¹ Olarok, ara indefuni othulo diyauna, ira ithai homok h'Ohoile hulya inyahahina inyong dinyofodia h'ayiji. Ithai thobanga ahwandek hathai, tek ithai dang athemye. ² Ongarathik emorwa nathai. Inyong oyihoi lya lethifoitherek ithai Kristo. ³ Inyong nara, ara igigilo othulo loboling hijan inyong aning nabo ahibu inyong awang hara aning nabo, loditumyo ahwan ahwan nanyong. ⁴ Lobo th'otiha tuhudi egyema nanyong, dowon ahu n'ethadara nanyong donyong hamaring, ikara d'othulo tholobo. ⁵ Odohoitho de lobo othulo abafu lonyong holefeng. ⁶ Othulo letyenie ocame thongarai asang hayyu h'ohoityenani. ⁷ Hoisarahina ahwandek thoithadwalye. Awang Ojok hoithalubangahunu. Aning nedulak othulo, inyong de dang oindu ingongothuna. ⁸ Inyong nara othulo ledula ohinyomo d'oisukaitha honyong hoiyauerek oindu de ingongocyo ethorohoja. Loidula ohinyomo honyong d'Ohoile, oindu de irimahina esu n'amanya mak th'Ohoile. ⁹ Ahwandek hahothai th'aang hodihara ehandyo nayyu, anyo, th'omiru hocohi efunu mwai ingongoco, ara awang ohothai itela. ¹⁰ Inyong nara, hewon ohothai h'omiru, hehandyethe nayyu d'ohothing fodok, kereki d'ohothing h'ahang n'eruk. ¹¹ Ingengelyethe aisong amaninhio hahitwa hegero nang dothai th'ahinang thohindang. ¹² Ohothing howak anyahina isong hongai dihap dine isong howak ithai eringahina th'ongocye. Ihandye ahani, ikarahinerek ethathacana th'arami thah'akruce no Kristo. ¹³ Anyo, juk isong dang hathuk angotho hulya awang ogoterek oyalu, ti, owahi ithai thongocye donduhyo isong asuhena hijan ithai Ojudei. ¹⁴ Ti, awang nang kwong hayifyo ahwan arahari th'akruce thon'Ohobu Yesu Kristo. Thal'akruce than'athuhi abehohinerek ahap do nang, nang d'ahap. ¹⁵ Dia angoco dia awangan n'angotho, awang hoihandyo aning nabo, ti, ainyong nako bebe ayeuna angejuk. ¹⁶ D'ohothing fodok hoisuka th'oyihothik thohotek karik ohothing awak fodok, elik n'ahap karik n'ahwandek h'amehina thoiwona. Thoiwona dang do Israele n'Ojok. ¹⁷ Th'ahanana adihithemi, lobo othulo th'awang hoithathacanie nang, anyo, eyetho nang th'ahwan tho hindang ohoforo ho Yesu. ¹⁸ Alwahio n'Ohobu Lohothai Yesu Kristo thoiwona h'ohoile lothai, olarok. Amen.