremorik de isong Oker. Ti, obak de isong Oker, anyo, inyong lo, Ohobu l’ohobusi. Ohothing howon honyong, ilongoi ara ahinyomo karik ohoiruhok.” ¹⁵ Ara anjelo ajyo donang, “Ahari hetehu iye hune, isong amaji nawonierik amwak: ohothing, elulung n’ohothing, amisok karik ahuthuhye. ¹⁶ Omwaraha tomon hoitehu iye hulya, isong karik oicang, ofuni de imanan amwak. Ofuni de isarahina inyong thoisurithai, ahohini inyong iluluyai; ofuni de idiloro ahiringo nanyong, amudye inyong th’ahimang fodok adi. ¹⁷ Aca athuk Ojok esarahina dithaja hosong thoihandye asang hawak inyong. Theruhohina thanasong esarahina akolon dindafaitherek oicang lwai ocamitha h’Ojok ehandyo. ¹⁸ Athulo netehu iye ne, inyong abore nahittok nawon h’akolon nendafaitherek ohobusi h’ahap.