¹ Ento lok ma dok i kom kare, ki nino, utmegiwa, pe myero aco pire botwu, ² pien wun kikomwu doŋ wuŋeyo maber ni, nino pa Rwot bibino macalo lakwo ma bino i dyewor. ³ Ka dano giwaco ni, “Kuc tye, piny okwe mot, gin mo marac pe,” to biturugi atura calo arem me nywal ma turu dako muyac, ka larre biloyogi woko. ⁴ Ento wun pe wutye i piny macol, utmegiwa, ma twero miyo nino-nu turuwu atura calo lakwo. ⁵ Pien wun ducu wubedo jo me ceŋ, jo me dyeceŋ; wan pe jo me dyewor nyo me piny macol. ⁶ Pi meno, pe myero waninu anina macalo jo mukene, ento wabed ka neno piny kun wagwokke. ⁷ Pien jo ma nino, ginino dyewor, jo ma mer ki koŋo gimer bene dyewor. ⁸ Ento wan jo me dyeceŋ myero wabed jo ma wagwokke. Waruku niye ki mar gubed nyonyo me geŋo korwa, waruku bene gen me larre obed tok wiwa me lweny. ⁹ Pien Lubaŋa pe oyerowa ni kinigane opot i komwa, ento ni walarre pi Rwotwa Yecu Kricito, ¹⁰ ma yam oto piwa, ni wek kadi ka waneno nyo wanino, wabibed kwo kacel kwede. ¹¹ Pi meno wucuk cwinywu kekenwu, dok wukonnye bene kekenwu wek wudoŋ i cwinywu, ŋat acel acel okony lawote me doŋo, kit macalo wutye ka timone-ni. ¹² Wabako dogwa botwu utmegiwa, wuwor jo ma tye ka tic i kinwu ma gicanne piwu i Rwot, kun gipwonyowu. ¹³ Wuket deyo madwoŋ i komgi pi ticgi, dok wumargi bene. Wubed ki kuc i kinwu kekenwu. ¹⁴ Dok wabako dogwa botwu, utmegiwa, wujuk jo ma balo kare laboŋo tic, wucuk cwiny jo ma cwinygi odoko nyap, wukony jo ma goro, wudi cwinywu bene i kom dano ducu. ¹⁵ Wunen maber ni ŋat mo i kinwu pe ocul gin marac pi tim marac ma gitimo i kome, ento kare ducu wutem me timo ber i kinwu kekenwu ki bot jo ducu. ¹⁶ Cwinywu obed yom kare ducu. ¹⁷ Wuleg Lubaŋa ma pe wukeŋ. ¹⁸ Wumi pwoc i kit gin ducu, pien meno aye gin ma Lubaŋa mito ki botwu i Kricito Yecu. ¹⁹ Pe wugeŋ Cwiny Maleŋ me tiyo ticce i iwu, ²⁰ pe wuca bene lok ma Lubaŋa miyo bot dano me atita, ²¹ ento wubed ki waŋ mabit me neno jami ducu; wumak gin maber matek. ²² Wukwer tim maraco ducu. ²³ Lubaŋa kikome ma en won kuc omiwu wudok jo maleŋ i yo ducu, ogwok cwinywu ki tipowu ki komwu wek wubed laboŋo lok mo ma loyowu i kare me dwogo pa Rwota Yecu Kricito. ²⁴ ŋat mulwoŋowu-ni genne, dok bitiyo. ²⁵ Utmegiwa, wuleg Lubaŋa piwa. ²⁶ Wumot utmego ducu ki mot me mar. ²⁷ Acikowu matek i nyiŋ Rwot ni, myero wukwan waraga man bot utmego ducu. ²⁸ Kica pa Rwotwa Yecu Kricito obed kwedwu.