¹ Wujol dano ma niyene goro, ento pe wupyem kwede i kom tam mogo ma en tamo. ² Dano mo twero bedo ki niye me camo gin mo keken, ento ŋat ma niyene goro camo pot dek keken. ³ Dano ma camo gin ducu myero pe oca ŋat ma pe camo, ki dano ma pe camo gin ducu pe myero oŋol kop i kom ŋat ma camo gin ducu; pien Lubaŋa doŋ otyeko jole. ⁴ In aŋa mono ma iŋolo kop i kom latic pa ŋat mukene-ni? Meno lok pa ŋat ma loye me ŋolo kop i kome, ka cuŋo nyo ka poto. Ento en bicuŋ gire, pien Rwot tye ki twero ma miyo en cuŋ. ⁵ Dano acel paro ni nino acel dit kato nino mukene, kun noŋo dano mukene paro ni nino ducu rom. Dano acel acel myero omok tamme pire kene. ⁶ Dano ma paro pi nino mo, paro pi Rwot, ki ŋat ma camo bene camo pi Rwot, pien pwoyo Lubaŋa; dano ma kwero cam bene kwero pi Rwot, pwoyo Lubaŋa bene. ⁷ Pien dano mo pe ki i kinwa ma kwo pire kene, dok bene dano mo pe ma to pire kene. ⁸ Ka wakwo, wakwo pi Rwot; ka wato bene, wato pi Rwot. Mumiyo kadi wakwo, nyo wato, wan jo pa Rwot. ⁹ Pien Kricito yam oto ka doki obedo kwo wek ebed Rwot pa jo muto ki jo makwo. ¹⁰ Piŋo iŋolo kop i kom omeru? Nyo in, piŋo icayo omeru? Wan ducu wabicuŋ i nyim komker me ŋolo kop pa Lubaŋa. ¹¹ Pien yam gicoyo ni, “Macalo atye kwo-ni man Rwot ma owaco. jo ducu gibirumo coŋgi i nyima, ki dano ducu gibipako Lubaŋa.” ¹² Kit meno, ŋat acel acel i kinwa bidok i lok ma i kome pire kene bot Lubaŋa. ¹³ Myero doŋ wagiku ŋolo kop woko i kom luwotwa; ento gin ma myero wamoki en aye pe me tiyo gin mo ma bimiyo ominwa yokke nyo poto i bal. ¹⁴ Aŋeyo dok aniaŋ maber i Rwot Yecu ni, pe tye gin mo ma obedo me kwer pire kene; ento bedo me kwer bot ŋat ma tamo ni obedo me kwer. ¹⁵ Ka ce imiyo omeru bedo ki cwercwiny pi gin ma in icamo, noŋo doŋ pe itye ka lubo yo me mar. Pe iwek gin ma in icamo obal kwo pa dano ma Kricito oto pire. ¹⁶ Pe wuwek dano gulok i kom gin maber ki tuŋ botwu ni obedo gin marac. ¹⁷ Pien ker pa Lubaŋa pe te lokke cam ki mat, ento kit ma atir, kuc, ki yomcwiny ma Cwiny Maleŋ miyo. ¹⁸ Dano ma tiyo tic pa Kricito kit meno aye yomo cwiny Lubaŋa, dok bene dano gipwoye. ¹⁹ Myero doŋ watamu pi gin ma kelo kuc ki gin ma doŋo niyewa i kinwa kekenwa. ²⁰ Pe wubal tic pa Lubaŋa pi lok me cam mamwa-ni. Jami ducu leŋ, ento bedo rac ka dano mo camo gin ma miyo lawote poto i bal. ²¹ Bedo ber mada ka pe icamo riŋo, nyo kadi ki mato koŋo, nyo tiyo gin mo ma bimiyo omeru poto. ²² Doŋ niye ma itye kwede myero ibed kwede i kin in ki Lubaŋa keken. Tye ki gum dano ma pe ki tyen lok ma ŋolo kop loye kekene i gin ma en pwoyo. ²³ Ento dano ma kalo akala i cwinye kop loye ka ce ocamo, pien gin ma en timo-ni noŋo pe oa i niye, pien gin ducu ma pe oa i niye meno bal.