¹ A bo a ba raya a re; " Ammaaruri ke a lo raya, gona le bangwe ba lona ba ba emeng fa ba ba se kitlang ba swa pele ga ba bona bogosi jwa legodimo bo tla ka nnofo. ² Morago ga malatsi a marataro, "Jeso a tsaya Petere, Jakoba le Johane a ya le bone mo thabeng. Jaanong a fetolwa tebego fa pele ga bone. ³ Diaparo tsa gagwe tsa tsabakela,tsa nna ditsweu tshweu, go feta jaaka di ka tlhatswiwa ka sepe fela se se sweufatsang mo lefatsheng. ⁴ Jaanong Elisha le Moshe ba bonala fa go bone ba bua le Jeso. ⁵ Petere a araba a raya Jeso a re; "Rabi" go molemo mo go rona go nna fa, jaanong a re ageng metlaagana ele meraro,o mongwe wa gago, o mongwe wa ga Moshe, o mongwe wa ga Elisha, ⁶ (ka gore one a sa itse gore o ka reng ka ba ne ba tshogile.) ⁷ Leru la tla la ba khurumetsa. Jalo ga tswa lentswe mo lerung le re; "Yo ke Morwaake yo ke mo ratang. Mo utlweng. ⁸ "Ka bonako fa ba leba fa go bone ba seka ba tlhola ba bona ope a na le bone fa e se Jeso fela. ⁹ Fa ba fologela go tswa kwa thabeng, a ba laela gore ba seka ba bolelela ope ka se ba se boneng, go fitlhelela Morwa Motho a tsoga mo baswing, ¹⁰ Jalo ba ipeela kgang e mo go bone fela, mme ba botsanya ba re, "go tsoga mo baswing" go ka tswa go tewa eng. ¹¹ Ba mmotsa ba re; "ke eng bakwadi ba molao ba re Elija o tlaa tla pele?" ¹² A ba raya a re, "Elija ka nnete o tlaa tla pele go tla go buseletsa dilo tsotlhe. Jaanong ke eng go kwadilwe gotwe Morwa Motho o tshwanetse go bogisiwa ka dilo tse dintsi abo a tsewa jaaka yo o senang boleng? ¹³ Mme ke le raya ke re Elija o tsile, mme ba mo dirile sengwe le sengwe se ba se batlang, jaaka dikwalo di buile ka ene". ¹⁴ Fa ba boela gape ko barutweng, ba bona bontsi jwa batho bo ba dikologile le bakwadi ba molao ba ganetsana le bone. ¹⁵ Ya re ba mmona, batho botlhe ba gakgamala ba tabogela ko go ene go mo dumedisa. ¹⁶ A botsa barutwa ba gagwe; "le ganetsana le bone ka eng?" ¹⁷ Mongwe mo bontsing joo a mo araba; "Moruti, ke tsisitse morwa wame ko go wena.O na le moya o o dirang gore a seka a kgona go bua. ¹⁸ O a mo tshwara, o mo latlhela fa fatshe,a phoke lehulo mo ganong,a phure meno a bo a gagamala. Ke kopile barutwa ba gago go o kobela ntle mme ba seka ba kgona." ¹⁹ A ba araba, "Kokomane e e sa dumeleng, ke tshwanetse go nna le lona lebaka le le kae? ke le itshokele go fitlhela leng? Mo tsiseng kwano." ²⁰ Ba tsisa mosimane ko go ene. Fa moya o bona Jeso, ka bofefo wa mo tsikitletsa thata. Mosimane a wela fa fatshe a phoka lehulo mo ganong. ²¹ Jeso a botsa rraagwe, "O sa le a nna jaana leng"? Rraagwe a re, "Go tswa bonnyeng jwa gagwe. ²² Fa gongwe o mo latlhela mo molelong kana mo metsing o leka go mo senya. Fa go na le se o ka se dirang, re utlwele botlhoko o re thuse." ²³ Jeso a mo raya a re, "ke eng o re fa o ka kgona'? Dilo tsotlhe di a kgonafala mo go ba ba dumelang", ²⁴ Ka bonako rraagwe ngwana a lelela ko godimo a re, "Ke a dumela! Nthusa mo go sa dumeleng game". ²⁵ Erile Jeso a bona batho ba bantsi ba tla ba tabogetse ko go bone,a kgalemela moya o o bosula a re, "Wena moya wa bomumu le bosusu, ke a go laola,tswaya mo go