¹ Wʉ́o'ŋ jandi wá̱rɨg kʉŋo jɨ́ asá dʉó keer–sí jéndéél gabala ás jaiŋba ǎl ʉ́dóŋá jɨttɨŋa jaw, asá dʉó keer–sí jéndél bá dɨ́ɨ́ŋ suur–sí ja̱nɨ írí ja̱bɨ́tɨ. Iláiŋ ná jɨ́ asana dʉŋo dog ʉ́tóŋá killaiŋ jaw. ² Na kɨ́ kaluŋsi Wʉ́o'ŋ jansa âl see–ii abá yé kwa–sí kɨ́eŋ korroŋa'ŋ ʉʉ́'ŋ jansá jáwríyi. ³ Yé dʉwe, jɨ́ kila kwa–sís jéndél álá ʉ́dóŋá korroŋa kawe, marraŋ jɨ́ dog ʉ́dóŋá korroŋa jaw. Jɨ́ dɨ́ɨ́ŋ la ta̱bʉ'ŋ in jawríti áláŋ Wʉ́o'ŋ jansa–sí jaanyó? ⁴ Wala jɨ́ mat–si Wʉ́o'ŋ awaí appâlla na jɨrɨ́mó na mááleŋ jeeŋ–sí nʉ́ŋɨ́ jeépel, jɨ́ kí see jaluŋsi Wʉ́o ása awaí kee, iláiŋ ná yé kôil áísáŋ jɨɨ ta̱bʉ'ŋ póíti áláŋ tʉ́ʉ́beŋ jeeŋ? ⁵ Marraŋ dɨ́ɨ́ŋ ta̱bʉ'ŋ pʉttɨŋ na dɨ́ɨ́ŋ kilmá asá tʉ́ʉ́beŋ jeeŋ á keba'ŋ ʉʉ'ŋ jɨ́ in nâŋ ása dɨ́ɨ́ŋ suur–sí kí ila sog jáíseŋ jeeŋ soŋŋâ gʉ́bʉ́l jawríti, abá Wʉ́o'ŋ kilmá'ŋ tʉkkɨŋ na jansa wá̱rɨg kʉŋo lóóŋóla. ⁶ Wʉ́o dʉó bi dʉó–sí níŋ kʉrro téssiŋ jáwí in nálaŋ abá yé piá: ⁷ Kwa dîi kérrég bá ʉ́dóŋá tulléŋa kawe ásáŋ Wʉ́o'ŋ galaŋ na ba̱gɨ na jaiŋ lʉʉj kʉ̌mma. ⁸ Na yeeŋ–sí Wʉ́o jaiŋ lʉʉj níŋ íní, marraŋ kila alá zalbána gé na ʉʉ'ŋ see–sí ba̱gɨ á kaweba, na ʉ́dóŋá jɨttɨŋa kawe. ⁹ Wʉ́o yeeŋa–sí bás síŋ gabbîn na jáíseŋ palí na íllâ kila kwa nyét–le alá ʉ́dóŋá jɨttɨŋa kawe áláŋ miine na ta̱rrɨŋ kee, main námá Ya̱ʉ́da'ŋ–ii lia námá jâra'ŋ–ii. ¹⁰ Marraŋ Wʉ́o bá kwa nyét–sí galaŋa, na ba̱gɨ, na dóŋá íní alá ʉ́tóŋá tulléŋa kawe, main námá Ya̱ʉ́da'ŋ–ii lia námá jâra'ŋ–ii. ¹¹ Ɨdɨ̂ɨŋ ná híllâ Wʉ́o kerger jâ ás keba. ¹² kila kwa asá Mûsa'ŋ dáálí ás ka̱ɨŋba abá ka̱ttɨ́eŋa káwe báŋ pááneŋ kɨŋɨ marraŋ dáálí dɨ́eŋ írí á póítiba, na kwa asá dáálí ka̱ɨŋ abá ka̱tɨ́eŋa kawe bá síŋ beet inná laŋ alá dáálí beléŋ. ¹³ Ɨdɨ̂ɨ́ŋ ná kila kwa alá délliŋ dáálí–sí kelkaame na Wʉ́o'ŋ nʉ́ŋɨ́le wá̱rɨga ás kalŋítíyaba marraŋ kila kwa alá dáálí–sí ka̱rɨ kʉle báŋ wá̱rɨga ka̱rʉ́ʉl. ¹⁴ Jâra dáálí ás ka̱ɨŋba abás kɨ́eŋ kilmaŋa in aáŋé áláŋ a̱rɨ ɨd–sí ba̱gɨ káwal alá dáálí beléŋ íne yeeŋ bá kɨ́eŋ suúrŋá'ŋ dáálí ge alaŋ dog dáálí ás ka̱ɨŋba. ¹⁵ Kɨ́eŋ tááríŋá a̱rɨ ɨd–si páálítía ǎl dáálí beléŋ ná kɨ́eŋ kilmaŋa–lé rímmeŋ eŋa. Na kɨ́eŋ kilmaŋa in jɨ́bɨ́tía ila a̱rɨ âl