¹ Ethaningu nang omurut lohwat ilongo tho Templo, ajyo d’anjelohio cofa, “Ifwatha, ara ithai ibuhok dihap atafuna cofa h’engere n’Ojok.” ² Ara anjelo ohoithemoni alo, abuhok atafu nanyong dihap; ara adihathik hamonyong, hadiha afuni d’ohothing howni h’ethaithitha h’oicang, ohothing homjo d’arijori nanyong. ³ Ara anjelo oithharehe abuhok atafu nanyong dith’ahari nahittok. Eloyitho ara ahotho, iring ahotho n’othulo lathuk aye. Ara asang hamijo dihap fodok ayethi ⁴ Ara anjelo oithaunihoi abuhok atafu nanyong ditha owori karik awori h’ahari, eloyithoi ara ahotho. ⁵ Nang ethaningu anjelo l’ahariak, ojyo, “Ibis iye, iye lowon, iye lonya owon, iye Aboithe Lodwa – anyo, ethuk iye akanyo asang hune. ⁶ Anyo athuhi isong abuhohina adi ahotho n’ohothing hodwa karik n’ohocorok h’Ojok, ethuk iye easarahina isong thomahtai ahotho, anyo, osiru dosong.” ⁷ Ethairu nang awanghat etharangyo, “Aa, Hobu, Ojok, Lamolo, okanyitha hohoi, owoni ara hadiri karik obisi.” ⁸ Ara anjelo oitharangwane abuhok atafu nanyong ditha oholong, ahorohini to omudye ohothing th’ahimang. ⁹ Amudyo isong anohong namonyong bebe; omorye ofure l’Ojok, lowon h’akolon dihide h’adihathik huna. Kabong isong oburunu karik kabong isarahini inyong abolori. ¹⁰ Thiya anjelo oithamiyethi abuhok atafu nanyong dihide h’okara l’oicang, ara omudwe emuhok ohobye. Isong anyahalyo ongadyefa hosong th’adihari. ¹¹ Amoryo isong Ojok l’ahide th’adiha karik th’asongosik thahasong; karik hohoida aburunu th’egyemathik thahasong. ¹² Ara anjelo oithainde abuhok atafu nanyong ditha h’owor lohittok, Euphrates. Ahari ayohojoro dihuhumyerek oyihoi d’ohobusi hofuni de tholo moithe. ¹³ Nang atehu ohoilehio hoibot aunihoi, hojahitha adwadwak, ofuni thohuthk hoicang loithathalik ayaa, karik lobo th’ohocorok haang ara hadiri. ¹⁴ Aca isong hulo ohoilehio ho sitan hoihandyo ethaithitha hafalangai. Ofwoi nya isong d’ohobusi h’ahap fodok disuduhyo isong amaji aboithe dingalafa d’ofaning lohittok l’Ojok Lamolo. ¹⁵ (“Idoro! Nang laindu de iring ohoholani, loiriryo ahibu inyong omijo, loindafaitho abongoitho tuhudik tek inyong adaha iluluyai, daang otehuni omiru h’ajwuon n’ahosi, thomunoi.”) ¹⁶ Iyanu isong isong amaji aboithe d’amaji nelongo Ohoibrei ara Armageddon. ¹⁷ Thiya, anjelo oithacofe abuhok atafu nanyong dith’aloiri. Thiya omurut lohwat aindu tho Templo, karik th’okara, ajyo, “Athuhi ehandyo!” ¹⁸ Awoni nya ongadyefa h’ahimang nawulo, ethirr, apeyo n’ahila karik arithirithi namonyong - arithirithi n’ahap nakalu nabo nathuk afuhon ge ohothing awonan dihap; abolo nya nabo arithirithi nahap iring na! ¹⁹ Ebwa nya abore nahittok aunihoi, ara abottok h’amisok apwaharu. Thiya Ojok eyuu Babylonia nahittok, esarak d’abore nya oihutye bee h’obalu, loihuhumunu th’engere nanyong nethalongojyo. ²⁰ Ahap nafithoro dihiji h’ahari karik odongiok alithoi. ²¹ Ara ofalanga h’ohuju, houk bebe, afuni dihap thohide, dihide h’ohothing, ohothing afecye Ojok d’adiha n’ofalanga h’ohuju, nanya omonyong bebe.