¹ Adudufo no Galasians! Ngai elecyo ithai? Dihithemi hothai, ahibu ithai imijo ithaithahini Yesu Kristo iring labiho di kruce. ² Aning ne aboithe hawak nang eyeyna thothai.: Efothu ithai Ohoile Lodwa th'egyemathik thoh'oyano dia th'eruhon arami thehethairu ithai? ³ Idudufo ithai dia ainyong onyo ithai? Athuhon aculuyo th'Ohoile tholodwa, inyaha ithai ikoti d'ingohina esuka nathai th'eruhon asang hothohop? ⁴ Olo ethathaciana, nanya, eleng ithai ethathacanarik na ija - ara nya diri ija? ⁵ Ihandyo le, lonya isarak ithai Ohoile le karik ehandyo egyemathik hafalangai, ihandyo th'egyemathik thoh'oyano dia thethairio then'eruk? ⁶ Iring nanya "iruhohinerek Abramo ara ohobisani, th'eruhon thananyong d'Ojok," ⁷ ahani de dang, ithai thoteha d'orii le, ofuni ohothing h'eruk owoni ara okalifinok, akalifinok ho Abramo. ⁸ Amaninihio hadwa, dimijo ahithemi ojori hijan oindu de Ojok ithasiruna ohothing hekela th'Ojudei th'eruk, ecak anyahina Abramo th'ajaran, "Ditha hohoi ofuni de amisok imuno." ⁹ Iring na, omuno ohothing h'eruk h'Abramo, othulo l'eruk. ¹⁰ Ohothing fodok hoinihi ahwandek d'oyano ojahithi hafietha; inyong negerohinerek hijan, "Laang othifoitho asang fodok hathath'amaninihio h'oyano, awang hoihandyo, athuk afietha." ¹¹ Oleyo th'arami huwne hijan awang othulo lobo lobis dihithemi h'Ojok th'oyano, anyo, omanya de ohobisak th'eruk. ¹² Ti, oyalu ikara l'eruk, inyong lo, "Ohyani inyong lo hijan othulo lehandyo egyemathik h'oyalu thomanyai thosong." ¹³ Ithahoru ohothai Kristo th'ahafiethu n'oyalu th'ainduna thananyong ara ahafiethu dohothai - atha athuhi egeryo hijan, "Athuk ahafietha othulo loyihahini dihide h'ohiyani" ¹⁴ doindu kodien amuno n'Abramo d'ohothing hoikela th'Ojudei do Kristo Yesu, dara th'eruk era ifothuna kodien ecoritha h'Ohoile Lodwa. ¹⁵ Olarok, nang thocama iring nacamarik othulo. Ditha heruhon nara othulo ihuhumyo, awang othulo lesarak arakang dia lofonik aning nabo dia, ara athuk oyalu ehuhumahini ahanya. ¹⁶ Athuhi nya anyahina Abramo karik d'othulo loindu diholu honyong ecoritha. Awang hojo, "D'ohothing olwarai hofuni diholu honyong, ti, kombwo d'othulo aboithe loindu diholu hohoi," inyong Kristo. ¹⁷ Ainyong awak nang ajaran na: Oyalu loindu diholu hoingathik 430, awang hoisarak arakang eruk nanya athuk Ojok ehuhumahina. ¹⁸ Inyong nara ara aindu aruthahina th'oyalu, awang hoindu thol'ecorit. Ti, Ojok isarak d'Abramo th'ecorit. ¹⁹ Ara ahani, ara lainyong nya oyalu? Ofonihini inyong lo nya, anyo, dithihyo ethatharohoja, lwai othulo aboithe loindu diholu h'Abramo, lonya ihuhumahinerek ecorit lo. Igyema nya oyano thol'anjelohio th'ohoithamorani. ²⁰ Onyahi ohoithamorani hijan owoni ohothing olwarai, ti, Ojok aboithe. ²¹ Ara ahani, awang oyalu iruhohunu h'ecoritha h'Ojok? Ikara ahani pat! Ara nyana isarahini oyano hesarak esu, ira abisan induna th'oyano. ²² Ti, athuk amaninihio hadwa emumuduthahina asang fodok ditha h'eyau. Ihandyo Ojok ahani dofuni ecoritha hethalwahu ohothai th'eruk do Yeah Kristo d'ohothing hoiruk. ²³ Dihithemi hainduna n'eruk, ewon ohothai nya ara ohothing hoifitha th'oyalu, efitha nera ithilauna ethalyehina eruk. ²⁴ Awon nya oyalu ara ohoikiani lohothai lwai ainduna no Kristo, defuni isiruna th'eruk. ²⁵ Ti, athuk eruk nya ainduna, awang ohothai iwon dihinang h'ohoihekiani. ²⁶ Ewon ithai ara olonyirok h'Ojok th'eruk do Kristo Yesu. ²⁷ Iring nanya athuhorik holwa hothai efothunerek Batisimo ditho Kristo, ethuk ithai efothuna Kristo. ²⁸ Awang l'Ojudei dia l'Ogrik, awang ongaca, awang laang helangaca, awang nangorwo dia lobusuha. Ewon ithai fodok ara aboithe ditha ho Kristo Yesu. ²⁹ Ara ewon ithai ara ho Kristo, ewon ithai ara ohothing hofuni diholu h'Abramo karik ohoruthak honyong th'ecorit.