¹ Wʉ́o'ŋ wa̱rɨggɨŋ: Na naa Ya̱ʉ́da kas raaye ka̱ɨŋ? walga jedde dɨ́e–lé kí kaa raaye–ii? ² Kí see'ŋ see âl raayeŋa soŋŋâ ka̱ɨŋ, main kin nîŋ paál Ya̱ʉ̂da–sí Wʉ́o'ŋ beléŋá nyét dóŋa kayé. ³ Na ay–ii níŋ lóŋ abás dîi see jâ̱ɨ ás ka̱ɨŋba? Dɨ́eŋ see jâ̱y wa̱rɨŋ Wʉ́o'ŋ see jâ̱–sí báláŋ paasó? ⁴ Áilelelá Wʉ́o kérrég báŋ see annaŋ dog kʉldɨŋa nyét pɨé kwǎ ge, niná ǎl Wʉ́o'ŋ domboreŋa toyya'ŋ dɨó rímmeŋ eŋa, "Abás dɨ́ɨ́ŋ suur–sí jéérél bá síŋ in jááwlíti âl a̱rɨ tullê jâ, bá síŋ kérrég kila kwa'ŋ írí kôs jʉ́ndʉl aíla jɨɨ dánneŋ kawe. ⁵ Marraŋ abás dáíŋ kʉrrɨŋ Wʉ́o'ŋ wa̱rɨgɨŋ páálíti ay–ii níŋ kwa? kɨ́ taga in láŋ kwa âl Wʉ́o korroŋ–ii ǎl dééŋ gabbîn dáíŋ íríjá̱bɨ́ti? (Na naa ká âl kí dʉldɨ'ŋ kwě ta̱bʉ'ŋ koro–ii ná írsiŋ.) ⁶ Áilelelá abá ila ʉʉ innálaŋ–ii Wʉ́o da̱ldɨ'ŋ–sí ay–ii níŋ jánsá jaa? ⁷ Dʉó díg mat níŋ galda piá ná in kwǎ abá dúíŋ pɨé Wʉ́o'ŋ ʉʉ'ŋ see sís ka̱kkɨ́ré pii na bát–si kéé galaŋa sís nyiǐnti ka–sí kaá ʉʉ́ŋ–ii nás ka̱ɨ́ŋá nái ja̱nɨ írí ka̱bɨ́tíya ála ká ka̱ttɨ́eŋa dʉŋo aŋ? ⁸ Ná bɨ́ dog mat níŋ in bwa, "Ǎl a̱rɨ jɨttɨ kâ liya'ŋ mat níŋ a̱rɨ tullê eeŋ"? Kwa dîi alá dáíŋ kí jɨttɨŋ kírsiŋa ná in kámiŋa âl kɨ́ in nálaŋ kaw, yeeŋ– Wʉ́o ja̱nɨ írí já̱bɨ́ inná laŋ ǎl in lóóŋ áláŋ ja̱nɨ írí ka̱bɨ́ya. ⁹ Dʉó wá̱rɨg á keba innîíŋ arrá kaa–ii na innîiŋ arrá in lá lóóŋ âl kɨ́ Ya̱ʉ̂da Jâra–lé soŋŋá tullé kaŋ lôlo see áiba kɨ́ naa in–si káwli Ya̱ʉ̂da na Jâra ka̱ttɨ́eŋa'ŋ korgôsꞌíŋ dû ay–ii tog gé. ¹⁰ In ǎlbá Wʉ́o'ŋ domboreŋa'ŋ toyya'ŋ dɨó rímmeŋ eŋa dʉó ákeba ála Wʉ́o'ŋ kʉ́ŋɨ wá̱rɨg–ii walá dʉó tog bɨ́r á keba. ¹¹ Dʉó á keba ná dééŋ arrá rá̱ɨ́ŋél kaa–ii ná see–ii. ¹² Walá dʉó ákeba ná Wʉ́o–sí ʉrgʉl. Kwa nyét Wʉ́o–sí soor kaníe nás arrá sambany kɨŋɨ ná dʉó ǎl a̱rɨ wá̱rɨg pii á keba, walá dʉó tog bɨ́r á keba. ¹³ "Kɨ́eŋ beléŋá bá in maŋáge–yê. kí kɨ́eŋ káálíŋtá pɨé kawe na beléŋá puyyáŋa alá kɨ́eŋ ʉtoŋa–lé ka̱rɨ́ŋéli bá in lóŋ niná nʉ́ʉ́miŋ duílá." ¹⁴ Na kɨ́eŋ ʉtoŋa bás kí naála na kí kilmá'ŋ pʉyyɨŋ pis ɨŋɨ." ¹⁵ Kɨ́eŋ tarŋa díg kullé ge asá kewa ɨrte maŋ. ¹⁶ Na yeeŋ lóó bi lóóle ná keéŋé bá jáásíŋo na ragas kʉndɨ́ya. ¹⁷ Yeeŋ dóŋá'ŋ dorá–sí ás kalŋba." ¹⁸ Kɨ́eŋ kilmaŋa–lé