¹ Anyuto botwu laminwa Foibe, ma en latic pa lwak jo ma guye Kricito ma tye i Kenkeria. ² Wujole i Rwot kit macalo jo pa Lubaŋa myero gujol kwede dano, dok bene myero wukonye i gin ducu ma en bimito ki botwu; pien yam okonyo jo mapol, okonya bene. ³ Wumot Pricika ki Akwila, ma gitiyo kacel kweda i Kricito Yecu. ⁴ Gin yam gudyero kwogi pi laro kwona; pe an kena aye ma apwoyogi, ento kadi wa Lurok ducu ma guye Kricito bene gipwoyogi. ⁵ Wumot bene jo muye Kricito ma gicokke i otgi. Wumot larema Epaenato; en aye obedo ŋat mukwoŋo ye Kricito i Acia. ⁶ Wumot Maliam ma yam otiyo tic matek i kinwu-ni. ⁷ Wumot Anduroniko ki Yunia, ma gin wadina ma yam gitweyogi kacel kweda i mabuc. Gin jo ma giŋene mada i kin lukwena, gin bene aye ma gukwoŋo bedo i Kricito kweda. ⁸ Wumot Ampuliato, ma en larema ma amaro i Rwot. ⁹ Wumot Urbano latic wadwa i Rwot, ki Citakic larema ma amaro. ¹⁰ Wumot Apelle, ma en dano ma genne i Kricito. Wumot jo me ot pa Aricitobulo. ¹¹ Wumot Kerodion ma en watta, ki jo me ot pa Narocico ma gitye i Rwot. ¹² Ma gin aye Terapaina ki Terpoca, ki larema Perici bene ma otiyo tic matek i Rwot. ¹³ Ma Wumot Rupo, dano ma ŋene i Rwot, gin ki minne ma alwoŋo ni maa bene. ¹⁴ Wumot bene Acinkerito, Pelegon, Keremec, Patroba, Keremac ki utmego ma gitye kacel kwedgi. ¹⁵ Wumot bene Pilologo ki Julia, Nerea gin ki laminne, ki Olimpa, ki jo pa Lubaŋa ducu ma gitye kacel kwedgi. ¹⁶ Wumotte kekenwu ki mot maleŋ me mar. Lwak jo ma guye Kricito i kabedo mapatpat ducu gumotowu. ¹⁷ Abako doga botwu, utmegina, wunen jo ma gikelo apokapoka i lok ma miyo dano poto i bal, ma pe rwatte ki pwony ma yam gipwonyowu kwede. Pe wuribbe ki jo macalo meno. ¹⁸ Jo macalo meno pe gin lutic pa Rwotwa Kricito; rwotgi ma gimaro aye igi. Gibwolo tam pa dano ma gipe ki tam marac, ma kun noŋo giloko lok maber ma winyone mit adada. ¹⁹ Kit winy ma wubedo kwede bot Lubaŋa doŋ owinnye bot jo ducu, meno aye gin mumiyo wuyomo cwinya. Doŋ amito wubed luryeko i gin maber, ento myero wubed maleŋ laboŋo bal; ²⁰ ci Lubaŋa won kuc binyoto Catan woko oyotoyot piny i te tyenwu. Kica pa Rwotwa Yecu Kricito obed kwedwu. ²¹ Temceo ma tiyo kacel kweda i Rwot omotowu; ki Lukio, ki Jacon, ki Cocipater, ma gin giwadina. ²² An Tertio aye ma acoyo waraga man amotowu i Rwot. ²³ Gayo ma en ŋat ma abuto i ode bene omotowu, en aye ma gwoko lwak ducu muye Kricito. Eracto ma en lakan-lim me gaŋ man, ki ominwa Kwarto bene gumotowu. [ ²⁴ Kica pa Rwotwa Yecu Kricito obed kwedwu wun ducu. Amen]. ²⁵ Myero wami deyo bot Lubaŋa ma twero miyo wucuŋ matek, macalo apwonyo kwede i lok me kwena maber ma abedo ka titone-ni, ki lok ma gitito i kom Yecu Kricito. Muŋ man yam Lubaŋa okano oliŋ woko litik pi lwak mwaka mapol, ka lacen doŋ oyabo ka maleŋ. ²⁶ Kombeddi doŋ ginyuto woko ka maleŋ i lok ma lunebi yam gucoyo ma omiyo lurok ducu guŋeyo kit macalo Lubaŋa ma pe to yam ociko, wek omi gulub niye. ²⁷ Deyo obed bot Lubaŋa nakanaka, ma en keken aye won ryeko, pi Yecu Kricito. Amen.