¹ D'awangan n'eriringa ahohi ohothai Kristo. Owethathik ara hoko. Hoinyahara ikoti d'eriringa l'elangaca. ² Otihatha, nang Paulo lacama dothai hijan, ara ihorik ithai ahwandek hathai thongocye, awang oyihoi lerimahinerek ithai ayiji nabo tho Kristo. ³ Enyoryo nang ikoti anyahina d'ohothing abok abok hijan loisarak ahwan nanyong thongocye, thaang hoijara iringahini inyong dithifoitho oyalu. ⁴ Atufuni ithai adi tho Kristo, Ithai hoira oyano ithabisahina, atufunu ithai adi tho Kristo; awang ithai ipil alwahio n'Ojok. ⁵ Inyong nara, thol'Ohoile Lodwa karik th'eruk, hethilauna th'amuno eyiihina n'abisan. ⁶ Ditha ho Kristo Yesu, awang dia angotho dia awangan n'angotho ohwadu aning nabo, ti, eruk hamaring igyema th'amuno. ⁷ Ithai hoingeta tuhudi. Ngai olwo ithai eruhon arami hadiri? ⁸ Awang ewuwulahina ne hoindu thonyong, inyong lelongo ithai lo! ⁹ Omundo tiibai iring hulya, ihadocye anyari nelolonga. ¹⁰ Awon nang hayenio d'Ohobu hijan awang ithai de iwon hegigilitha hekela. Othulo lethathacanio ithai, oduma de obafu lonyong, dia inyong ngai. ¹¹ Olarok, ara diri hawak nang angotho, anyo bai hoithathacyanie nang? Ara ahani, athuhi eduhuna adi ahibose nakara dihithemi h'akruce na. ¹² Iring d'ohothing hoithathacyanio ithai hulya, ara thono hindang, ajo nang kodien irahi isahyo ahwandek hasong! ¹³ Ahohini ithai adi thoifitha, olarok. Ti, hoiduhuna oisuket lawang eriringa thiya lya ara leyaunerek; kombwo, th'amuno olwahathik ahwandek. ¹⁴ Anyo, oyalu fodok lothifoithe ditha hefahit aboithe: ditha "Omunoi othulo loindek hohoi, iring nemunorik iye ahwan nahoi." ¹⁵ Ti, ara ihonya ithai, ithai idilyo ahwandek, omijethe tuhudi hijan kabong ithai ingohi ahwandek th'anyo. ¹⁶ Ti ajo nang, odahathik ditha h'Ohoile Lodwa, dang ithai imanya ditha eyatha. ¹⁷ Awang omanyitha ditha h'eyatha hofwo h'Ohoile Lodwa, awahan n'Ohoile Lodwa dang awang holo homanyitha h' eyau. Ongicya isong huna, d'aang ithai ihandyo asang hewak ithai. ¹⁸ Ti, Ara ithifoitho ithai Ohoile Lodwa, awang ithai lolohop h'oyalu. ¹⁹ Inyong na, oleyori beriena omanyitha h'eyauna: arwanga n'obusuha h'angorwo nawang obis, ebothan n'esukaitha, elamwak, ²⁰ eruhon d'ojohothihio karik oibwana, ahayini, engere kwong arami, antica dia elangare, amukuta, ebwabwa, ²¹ akolyohunu, ebotho n'obalu, elulung n'engere karik asang fodok haya ahani. Ethahongok nang ithai, iring nathuhorik nang ithai ethahongohina berien, hijan ohothing homanya th'oyihothik thohulya awang horuthuni ohobye l'Ojok. ²² Ti, ahayocong n'Ohoile inyong amuno, elik n'othaji karik ahohe, angongio, amujan, ayiji, eruk, ²³ anyofodia karik eyohuna n' ahwan; awang oyalu loliwarik asang hune. ²⁴ Athuk ohothing howon ara ho Kristo Yesu abehohina di kruce omanyit l'eyatha h'asang hawak omanyitha h'eyauna. ²⁵ Ara emanya th'Ohoile, hadahathi dang th'Ohoile. ²⁶ Ohothai thaang h'eloyitho, edodolyo karik ehayiin amonye.