¹ I kare ma doŋ waneno ni pe waromo ciro wacel, wamito ni wadoŋ woko cen kenwa i Atene, ² ci waoro botwu Temceo, ma en ominwa ki latic pa Lubaŋa i tito lok me kwena maber i kom Kricito, wek ojiŋ cwinywu obed tek dok odi cwinywu i kom niyewu, ³ wek can magi pe oryaŋ kom dano mo. Wun kikomwu wuŋeyo ni can ma kit meno myero opot i komwa. ⁴ Pien i kare ma pud watye kacel kwedwu watittiwu con ni, i kare mo i anyim wabineno can, ma doŋ bene otimme woko kit macalo wuŋeyo-ni. ⁵ Pi lok man, ka doŋ anoŋo ni pe aromo diyo cwinya, aoro dano botwu wek aniaŋ i kom niyewu, ka ce labit dano doŋ obitowu woko, nyo ticwa ma watiyo bene doŋo olal nono. ⁶ Ento kombeddi Temceo doŋ odwogo botwa kun oa ki botwu. En okelo botwa lok mamit i kom niyewu ki mar ma wutye kwede, dok bene ni wupo piwa jwijwi ki kica madwoŋ kun wuparo pi nenowa mada macalo wan bene waparo me nenowu. ⁷ Utmegiwa, meno aye gin mumiyo cwinywa okwe i komwu pi niyewu, i can ki i un ma giunowa kwede ducu. ⁸ Kombeddi doŋ wabedo kwo ka wacuŋ matek i Rwot. ⁹ Kit pwoc aŋo muporre ma waromo miyo bot Lubaŋa piwu, ki pi yomcwiny ducu ma wumiyowa ma miyo cwinywa bedo yom i nyim Lubaŋa? ¹⁰ I dyeceŋ ki dyewor walego Lubaŋa matek twatwal pi nenowu waŋ ki waŋ, wek wamed botwu gin murem i kom niyewu. ¹¹ Lubaŋa Wonwa kikome, ki Rwotwa Yecu Kricito, myero omi wanoŋ yo me bino botwu. ¹² Dok walego Rwot omiwu wumedde matek twatwal i mar, kun ŋat acel acel maro lawote ki jo ducu, i kit ma wan wamarowu kwede, ¹³ wek en ojiŋ cwinywu obed tek dok wubed jo maleŋ laboŋo lok mo ma loyowa i nyim Lubaŋa Wonwa, i kare me dwogo pa Rwotwa Yecu ki jone maleŋ ducu.