see–ii, iláiŋ ná kɨ́eŋ járriŋ lóóŋá dííŋas–lé in páálítía yeeŋ âl ʉ́dóŋá jɨttɨŋa káwe Na lóóŋá dííŋa–lé kɨ́eŋ in paalítía ʉ́tóŋá tulléŋa kawe ¹⁶ Na naa ká gʉʉd bás inná laŋ áwlíti alá belé tullê beléŋ, in bá gal ila a̱rɨ–ii âl dúíti áláŋ kí ila sog eeŋ, âl Wʉ́o kí Jáásodʉŋo Ya̱sʉ́a'ŋ dorá dúíti ásáŋ kʉldɨŋa'ŋ jarri–sí beet. ¹⁷ Ya̱ʉ́do na Mûsa'ŋ dáálí: Na abá dɨ́ɨ́ŋ suur–sí Ya̱ʉʉ̂dɨ ja̱rɨ̂ŋ na Mûsa'ŋ dáálíes jɨgɨ́ŋtɨ na dɨ́ɨ́ŋ jɨrgɨ́ŋóles doŋgóré jɨndel ása kí Wʉ́o bɨrgɨ́ŋ, ¹⁸ Na abás jaluŋ a̱rɨ ɨd alá Wʉ́o kôil áláŋ jɨ́ jâ na abás dáálí–le jɨ́wɨ áláŋ a̱rɨ ɨd jaáwŋel alá wá̱rɨg–ii; ¹⁹ Na abá–ii jɨɨ ta̱bʉ pisi kɨ́ dɨ́ɨ́ŋ dorol kʉrŋo'ŋ a̱gɨ̂d jaŋ na âl kila kwa'ŋ hěrra jaŋ ǎl lóó dɨkkô–lé ka̱ɨŋ, ²⁰ Na ála kwa ulla'ŋ dóra ja̱bɨ́ dʉŋo jaŋ ,na ála élléŋá'ŋ gʉʉdpáálí jaŋ, ɨdɨ̂ɨ́ŋ ása dáálí–sí jaluŋ namá dɨ́ɨ́ŋ ta̱bʉ'ŋ in jawríti ása a̱rɨ bia̱rɨ jaluŋ na ása ʉʉ́ŋ see nyét jaluŋ. ²¹ Na Jɨ́ ása kwa kerŋa–sí gʉʉd júlŋíti, jɨ́ dɨ́ɨ́ŋ suur–sí ás júlŋíti bâ? na jɨ́ asá ka̱a̱mɨŋꞌíŋ jɨttɨ'ŋ gʉʉd júlŋíti, jɨ́ ka̱a̱mɨŋ á jawbâ? ²² Jɨ́ alá in jámiŋ kwa a̱jɨlɨŋ áláŋ á kaweba, Jɨ́ a̱jɨlɨŋ á jaw bâ? Na jɨ́ alá kʉnʉ́sa–sí janan, na jɨ́ kʉnʉ́sa'ŋ lóóŋále karába jʉ́llélla? ²³ Na jɨ́ asá doŋgóré jɨndel ása Wʉ́o'ŋ dáálí jaŋ, marraŋ jɨ́ Wʉ́o–sís ta̱bʉ'ŋ tʉ́ɨ́ jʉ́ndʉl? asá dééŋ dáálí'ŋ ʉʉ kí dʉʉs jaw? ²⁴ Inná alá Wʉ́o'ŋ domboreŋa toyya'ŋ dɨó rímmeŋ eŋa Ya̱ʉ́da'ŋ kɨ́eŋ ʉ́tóŋá'ŋ ʉʉ́ŋ Wʉ́o'ŋ kona–sí Jâra'ŋ ʉʉ́ŋ ʉ́tóŋá jɨttɨŋa írí bʉ́ŋíe. ²⁵ Abá dáálí–sí ba̱gɨ jaw dɨ́ɨ́ŋ jedde bái rááyeŋ pii, marraŋ abá dáálí–sí ba̱gɨ á jawba bá in jɨndel áila tóóríg á kándéba. ²⁶ Abá Jâr dʉŋo dáálí–sí ba̱gɨ pii yee–sí bát in áŋ kaye bâ in âl kándé. ²⁷ Dʉó alá jebérig–ii na bát álá dáálí–sí ba̱gɨ pii báíŋ jɨɨ ja̱nɨ írí já̱bɨ́ annaŋ–si dáálí jaiŋ annaŋ gî kándé naŋ gal dáálí–sí ba̱gɨ á jawba. Dʉó alá Ya̱ʉ̂dɨ paál kí see Ya̱ʉ̂dɨ áiba? Na jebéregꞌíŋ jedde kí see jedde áiba! ²⁸ Marraŋ mááŋ Ya̱ʉ̂dɨ see kʉŋo ila dʉó–ii alá kí kilmá Ya̱ʉ̂dɨ, Na jedde see kwaŋ kí kilmá–ii kí kʉo tiyyáŋa. ²⁹ Ná kí dáálí ila áiba alá rímmeŋ eŋa! dʉó inniniŋ kwa–lé áiba ná da̱wwá̱ bʉ́lɨ́tɨ marraŋ Wʉ́o–lé–ii ná da̱wwá̱ bʉ́lɨ́tɨ.