¹ Birâim kí see jâ̱ɨ–si koro na naa kɨ́ Ya̱ʉ́da dáíŋ bâ Birâimꞌíŋ írí ay–ii níŋ kwa? ² Yé in ʉʉ–lé kas ɨwo abá in lóóŋá ála Birâim kééŋ tááríŋáꞌŋ ʉʉ́'ŋ kʉ́ŋɨ wá̱rɨg kééŋá, bá síŋ a̱rɨ kééŋ ná síŋ dééŋ ʉʉ́'ŋ doŋgóré ɨ́ndélíŋí, marraŋ yé dog a̱rɨ tog dog ás kééŋa ba ásáŋ dééŋ ʉʉ́'ŋ Wʉ́o'ŋ ta̱bʉ'ŋ doŋgóré eeŋ. ³ Wʉ́o'ŋ domboreŋa toya in beléŋá? "Birâim Wʉ́o–sí see tɨ́o, na dééŋ see jâ̱ɨ'ŋ ʉʉ́'ŋ Wʉ́o namá yé–ii ná dʉó wá̱rɨg rááŋá." ⁴ Sôŋgoŋa asá táárí kwǎ–sí kawrítía dʉléŋá ge, marraŋ dʉléŋá dolla á geba, dʉléŋá a̱rɨ ɨddɨ–ii asá kí táárí komítíya. ⁵ Marraŋ abá dʉó kééŋ tááríŋá–le pʉttó ásiba, ná Wʉ́o–sí see tɨél alá jɨttɨ–sí wá̱rɨg jáwíti dééŋ see jâ̱ɨ Wʉ́o'ŋ kʉ́ŋɨ bá wá̱rɨg kórél. ⁶ Inná abá Da̱ʉ̂d dʉó bora pattâ'ŋ risíŋ, dʉó alá wʉ́o wá̱rɨ rááŋá ná kila tááríŋá'ŋ ʉʉ́'ŋ áiba alá yé pii. ⁷ Wʉ́o ása kwa kɨd–sí bora pattá pii asá kɨ́eŋ ka̱ttɨ́eŋa ká̱á̱sʉl, alá kɨ́eŋ tááríŋa jɨttɨŋa wa̱rɨ ɨŋɨ. ⁸ Loŋ dʉó ɨd–sís bora pattá pii asá kééŋ ka̱ttɨ́eŋa ká̱á̱sʉl. ⁹ In bora pattá jâ bâlbá déliŋ kwa kɨdɨ̂ŋ–ii alá kándé, wala dog kwa kɨdɨ̂ŋ–ii alá á kándéba? Kɨ́ in ká̱mɨŋɨ wʉ́o Birâim–sí âl déé see jâ̱ɨ'ŋ ʉʉ́'ŋ–ii ná wá̱rɨg rááŋá." ¹⁰ Marraŋ in ʉʉ naán kééŋá ná eŋa? iláiŋ lá waar kééŋá alá Birâim–sí á kándéba,wala liya–ii alá yee–sí kándé, jandi'ŋ waar kééŋá! ¹¹ Birâim asá tɨɨna ná kándé dééŋ jedde ósom kéŋa ásáŋ in pulŋí ála dééŋ see jâ̱ɨ'ŋ ʉʉ́'ŋ kééŋá ná Wʉ́o yee wá̱rɨg rááŋá waar ná yee–sí dog á kándéba. ¹² Na in ʉʉ namá yé–ii ná Birâim–sí jíndí áláŋ kwa nyéttiŋ bâ–ii alá Wʉ́o–sí see kéyéna alá wá̱rɨga rááŋá annaŋ dog á kándéba na Birâim dog kila kwa'ŋ báa–ii alá kándé ná délliŋ ila áiba alá yeeŋ–sí kándé marraŋ dog alá Wʉ́o–sí see kééli niná ila see jâ̱ɨ–ii asá dáíŋ Wʉ́o Birâim kééŋá ila dɨo alá á kándéba, Wʉ́o'ŋ jasi–sí kí see jâ̱ɨ'ŋ si dorá koomítía. ¹³ Wʉ́o birâim na kééŋ atineŋa sís in kwǎ álá da̱ldɨ'ŋ nyét íní, Wʉ́o