¹ Thiya, diholu h'opeok tomom larangwan , alo nang di Yerusalem, ohoi ho Barnaba, nang eyaru ho Tito. ² Alo nang diya, th'arami thah'ethalyehina karik disarahina dihithemi hosong evanjelio nanya elolongok nang d'ohothing hekela th'Ojudei. Acama nang arakang d'ohothing honya ojahithi hoko, Awak nang atehan tuhudi egyema hindang thaang holo ija. ³ Ti, ikara juk Tito hamaring, Ogrikthanani lonya owon ho nang, irignahini thongocye. ⁴ Ekuku olarok omonyorok dingengelaru karik dithayiraru oisuket lohoi loyyu ho Kristo Yesu. Owahi esuka nahoi ara ongacyani, ⁵ Ti, kabong ohoi iruhu arami hasong juk orii tiibai, d'odulo eladiri n'evanjelio hothai. ⁶ Ti, ohothing hojak hobolo hulya (dia isong nya ara hongai, awang ihandyo ainyong do nang, awang Ojok ithaithak ekela) - ohothing hule, ajo nang, kabong hofonihini aning nabo do nang. ⁷ Kombwo, atehuni athuhi nang esarahini amijo arami h'evanjelio th'ohothing thoho kabong hongocye. ⁸ Ara thol'Ojok, legyema ho Petro thefahaitho thon'ohifak d'ohothing hangacye, egyema dang inyong ho nang th'ohothing thoh'ekela th'Ojudei. ⁹ Atehan nya na Yakobo, Cefas karik Yoanne, honya atehi ara ohoduhok h'ekklesia,hijan esarahini nang alwahio, endafaitho isong hulo Barnaba karik nang dith'asuduhe n'ohifak. Ihandye isong hulo ahanya, difwo ohoi d'ohothing hekela th'Ojudei, hibu isong ofwo d'ohothing hangocye. ¹⁰ Owahi isong ohoi thawang hokworo ohoicanak, aning nanya awak nang ehandyo bebe. ¹¹ Ti, ainduna nya no Cefas di Antioko, eda nang dihithemi oisukaitha honyong anyo, owon ocame lojo inyong lo epal bebe. ¹² Dihithemi hafuna nya n'ohothing homok tho Yakobo, onyo nya Cefas h'ohothing hoikela th'Ojudei. Ti, afuna nya n'ohothing hulya, awang Cefas onyo karik esuka inyong lo olamarai th'ohothing hoikela th'Ojudei. ¹³ Karik dang, apwahahunu nya Ojudei d'ethatumio najak ahani. Juk Barnaba athiforo hosong oyihoi lepal l'adwala. ¹⁴ Ti, atehuna hindang nya oisukaitha hosong homonyo haang othifoitho eladiri n'evanjelio, acama nang do Cefas dihithemi honyong hijan, "ara iye l'Ojudei, ara iye isuka iring othulo lekela th'Ojudei, ikara l'Ojudei, angai iringak iye ohothing hekela th'Ojudei thoisukai ara Ojudei?" ¹⁵ Ohothai th'ahwandek, oisuni ohothai ara Ojudei. ikara ohothai ohothing ohoiyak ohothing hekela th'Ojudei; ¹⁶ Ti, etek hijan awang othulo lobis arami hanyong th'egyemathik thoh'oyalu hama, owak bebe th'eruk do Yesu Kristo. Efunu ohothai dang d'eruk do Kristo Yesu dobis arami hahothai th'eruk do Kristo, ikara th'egyemathik thoh'oyano. Ara th'egyemathik thoh'oyano hamaring, awang othulo lothohop lobis arami hanyong. ¹⁷ Ti, ara, orimak ohothai ithifeyo abisan do Kristo, ohothai dang arimahini ara ohoiyak, ohorik Kristo eyau thoilo adihithemi? Awang kwong! ¹⁸ Ara aduho nang asang hanya athuk nang ethorohojo, arwang nang iring othulo laang othifoitho oyalu. ¹⁹ Inyong nara inyong thol'oyalu aye nang d'oyalu, damanya nang ara l'Ojok. ²⁰ Athuhi nang nya abehohina ho Kristo di kruce. Awang hara nang lesuka lya. Kristo lomanya ditha ho nang lya. Esu nesarak nang ara othulo ne, esuka nang th'eruk ditha h'Olonyi l'Ojok, lomuno nang esarak ahwan nayong thotohori tho nang. ²¹ Awang nang awak esarahina alwahio n'Ojok arakang, ara kudien orimahini abisan thol'oyano, ira Kristo iye ija!?