¹ Panthawi ila Yesu epitila muminda ya tiligu pa sabata. Ophunzila bake echimvwa njala noyamba kutyola tumitu kwa tiligu na kundya. ² Koma Afalisi peona teto, eciti kwa Yesu, "onani, ophunzira banu ocita cosavomelezyeka pa sabata." ³ Koma Yesu eciti kwa beve, "ko muluiye belenge zecita Davide pecimvwa njala, na banthu benze pamozi naye? ⁴ Eloba mung'anda ya Mulungu nakulya buledi yopatulika, camene cili cosavomelezyeka kwa beve benze nawo, koma ansembe beka. ⁵ Ko muliye belenge mulamulo kuti pasabata asembe ephwanya sabata koma aliye mulandu? ⁶ Koma nukuuzyani kuti yeve ali mukulu opambana kacisi ali pano. ⁷ Sembe mwenzoziba tanthauzo ya ici cakuti, 'nufunishisha cifundo osati nsembe,' sembe mubapa lini mulandu aba pakuti baliye mulandu. ⁸ Pakuti mwana wa munthu ndiye Mbuye wa sabata." ⁹ Yesu efumapo nakuyoloba mu sinagoge wao. ¹⁰ Onani, mwenze munthu enze nakwanja yo lemala. Afalisi emkosha Yesu, kuti, "ko ncovomelezyeka kupolesha pa sabata?" Kuti ampeze ucimo. ¹¹ Yesu eciti kwa beve, "nimunthu otyani angapezeke pakati panu, wakuti, ana mbelele imozi tyala, lomba yamene iyo yaponela mucisengu pa sabata, sangaikate noicosamo? ¹² Maka-maka uyu, lomba, munthu socila mbelele! Lomba nicovomelezyeka kucita cabwino pa sabata." ¹³ Yesu eciti kwa mwanalume, "tambulula kwanja yako." Eyitambulula, nowelela muubwino, nolingana naiyake. ¹⁴ Koma Afalisi ecokamo nakuyopangana mwati amcitile ciipa. Enzosakila njila yakuti ampailemo. ¹⁵ Yesu peziba ici, nocokako. Anyinji emukonkha, soti ebalopesha onse. ¹⁶ Ebalamulila kuti asamzibishe kubanthu ayakine, ¹⁷ kuti cikwanilishiwe, cenenewa namneneli Yesaya, kuti, ¹⁸ "Onani, wancito wangu wanasankha; okondeka wangu, mwa yeve moyo wangu ukondwela. Niike mzimu wangu pa yeve, soti akalalikile cilungamo ku akunja. ¹⁹ Akangane lini olo kulila mokuwa; kuliye wati akamvwe mau yake mumanjila. ²⁰ Akaitende lini litete yopwanyika, nyale yoyaka patontho akaizimyiletu lini mpaka akasogolele cilungamo kuti cikapambane, ²¹ na mzina yake akunja akapeze ciyembekezo." ²² Namuyakine enzolanga lini nosalabila, enze na cibanda mwa yeve emuleta kwa Yesu. Emupolesha, nazefumamo zeoneka ndaba elabila nolanga. ²³ Magulu yonse yedabwa nolabila kuti, "uyu munthu angabe mwana wa Davide?" ²⁴ Koma Afalisi pecimvwa za codabwisa ici, eciti, "uyu munthu opilikisha vibanda na Belezebulu, mkulu wa vibanda." ²⁵ Koma Yesu eziba zebenzoganiza eciti kwa beve, "Ufumu ulionse ugabikana weka uonongeka, na mzinda olo nanda yogabikana yeka ingapaname lini. ²⁶ Ngati satana opilikisha satana, ndiye kuti niogabikana yeka, Nanga ufumu wake ungapaname tyani? ²⁷ Ngati neo nucosa vibanda na belezebulu, nanga banabanu ocosa na bani? Kamba ka ici bakankhale okuweluzani. ²⁸ Koma ngati nucosa vibanda na mzimu wa Mulungu, ndiye kuti