¹ Utmegiwa, wun kikomwu wuŋeyo ni, binowa botwu yam pe obedo me nono. ² Kadi bed waneno can, dok bene gitimo tim me lewic i komwa i Pilipi macalo wun wuŋeyo, kadi pyem obedo dwoŋ, Lubaŋawa omiyo botwa tekcwiny me tito botwu lok me kwena maber ka maleŋ. ³ Pien lok ma wakelo pe oa ki i tam mugom nyo tam ma pe leŋ, goba bene pe iye. ⁴ Ento kit macalo Lubaŋa doŋ opwoyowa, ci cut omiyowa lok me kwena maber me atita, wan bene doŋ watito kit meno, pe pi yomo cwiny dano, ento pi yomo cwiny Lubaŋa ma ŋiyo cwinywa. ⁵ Wuŋeyo ni, wan yam pe waboko lok mabeco nono, pe wakano tamwa pi noŋo lim, Lubaŋa aye cadenwa. ⁶ Pe bene wayenyo deyo ki bot dano mo, kadi ki botwu nyo ki bot jo mukene; kadi bed onoŋo watye ki twero me keto peko i komwu, pien wan lukwena pa Kricito. ⁷ Ento yam wabedo wamwol i kinwu macalo lapidi ma gwoko litinone. ⁸ Waparowu mada, omiyo nene pe wamito miyo botwu lok me kwena maber keken ma oa ki bot Lubaŋa, ento kadi wan kikomwa doŋ watyeko mine woko botwu, pien wamarowu dok piwu tek botwa twatwal. ⁹ Utmegiwa, wutwero po kit ma ceŋ wacanne kwede i tic, i kare ma watittiwu lok me kwena maber ma oa ki bot Lubaŋa, kun watiyo dyeceŋ ki dyewor wek pe waket peko i kom ŋat mo i kinwu. ¹⁰ Wun wucadenwa, ki Lubaŋa bene ŋeyo kit ma wabedo kwede maleŋ dok ma kitwa atir, laboŋo lok mo ma oloyowa i nyimwu wun jo muye Yecu. ¹¹ Dok wuŋeyo kit ma wabako kwede dogwa botwu, kun waparo pi dano acel acel ma i kinwu, dok wacuko cwinywu macalo won litino cuko cwiny litinone. Dok wacikowu bene ni, ¹² wulub kit kwo ma myero bot Lubaŋa ma olwoŋowu i kerre ki i deyone. ¹³ Man aye gin mumiyo wapwoyo Lubaŋa kare ki kare, pien cakke ma wugamo lok pa Lubaŋa ma wuwinyo ki botwa, pe wugamo macalo lok pa dano, ento macalo lok pa Lubaŋa. Ada aye lok pa Lubaŋa tye bene ka tic i iwu wun jo muye Yecu. ¹⁴ Utmegiwa, wun bene wumako kit pa lwak jo muye Lubaŋa ma tye i Kricito Yecu, i kabedo ducu ma tye i Judaya, pien wun bene wuneno can ki bot lutuwu kikome ma rom ki can ma gin guneno bot Lujudaya, ¹⁵ ma ceŋ guneko Rwot Yecu ki lunebi, ka guryemowa woko bene. Pe guyomo cwiny Lubaŋa, ento gupyem apyema ki jo ducu, ¹⁶ kun gigeŋowa me tito lok bot Lurok wek gularre. Man omiyo gumedde ameda ki timo gin marac. Ento akemo pa Lubaŋa doŋ obino woko i komgi matwal. ¹⁷ Utmegiwa, ka ceŋ gipokowa woko kwedwu pi kare manok, i kom ento pe i cwiny, watemo twatwal ki miti madwoŋ me noŋo yo wek dok wanenne kwedwu waŋ ki waŋ. ¹⁸ Yam onoŋo wamito mada me bino botwu. An Paulo atemo tyen mapol, ento Catan ogeŋowa woko. ¹⁹ Genwa ki yomcwinywa ki lalukana me nyattewa i nyim Rwot Yecu Kricito i dwogone, en gin aŋo? Pe wun? ²⁰ Pien wun aye wubedo deyowa ki yomcwinywa.