¹ Diholu h’asang hune, atehu nang anjelo loboling oindu dihap thohide. Owon h’akolon n’endafaitho nahittok, karik ahap ethaulo th’abolori thananyong. ² Ekor thomurut tholobolo hijan, “Apwaharu, apwaharu Babylonia nahittok! Esuka ara amaji nesukarik ohoilehio homonyong, efithet n’ohoile loibot, efithet n’ahwenyi nebot karik efithet necang nebot karik nedari. ³ Athuhi amisok bukulung ebotho obalu lawahan eleru nanyong. Athuhi ohobusi eyauna esuka honyong n’eleru. Abarai ohoithanyangak karik ohoinyangak hothohop th’akolon thanamuno nanyong esuka nahwan.” ⁴ Thiya, nang aningu omurut loboling thohide ojyo, “Ifuna adi thonyong, ohothing hundang, daang ithai ingara ditha eyatha hanyong karik daang ithai irimak nabo th’adihathik hanyong. ⁵ Ethuha eyatha hanyong othinuni ahide; eyuu Ojok egyemathik hanyonng amonyorok; ⁶ odumahina inyong adi, iring nathuk inyong adumahinerek homok adi; odumahina inyong operok arehai d’eyatha hanyong. ditha h’oihutye lekukuryo inyong, ikukuryethe aduma nanyong operok arehai ⁷ Iring ithaboloryo inyong ahwan nanyong karik awa ditha habara, ithathacianiethek inyong th’abahio karik athariha. Aca, ojyo inyong dithaji honyong, “Ethawonihini nang iring ahabu; ikara nang aharathani karik aang nang de atehu ekor.’ ⁸ Iring na, ofuni de adihathik hanyong ifuna: aye, ekor karik ahure. Oindu de inyong ahimang ingohina, aca oko Ohobu Ojok karik inyong lo ohokanyani lonyong na.” ⁹ Ohobusi h’ahap heyau eleru honyong aang hoipapahunai, ofuni de ikor karik iwuluhoi ara hatehuni afuro n’ahimang namudyo inyong adi. ¹⁰ Ofuni de iwetha olamarai, obangi n’ethagyemio nanyong, ajyori, “Ara afuro, ara afuro d’abore nahittok, Babylonia, abore akoloni! Aca d’orii aboithe, edwong abahio nahoi.” ¹¹ Ekori karik atharihai ohoithanyangak karik ohoinyangak hothohop, anyo, aang othulo loinyanga attitto hasong – ¹² ayel, ebindang abong neyelehe, omorik hoko, onyahwo, abongo narere, anaporong, naborya karik adoru, opeceni fodok h’ahithoi nangwo kudarr, attitto hehuhumuni th’ohala h’othome, th’ahiyek, ebindang anaporong, ebindang nako, amotong karik orojo hoikongerek, ¹³ aboro hekongyerek karik hadwanye d’agorom, ahayo haswahyo ahuthuk, alothogong, angenge n’aborwong, amiyang karik abene hangwa kudarr, obalu, elethang, ahifa henyundi, ahifa henatha angiryang nasong, ahisuum, akero, agodigodihio, asang hethothorye dia hefihoithe helengaitherek attitto karik ahwandek h’ohoilehio h’ohothing. ¹⁴ Ahayocong newak iye th’akolon thanahoi fodok, athuk aden fodok adi thohoi. Awa ditha habara fodok karik abolori nahoi, athuhi alitho, aang hoinyahi arimahini d’amaji nabo ikoti. ¹⁵ Ohoithanyangak karik ohoinyangak hattitto hune karik abarai thonyong, ofuni de iwetha olamarai thonyong na, th’abangi than’ethagyemio, than’ekor karik th’ewuluhoitho thananyong th’ahwathan thon’omurut. ¹⁶ Ofuni de ijaran, “Ara afuro, ara afuro d’abore nahittok, nethayofo th’abongo thanarere, anaprong, adoru karik ethaliboro th’ayel, ofaho karik anyahwo hako bebe! ¹⁷ Ditha orii aboithe ahani, etharohoja abara ne bukulung adi.” Lahong l’aroko, ohoithanyangani l’amanini n’aroko, ohoigyemak di roko karik ohothing fodok horimak esu nasong th’ahari nahittok, awethi olamarai ¹⁸ Ekori, atehuna nasong afuro n’amoda nanyong. Isong ajyori, “Nani abore najahitha abore nahittok?” ¹⁹ Afurahini atur dihosi hosong, ekori, eluluwoi, atharihai, “Ara afuro, ara afuro d’abore nahittok, nawonderek ohothing bukulung howoni ha arokoni d’ahari nahittok abarai th’asama thananyong. Aca, d’orii aboithe ti, etharohoja inyong na fodok fodok karik akar.” ²⁰ “Omunothik thonyong, ahide, ithai ohothing hodwa, ohoifahak karik ohocorok, aca athuk Ojok eyanu akanyo nanyong dihide honyong!” ²¹ Ara anjelo lohittok eduhu omorwong, lohittok iring lereyerek, amirok dith’ahari nahittok, ajyo, “Thoyihoi tholo, Babylonia, abore nahittok, ofuni de imirohina dihap th’eribo, aang ofuni itehunerek inyong koti. ²² Ethaninguna nehandyo ohobahak h’athafedek karik ohoidolok, ohohuthak h’afakile karik ohohuthak h’amo, aang hofuni ithaninguna koti ditha hohoi. Aang hofuni ithaninguna ekor nahirie ditha hohoi. ²³ Aang afangan n’ahiriyai oindu iwulo ditha hohoi ikoti. Omutto h’ohomuthani karik h’athulo namuthaye ofuni ithayiruna ditha hohoi, aca awoni nya ohoithanyangak karik ohoinyangak hohoi ara olonyirok h’ahap ara amisok nya ethadwalye thoiboniak thohohoi. ²⁴ Ditha honyong arimahini ahotho n’ohocorok karik n’ohothing hodwa h’Ojok karik ahotho n’ohothing bukulung honya athuhi attohoro dihap.”