ufumu wa Mulungu wawela pa mweo. ²⁹ Munthu angalobe tyani mung'anda ya munthu wamphamvu nakumuibila katundu akaliyo mumanga munthu wamphamvu poyamba? Ndiye pangamuibile katundu mung'anda yake. ³⁰ Wala ali lini naneo okangana nane, wala osaungana nane omwazya. ³¹ lomba nukuuzyani, cimo iliyonse na kunyozela kulikonse banthu akakhulukiwe, koma onyozela mzimu utuba akakhululukiwe lini. ³² Aliyense olabila ciipa kulabilila mwana wa munthu, akakhululukiwe. Koma olabila ciipa mzimu utuba, akakhululukiwe lini. mungankhale mucalo cino, olo cukuza. ³³ Panga bwino cimuti na na cipaso cake cibe cabwino, koma ngati cimuti uliye cipange bwino nacipaso cake cunkhala lini bwino, pakuti cimuti cuzibika na cipaso cake. ³⁴ Imwe bana ba njoka, pakuti mweo nimwe aipa, mungalabile tyani cinthu cabwino? Mkuzula kwa vamumtima ndiye vuyulabila kamwa. ³⁵ Munthu wabwino kulingana na zabwino zili mumtima wake oonesha zabwino, naye muyipa kamba ka ziipa zili mumtima mwake oonesha ziipa. ³⁶ Nukuuzyani kuti pa siku yaciweluzo banthu bakapasiwe mulandu pa liu ilionse yebelabila iipa. ³⁷ Kamba ka mau yanu mukalungamishiwe, kamba ka mau yanu mukasushiwe." ³⁸ Mulembi muyakine na mufalisi eyankha Yesu kuti, "Mphunzisi, tufuna tione cizibisho kwa mweo." ³⁹ Koma Yesu ebayankha kuti, "mbadwe oipa soti wacigololo ufuna cizibisho. Koma kuliye cizibisho cati cipasiwe koma ca Yona mneneli tyala. ⁴⁰ Koma mwecinkhalila Yona mmala mwa nsomba masiku yatatu nausiku wake utatu, ndiye mwati akankhalile mwana wa munthu masiku yatatu na usiku utatu mumtima wa nthaka. ⁴¹ Banthu baku Ninive bakapaname paciweluzo kususha banthu ba mbadwe uno. Ndaba betembenuka pelalikila Yona, Lomba onani, mukulu opambana na Yona ali pano. ⁴² Nkhosikazi yaku mwela ikapanamepaciweluzo nauno mbadwe kuususha. Echokela kosilizyila calo kuzokumvwa nzelu kwa Solomoni, lomba onani, mkulu opambana Solomoni ali pano. ⁴³ Paliponse mzimu uipa ukufuma mwa munthu upita mmalo ayumu kusakila popumulila, koma supezapo. ⁴⁴ Lomba ulabila kuti , 'niwelele kunanda kwenecoka.' Ukawelela, uyipeze yopyela nokonzewa bwino. ⁴⁵ Lomba uwelela nokuyotola mizimu iyake seveni iipa yopambana na weve wamene uyu, yonse yoloba kuzonkhalaumo. Nkhalidwe ya munthu uyo yosilizyila yukuba iipa kupambana nayakale. Ndiye mwati cikankhalile nambadwe uno." ⁴⁶ Yesu akalulabila namagulu, onani, anyina na azinekwao bewela nopanama panja, enzofuna kulabila naye. ⁴⁷ Munthu muyakine emuuzya kuti, "onani, anyina wanu na azinekwanu apanama panja, ofuna kulabila namweo." ⁴⁸ Koma Yesu eyankha nomuuzya kuti, "Amama nazinekwasu nibani?" ⁴⁹ Pamene apo etambulula kwanja nolata ophunzila bake nolabila kuti, "onani, abandiyo amama nazinekwasu! ⁵⁰ Aliyense ocita cifunilo ca atata wa kululu, wamene uyu ndiye mukwasu, mulongosi, na amama."