¹ Me agikkine utmegiwa, walegowu kun wabako dogwa botwu i Rwot Yecu ni, wumedde anyim nakanaka me bedo ki kit kwo ma wumako ki botwa, ma yomo cwiny Lubaŋa, ma wutye ka lubone-ni. ² Pien wuŋeyo cik ma yam wamiyo botwu pi Rwot Yecu. ³ Gin ma Lubaŋa mito en ene, ni myero wudok jo maleŋ; wuwek tim me kwele obedi. ⁴ Dano acel acel myero oŋe bedo ki dakone kenei cwiny maleŋ dok me woro. ⁵ Pe wuwek miti me kom obwowu, macalo lurok ma pe ŋeyo Lubaŋa. ⁶ ŋat mo pe otim bal bot ominne, dok pe obwole i lok man; pien Rwot culo kwor i lok magi ducu macalo wan yam watito botwu kun wacikowu bene matek. ⁷ Lubaŋa pe olwoŋowa ka nyobbe ki bal, ento ka bedo jo maleŋ. ⁸ Kit meno ŋat mukwero cik man, noŋo pe okwero dano, ento noŋo okwero Lubaŋa gire ma omiyowu Cwiny Maleŋ. ⁹ Lok mudok i kom mar me omego, pe myero gico botwu lok mo iye, pien wun kikomwu yam Lubaŋa doŋ opwonyowu woko ni wumarre kekenwu; ¹⁰ doŋ ada wun wumaro utmego ducu ma tye i Makedonia. Ento wabako dogwa botwa ni wumedde ka timo kit meno nakanaka, ¹¹ dok wuket cwinywu ka bedo mot. Dano acel acel opar pi ticce kun tiyo ki ciŋe kit macalo wacikowu kwede, ¹² wek jo ma tye woko gupwo kitwu, dok gin mo pe myero orem ki botwu. ¹³ Utmegiwa, pe wamito wubed ma wukwiya lok i kom jo ma doŋ guto; meno weko wubibedo ki cwercwiny macalo jo mukene ma gipe ki gen. ¹⁴ Wan waye ni Yecu oto, ci ocer woko. Jo muto ma kun yam giye Yecu bene gitye kit meno; Lubaŋa bikelogi kacel ki Yecu. ¹⁵ Watito botwu lok pa Rwot ma en owaco, ni, wan jo makwo ma wadoŋ nio wa i nino me dwogo pa Rwot, pe wabitelo nyim jo ma doŋ guto. ¹⁶ Rwot kikome bilor piny kun a ki i polo ki lwoŋo me twer, ma dwan lamalaika maditte biwinnye, tum pa Lubaŋa bikok. Jo ma yam guto i Kricito aye ma gibikwoŋo cer. ¹⁷ ka lacen wan jo makwo, ma wadoŋ gibigwarowa kacel kwedgi i pol, wek warwatte ki Rwot i dye yamo; ci doŋ wabibedo kacel ki Rwot nakanaka. ¹⁸ Pi meno, wukwe cwinyu kekenwu ki lok magi.