¹ Wan jo ma watek myero wakonyu jo magoro i gin ma loyogi, ento pe watamu pi yomo cwinywa kekenwa. ² ŋat acel acel i kinwa myero oyom cwiny dano lawote, me konye, wek odoŋ i niyene. ³ Pien Kricito yam pe oyomo cwinye kekene, ento obedo kit macalo yam gicoyo ni, “Yet pa jo ma giyeti kwede doŋ opoto i koma.” ⁴ Gin ducu ma yam gicoyo i kare macon ca onoŋo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya. ⁵ Wucir can ki cuko cwiny ma a ki bot Lubaŋa; myero en omi wubed ki niaŋ maber i kinwu kekenwu, kun wulubo kit pa Kricito Yecu, ⁶ wek wuribbe ka pako Lubaŋa Won Rwotwa Yecu Kricito ki dwan acel. ⁷ Wujolle kekenwu, kit macalo Kricito yam doŋ ojolowu kwede, pi deyo pa Lubaŋa. ⁸ Atittiwu ni, Kricito yam olokke odoko latic ma okonyo Lujudaya, pi nyuto ni Lubaŋa loko lok ada, kun bene cobo gin ma yam Lubaŋa ocikke iye bot kwarowa macon, ⁹ dok pi miyo Lurok gubed ka pako Lubaŋa pi kicane, kit macalo yam gicoyo ni, “Pi meno abikori i kin Lurok, dok abiwero wer me pako nyiŋi.” ¹⁰ Dok yam bene owaco ni, “Wun Lurok, wubed ki yomcwiny kacel ki jone”; ¹¹ dok ni, “Wupak Rwot, wun Lurok ducu, wek lwak me rok ducu gupake.” ¹² Icaya bene yam owaco ni, “Lakwar Yece bibino, en bibino ka loyo Lurok; Lurok bene gibigeno en.” ¹³ Lubaŋa ma miyo dano ducu bedo ki gen myero omi yomcwiny ducu ki kuc opoŋ i iwu pi niyewu i kome, wek genwu obed ka medde ameda pi tek pa Cwiny Maleŋ. ¹⁴ Aŋeyo atir ni wun jo mabeco twatwal, wutye ki ŋec muromo, dok bene wutwero pwonnye giwu kekenwu. ¹⁵ Ento doŋ atyeko coyo botwu lok mogo ki tekcwiny madit, kombeddi amito apo wiwu iye. Atimo meno pi mot ma Lubaŋa omiya, ¹⁶ me bedo latic pa Kricito Yecu bot Lurok. Atye ka tic macalo ajwaka pa Lubaŋa kun bene atito lok me kwena maber ma oa ki bot Lubaŋa, wek omi Lurok gubed calo gitum ma gityero ma Lubaŋa pwoyo, ma Cwiny Maleŋ doŋ olonyo woko odoko maleŋ. ¹⁷ Atye ki tyen lok ma miyo awakke i Kricito Yecu pi ticca ma atye ka tiyone pi Lubaŋa. ¹⁸ Pe abiette ka loko lok mo mukene, ento kono pi gin ma Kricito otiyo pi kelo lurok i te locce keken, kun tiyo kacel kweda i lok ki i tic, ¹⁹ pi teko ma onen i kom lanyut mogo ki taŋo mogo, pi tek pa Cwiny Maleŋ. Meno omiyo doŋ atyeko tito lok me kwena maber i kom Kricito atika, cakke ki i Jerucalem, wok kwede wa i Illiriko. ²⁰ pien onoŋo aketo cwinya me tito lok me kwena maber ka ma yam dano peya guwinyo nyiŋ Kricito, wek omi pe aket gedo i wi guti ma yam doŋ ŋat mukene ocako gero iye mere, ²¹ ento wek obed kit macalo gicoyo ni“Jo ma yam peya gitito botgi lok i kome doŋ gibinene, jo ma yam peya guwinyo pire gibiniaŋ i kome.” ²² Man aye gin ma obedo ka geŋa tyen mapol me bino botwu. ²³ Ento kombeddi doŋ pe atye ki ka tic mo kany, dok bene onoŋo doŋ abedo ka mito pi mwaka mapol ni abin botwu. ²⁴ Ageno ni abinenowu ka awok ki kunnu ma noŋo akato acito i Cipein, ageno bene ni wubikonya i wotta me cito kunnu lacen, ma noŋo koŋ ari botwu pi kare manoknok. ²⁵ Ento kombeddi pud koŋ acito i Jerucalem pi tero jami me kony bot jo pa Lubaŋa. ²⁶ Pien jo pa Lubaŋa ma gitye i Makedonia ki Akaya doŋ gumoko tamgi me jogo lim me konyo jo pa Lubaŋa ma gitye i Jerucalem ma can omakogi. ²⁷ Gumoko tamgi kit meno, ento gitye bene ki banya bot jo Jerucalem, pien ka Lurok ginywako gamo mot me Cwiny kacel ki Lujudaya, myero gin bene gukony Lujudaya ki jami ma mitte me gwoko kom. ²⁸ Ka doŋ meno otum, ma noŋo doŋ atyeko miyo botgi gin ma gijogo pigi, ci abiwok ki botwu ka doŋ akato acito i Cipein. ²⁹ Aŋeyo ni ka ao botwu noŋo abino ki gum madit ma oa ki bot Kricito. ³⁰ Abako doga botwu utmegina, pi Rwotwa Yecu Kricito ki pi mar pa Cwiny Maleŋ, wuket tek wuribbe kacel i legawu pira bot Lubaŋa, ³¹ wek abwot woko ki bot jo ma pe guye Kricito ma gitye i Judaya, dok bene wek omi jo pa Lubaŋa ma gitye i Jerucalem gupwo tic ma acito ka tiyone kunnu. ³² Pi meno ka Lubaŋa oye wek abin botwu ki yomcwiny madwoŋ, ci koŋ aywe bene kacel kwedwu. ³³ Lubaŋa won kuc obed kwedwu ducu. Amen.