Wʉ́o'ŋ ka̱lɨ jâ–sí ás ka̱ɨŋ ba." ¹⁹ Kɨ́ kalusi a̱rɨ bi a̱rɨ alá dáálí–le rímmeŋ eŋa, bás kila kwa–sí risíŋ alá yee ka̱rɨ kʉle. Na áláŋ ʉto bi ʉto dirrig oóŋ, ásáŋ da̱ldɨŋ nyét–sí Wʉ́o'ŋ jánsá kélal. ²⁰ Iláiŋ ná dʉó á keba ná Wʉ́o'ŋ kʉ́nɨ wá̱rɨg–ii ná ʉ́tóŋá kila pii alá dáálí beléŋ. A̱rɨ ǎl dáálí beléŋ bá ila–ii áísáŋ in páálí âl kɨ́ ka̱ttɨ́eŋa kâ. ²¹ Wʉ́o'ŋ wa̱rɨgɨŋ kí see jâ̱ɨ'ŋ dorá: Marraŋ naa Wʉ́o'ŋ dorá alá kwa–sí wá̱rɨga pii lóóŋóla. Dáálí dorá ɨd áiba alá kwa–sí jʉ́ndɨ ná wá̱rɨga kɨndeli na kí dorá keer Mûsa'ŋ dáálíŋ domboreŋa, ²² Na domoŋ kwǎ'ŋ domboreŋa in beléŋá Wʉ́o'ŋ dorá âl see–ii Wʉ́o kwa–sí jʉ́ndɨ ná kwa–sí kí Ya̱sʉ́a jáásodʉŋo'ŋ dorá wá̱rɨga kɨ́ndélíŋá. Na in ʉʉ kwa nyét–le âl see–ii alá jáásodʉŋo–sí see kééli ɨdɨ̂ɨ́ŋ ná kwa nyét bá tog gé. ²³ Ɨdɨ̂ɨ́ŋ ná kwa nyét ka̱ttɨ́eŋa káwe ná taga a̱rɨ ɨd á síŋ kʉ́mma ásáŋ galaŋa koomíal kila alá Wʉ́o ínni. ²⁴ Marraŋ Wʉ́o'ŋ tʉllɨŋ janí'ŋ hóo ʉʉ́ŋ kwa nyét–sí wá̱rɨga káwe kí jopó'ŋ dorá ila alá Ya̱sʉ́a–lé–ii. ²⁵ Wʉ́o jáásodʉŋo–sí dééŋ wayí–le in tawrá jáwí in ná gôbbo. áláŋ liya'ŋ dorá ila–ii asá kwa–sí kɨ́eŋ ka̱ttɨ́eŋa kawse kɨ́ dɨ́eŋ see jâ̱yɨ ila asá dê–lé ka̱ɨŋ Wʉ́o in ʉʉ–sí ɨdɨ̂ɨŋ piá asá in páálí Yé ǎl wá̱rɨg–ii. ²⁶ Tóórí âl rimela na kwa'ŋ ka̱ttɨ́eŋ–sí síŋ nʉ́ŋɨ́ jéépel na naa in tin–lé yé kɨ́ kɨ́eŋ ka̱ttɨ́eŋa–sí pʉttó tɨěl ásáŋ dɨ́eŋ wa̱rɨgɨŋ páálí na kí in dorá Wʉ́o ása in pulŋíti Yé kí dééŋ dorol Yé âl wá̱rɨgɨ ná dʉó bi dʉó–sí jʉ́ndɨ ná Ya̱sʉ́a–sí see tɨél áláŋ wá̱rɨgeeŋ. ²⁷ Na naa kaa–ii ásáŋ déŋꞌíŋ doŋgóré kɨndel? A̱rɨ á keba. Na in kaáŋ ʉʉ́ŋɨ? Yé bâl ɨdɨ̂ŋ ʉʉ́ŋɨ ǎl kɨ́ dáálí–sí ba̱gɨ kaw lóo. ²⁸ Marraŋ ɨdɨ̂ɨŋɨ ǎl kɨ́ Jáásodʉŋo–sí see kéél, ɨdɨ̂ɨŋ nás kɨ́ in kágíti dʉó–sí ǎl Wʉ́o'ŋ kʉ́ŋɨ wá̱rɨg ka̱rɨ́ŋéliǎlbá délliŋ kí see jâ̱ɨ–ii ná kí ila a̱rɨ'ŋ jâ áiba alá dáálí beléŋ . ²⁹ Yé Wʉ́o bál bá délliŋ Ya̱ʉ́da'ŋ wʉ́o–ii? Yé dog Jâra'ŋ Wʉ́o bála áiba? Ee, Yé dogJâra'ŋ Wʉ́o–ii. ³⁰ Na naa Wʉ́o bá délliŋ tog–ii, ki–ii ná Ya̱ʉ́da–sí dɨ́eŋ see jâɨ'ŋ ʉʉ́'ŋ wá̱rɨga rááŋ, na dog ná Jâra–sí dɨ́eŋ see jâ̱ɨ'ŋ ʉʉ́'ŋ wá̱rɨga rááŋ. ³¹ Na naa dáálí–sí láŋ kí see jâ̱ɨ túga kawí? Áila lá kɨ́ mááŋ–si dáálí–sí kɨbɨ́ti.