¹ Thiya, nang atehu ethaithit nabo dihide, nahittok, aliboroni. Owoni nya diya anjelohio cofa karik adihathik cofa. Thosong, oindu de engere n’Ojok ithuba. ² Nang atehu aning nayaa iring ahari nahittok n’engengelit neharwo h’ahimang. Owethi nya iindehai d’ahari nahittok, ohothing honya atelu oicang, arijori nanyong karik ohifalai lowetha dimaji h’ofure lonyong; indafaithe nya isong athafedehi hesarak Ojok dosong. ³ Idoloi nya isong oyele lo Musa, ohoigyemani l’Ojok karik edoloi oyele l’Oker: “Obolori, alibori nya bebe egyemathik hahoi, Hobu, Ojok, Lamolo. Obisi, awoni nya ara hadiri oyihothik hohoi, Hobu l’amisok. ⁴ Ngai de laang iye obang, Hobu, karik aang ithaboloryo ofure lohoi? Aca iye hamaring ledwa, Ofuni de amisok fodok imojo dihithemi hohoi, anyo, athuhi ethalyehina egyemathik hahoi habis.” ⁵ Diholu h’asang hune, engengelu nang Atemplo n’atabernakulo n’atihahina onga dihide. ⁶ Ara nya anjelohio cofa hoindafaitho adihathik cofa hulo ajinguni adi tho Templo. Iyofoi isong hulo nya abongoitho halibo, athorai thosuhena hosong thokerebusehio thah’abongo hottik oyeli. ⁷ Aboithe th’asang hayeuni ara hamijo, esarahini d’anjelohio cofa atafuna cofa bee h’engere n’Ojok, lomanya mak. ⁸ Efut nya Atemplo top ara afuro th’abolori n’Ojok karik th’akolon nanyong. Aang nya othulo locohi ajingara ditha honyong, tok adihathik cofa h’anjelohio cofa engahunu.