¹ Mme Jeso a simolola go ba ruta ka ditshwantsho. A re,"Monnna o ne a lema tshingwana, a bo a e agelela, a epa seboana se go gamolelwang mofine mo go sone. A aga ntlo ya badisa dikago, a hirisetsa balemi ba mofine tshimo. Jalo a tsaya loeto. ² E ne ya re fa nako e fitlha, a roma motlhanka kwa baleming ba mofine, go ya go tsaya maungo a a tswang mo tshingwaneng. ³ Mme ba mo tshwara, ba mmetsa, ba mmusetsa morago a sa tshola sepe. ⁴ O ne a ba romelelela mothanka yo mongwe gape, ba mo utlwisa botlhoko mo tlhogong ba mo dira dilo tse di tlhabisang ditlhong. ⁵ A roma yo mongwe, mme ba mmolaya. Ba ne ba dira se se tshwanang le mo go ba ba latelang, bangwe ba ba betsa fa ba bangwe ba ba bolaya. ⁶ O ne a santse a na le motho a le mongwe go mo roma, morwa yo o rategang. Ke ene wa bofelo go mo roma kwa go bone. A re, "Ba tla tlotla morwaake." ⁷ Balemi ba mofine ba ne ba raana ba re, "Yo ke moja boswa. Tlaang re mmolaeng, boswa e tla nna jwa rona". ⁸ Ba mo tshwara, ba mmolaya, ba mo latlhela kwa ntle ga tshingwana ya mofine. ⁹ Jaanong, mong wa tshingwana ya mofine o ka dira eng ? O tla atla go senya balemi ba mofine, a neele ba bangwe tshingwana. ¹⁰ A ga le ise le bale lekwalo le? Lentswe le baagi ba le ganneng, le dirilwe pinagare. ¹¹ Se se ne se tswa kwa Moreneng, mme go a kgatlhisa mo matlhong a rona." ¹² Ba ne ba batla go tshwara Jeso, mme ba boifa bontsi jwa batho, ka ba ne ba itse fa a buile setshwantsho se kgatlhanong le bone. Ba mo tlogela, mme ba tsamaya. ¹³ Mme ba roma bangwe ba Bafarasai le ba ga Herote go mo tshwara ka mafoko. ¹⁴ Fa ba goroga, ba mo raya ba re, "Moruti, re a itse gore ga o kgathale ka mogopolo wa ga ope, ebile ga o tseye letlhakori lepe. O ruta tsela ya Modimo ka boammaaruri. Aa go ka fa molaong go duela Kaisara lekgetlho kana nyaa? Aa re duele kana nyaa?" ¹⁵ Jeso a itse boitimokanyi jwa bone, a ba raya a re, "Ke eng le nteka? Tsisang kwano ledi ke tle ke le lebelele." ¹⁶ Ba le tsisa kwa go Jeso. A ba raya a re, "Setshwantsho se le mokwalo o, ke tsa ga mang?" Ba re, "Tsa ga Kaisara" ¹⁷ Jeso a re, "Neelang Kaisara tse e leng tsa ga Kaisara, Modimo dilo tse e leng tsa Modimo." Ba mo gakgamalela. ¹⁸ Basadukai, ba ba reng ga gona tsogo, ba tla kwa go ene. Ba mmotsa ba re, ¹⁹ "Moruti, Moshe o re kwaletse a re, 'fa monna a tlhokafalelwa ke morwa rraagagwe, a tlogela mosadi, a sena ngwana, monna yo o tshwanetse a tsaya mosadi wa ga morwa rraagwe a tsalele monnawe bana.' ²⁰ Ga bo go le batsalwammogo ba borre ba le supa, wa ntlha a nyala mosadi mme a tlhokafala, a sa tlhogele ngwana. ²¹ Wa bobedi a tsaya mosadi yoo, a tlhokafala le ene a sa tlogele bana. Wa boraro le ene a dira jalo. ²² Le wa bosupa a seka a tlogela bana. Sa bofelo mosadi le ene a tlhokafala. ²³ Fa ba tsoga botlhe ka nako ya tsogo, mosadi e tla nna wa ga mang? Ka go re o ne a le mosadi wa batsalwammogo