in ʉʉ–sí in nîŋ á piyába álá Brâim dáálí–sí ba̱gɨ piá marraŋ ɨdɨ̂ɨŋɨ ná yé Wʉ́o–sí see tɨ́o Wʉ́o namá yee wá̱rɨg rááŋá. ¹⁴ Abá níŋ Wʉ́o'ŋ jasin kwa kɨd–sí kaníe alá dáálí–sí see jâ̱ɨ bâŋ a̱rɨ hô kééŋá na jasi bâŋ a̱rɨ jʉ́rʉs kééŋá. ¹⁵ Ɨdɨ̂ɨŋ ná dáálí bás Wʉ́o'ŋ gabbîn ʉ́ndʉl, marraŋ lóó ɨd ná dáálí á keba ka̱ttɨ̂eŋa dog á ka̱ɨŋba. ¹⁶ Na naa Wʉ́o dééŋ jasi–sí ǎl jáá kí Birâimꞌíŋ–si see jâ̱y tɨ́o, áláŋ ila jasi kee Birâimꞌíŋ atineŋa nyét–le in ná Wʉ́o'ŋ dol hô, ná délliŋ kila kwa–lé áiba alá dáálí–sí ba̱gɨ kawe, marraŋ kila kwa–lé dog ǎl yee see kééli inná alá Birâim tɨ̌o. iláiŋ ná Birâim dáíŋ báa–ii kwa nyét. ¹⁷ Niná alá rímmeŋ eŋa ká jɨɨ áila bá̱rʉ́ŋa'ŋ soŋŋâ'ŋ báa awí. Birâim Wʉ́o'ŋ nʉ́ŋɨ dáíŋ báa–ii, Wʉ́o alá Birâim see tɨ̌o, Wʉ́o alá waytólá jaiŋ ínni ná yé dʉó ɨdtɨ álá a̱rɨ a̱rɨ ɨd–lé teer alá á keba. ¹⁸ Na já̱ɨ́go á kééŋá ba álá Birâim dogólá kiri, marraŋ Birâim Wʉ́o–sí see tɨ́o nâŋ kee ná sɨgel ná bá̱rʉ́ŋá soŋŋâ'ŋ báa eŋa, inná laŋ asábá aáŋé "kɨ́ɨ́ŋ atineŋa áláŋ bá in soŋŋá gé inná úríŋá." ¹⁹ Yé kééŋ ayéŋá dákkin (píri péégiliŋi), marraŋ dééŋ see jâ̱y nyokké á eŋaba abá yee–sí dééŋ suurꞌíŋ lóóŋóle laa ǎl miíŋ wá̱ytélíŋí na iláiŋ ná Sarra da̱a̱rɨŋ–lé keer. ²⁰ Yee–sí péllét Wʉ́o'ŋ see jâ̱y–lé kʉrro á jʉ́ŋeba, walá Wʉ́o'ŋ jasi–sí gíla ás piába. námmá bás dééŋsee jâ̱y–sí kʉrro nyiíŋíe namás Wʉ́o–sí mʉjjé piá. ²¹ Ná asi tóg dééŋ arrá in rááŋa Wʉ́o ása kʉrro kee áláŋ a̱rɨ ɨd piá alá kowǎ. ²² Namá ɨdɨ̂ɨŋɨ ná Wʉ́o Birâim–sí kí see jâ̱yꞌíŋ dorá wá̱rɨg rááŋá." ²³ Kila ʉʉŋa asá in paalítía alá yee–sí kíe wá̱rɨg rááŋá Birâim–sí dítinꞌíŋ á kééŋaba nás rímmeŋ káwe. ²⁴ Marraŋ dog gîs kɨŋa rímmeŋ káwe alá in lóŋ áláŋ gi wá̱rɨga ka̱rʉ̂l alá Wʉ́o–sí see kéél asá Ya̱sʉ́a dáíŋ Loŋpii–sí sállá piá. ²⁵ Na káíŋ ka̱ttɨ́eŋa'ŋ ʉʉ́'ŋ yee–sí namá tawrá ka̱rʉ̂l áláŋ wǎy námás sállá káwal áíláŋ kɨŋa Wʉ́o'ŋ kʉ́ŋɨ wá̱rɨga jáwí.