ene, ebile o seka wa tlhola o tsena mo go ene gape." ²⁶ Wa lelela ko godimo o tsikitletsa mosimane mo go golo mme wa tswa. Mosimane a lebega jaaka e kete o sule, mo bontsi bo neng bo re, "o sule". ²⁷ Mme Jeso a mo tsaya ka letsogo a mo emeletsa, mosimane a ema ka dinao. ²⁸ Fa Jeso a tsena mo ntlong, barutwa ba gagwe ba mmotsa mo sephiring, "Ke eng re ne re sa kgone go o kobela ntle?" ²⁹ A ba raya are, "Wa mofuta o, ga o nke o ntshiwa ko ntle ga thapelo le go itima dijo". ³⁰ Ba tswa foo,ba feta ka Galalea.A seka a batla ope a itse fa ba neng ba le teng, ³¹ ka go re o ne a ruta barutwa ba gagwe. A ba raya a re, "Morwa Motho o tlaa neelwa mo diatleng tsa batho mme ba tlaa mmolaya. Fa a sena go bolawa, morago ga malatsi a le mararo o tlaa tsoga gape". ³² Mme ba seka ba tlhaloganya kgang e, ba tshaba go mmotsa. ³³ Ba tla mo Kaperenaume. Ya re a le mo ntlong a ba botsa, "Le ne le buaisanya ka eng fa le tla mo tseleng"? ³⁴ Mme ba didimala. Ka go re ba ne ba tla ba ganetsana mo tseleng ka gore ke mang yo mogolo. ³⁵ A nna fa fatshe, a bitsa ba ba lesome le bobedi ga mmogo, a ba raya a re, "Fa go na le mongwe yo o batlang go nna wa ntlha, o tshwanetse go nna wa bofelo le motlhanka wa botlhe." ³⁶ A tsaya ngwana yo monnye, a mmaya fa gare ga bone. A mo tshwara ka matsogo a ba raya a re, ³⁷ "Yo o amogelang ngwana yo o tshwanang le yo mo leineng lame, le nna o nkamogetse, mme fa mongwe a nkamogela, ga a nkamogele ke le nosi, o amogela le yo o nthomileng.'' ³⁸ Johane a mo raya a re, "Moruti re bone mongwe a ntsha mewa e e bosula ka leina la gago mme ra mo emisa,ka go re ga a re sale morago, ³⁹ "Mme Jeso a re, "le seka la mo emisa, gonne ga go na ope yo o ka dirang tiro e ntle ka leina lame mme morago ga moo a bua bosula ka leina lame. ⁴⁰ Ope yo o seng kgatlhanong le rona ke wa rona. ⁴¹ Ope yo o go sielang metsi go re o nwe ka go re o wa ga Keresete, ka nnete ke a le raya, ga a kake a latlhegelwa ke tuelo ya gagwe. ⁴² Ope yo o ka dirang go re ba ba botlana ba ba ntshetseng morago ba kgopiwe, go tlaa bo go le botoka go re a gokelelwe letlapa le letona la tshilo mo molaleng mme a latlhelwe mo lewatleng. ⁴³ Fa letsogo la gago le go leofisa, le kgaole. Ka go re go botoka go tsena mo botshelong o le segole go na le go ya diheleng o na le matsogo a mabedi mo molelong o o sa timeng. ⁴⁴ Kwa seboko se teng se sa sweng,le molelo wa teng o sa tingweng. ⁴⁵ Fa lenao la gago le dira go re o kgopiwe le kgaole. Go botoka go re o tsene mo botshelong o le segole go na le go nna le maoto a mabedi o bo o latlhelwa mo diheleng. ⁴⁶ Kwa seboko sa teng se sa sweng,le molelo wa teng o sa tingweng ⁴⁷ Fa leitlho la gago le go dira go re o kgopiwe, le gonye, go botoka go tsena ka bogosi jwa legodimo ka leitlho le le lengwe go na le go nna le matlho a mabedi o bo o latlhelwa mo diheleng, ⁴⁸ Ko seboko sa teng se sa sweng,le molelo wa teng o sa tingweng. ⁴⁹ Gonne mongwe le mongwe o tsile go lokwa ka molelo. ⁵⁰ Letswai le molemo, mme fa letswai le latlhegetswe ke boleng, o ka le dira letswai gape jang? Nnang le letswai mo go lona mme le nne ka kagiso ga mmogo.