ba ba supa ba botlhe. ²⁴ Jeso a re, "A ga se lone lebaka la go re le bo le fositse, ka gore ga le itse dikwalo le fa e le go tlhaloganya maatla a Modimo? ²⁵ Gonne fa ba tsoga mo baswing, ga ba na go nyalana, kana ba nyadisiwa, ba tla nna jaaka baengele ko legodimong. ²⁶ Ka ga baswi ba ba tsosiwang, a ga lo a bala mo Lekwalong la ga Moshe, ka ga sekgwa, ka fa Modimo a buileng le ene a re, 'Ke Modimo wa ga Aborahama, ke Modimo wa ga Isake, le Modimo wa ga Jakobe. ²⁷ Ga se Modimo wa baswi, mme ke wa batshedi. Le fositse.'' ²⁸ Mongwe wa bakwadi a tla, a utlwa puisano ya bone, a bona go re Jeso o ba arabile sentle. A mmotsa, "Ke efe taolo e e botlhokwa thata mo go tsone tsotlhe?" ²⁹ Jeso a araba, "E e botlhokwa thata ke go re, "Utlwang Iseraele; Morena Modimo wa rona, Morena o mongwefela. ³⁰ O tshwanetse wa rata Morena Modimo wa gago ka pelo ya gago yotlhe, le ka moya wa gago otlhe, ka tlhaloganyo ya gago yotlhe, le ka nonofo ya gago yotlhe. ³¹ Taolo ya bobedi ke e, 'O rate moagisanyi wa gago jaaka o ithata.' Ga gona taolo epe e kgolo gona le tse.'' ³² Mokwadi a re, "Moruti yo molemo! O buile sentle fa o re Modimo o mongwefela, ga gona yo mongwe kwa ntle ga gagwe. ³³ Go mo rata ka pelo yotlhe, ka tlhaloganyo le ka nonofo, le go rata moagisanyi wa gago jaaka o ithata, go feta setlhabelo se se tshubiwang le ditlhabelo tse dingwe.'' ³⁴ Fa Jeso a bona a arabile ka botlhale, a mo raya a re, "Ga o kgakala le bogosi jwa Modimo.'' Morago ga moo, ga bo go sena yo o pelokgale go botsa Jeso dipotso gape. ³⁵ Mme Jeso a fetola, fa a ruta mo tempeleng a re, "Ke eng bakwadi ba re Keresete ke morwa Tafita? ³⁶ Fa Tafita a le mo Moyeng o o Boitshepo, o ne a re, "Morena o reile Morena wame a re, nna ka fa letsogong la me la moja go fitlhelela ke dira baba ba gago bonno jwa dinao tsa gago. ³⁷ Tafita ka bo ene o mmitsa "Morena", Mesia o ka nna morwa Tafita jang?'' Bontsi jwa batho ba mo reetsa ka boitumelo. ³⁸ Mo dithutong tsa gagwe Jeso o ne a re, "Elang tlhoko bakwadi, ba ba ratang go tsamaya ba apere dilwana tse di telele le go dumedisiwa mo marekisetsong ³⁹ le go nna mo ditilong tsa segosi mo sinagogeng le mo mannong a segosi mo meletlong. ⁴⁰ Ba utswa matlo a batlholagadi, ba rapele ditlhapelo tse ditelele go bonwa ke batho.Batho ba ba tla amogela katlholo e kgolo". ⁴¹ Jeso a nna fa tlatlaneng ya moneelo mo tempeleng, a bo a lebeletse batho jaaka ba latlhela madi a bone mo tlatlaneng. Bontsi jwa bahumi ba tsenya madi a mantsi. ⁴² Ga tla motlholagadi wa mohumanegi a tsenya dithebe tse pedi. ⁴³ A bitsa barutwa ba gagwe a ba raya a re, "Ke le bolelelela nnete motlholagadi yo wa mohumanegi o neetse go feta botlhe ba ba neetseng mo tlatlaneng ya moneelo. ⁴⁴ Gonne botlhe ba neetse go tswa mo lehumong la bone. Mme motlholagadi yo go tswa mo lehumeng la gagwe o neetse madi otlhe a gagwe a a ka tshelang ka one.