¹ Pecisilijya Yesu kubaujya ophunzila bake twelufu, ecokako kula nakuyo phunzisha na kulalikira mu mizinda yao. ² Lomba Yohane pecimvwa mu jele za zocita za Kristu, etumijya uthenga kwa ophunzila bake ³ nakuti kwa eve, ''niweo ukuza olo tilindile muyakine?'' ⁴ Yesu eyankha nakuti kwa beve, ''nkhoyani mukamuujye Yohane zaimwaona na mwamvwa. ⁵ Asalanga olanga, olemala mendo oyenda, bamambombo okonzewa, osamvwa akumvwa soti, akufwa oukishiwa nakunkhala soti amoyo, ndipo uthenga wabwino ulalikiwa ku wosauka. ⁶ Odalisika ni aliyense wamene osakhumudwa cifukwa ca neo. ^{7 8} Pamene aba banthu beluta, Yesu eyamba kulabila namagulu za Yohane, ''mukuya kunja kucipululu kuyoona cinji-Matete ogwendezeka na mphepo? Koma mweluta kunja kuyoona cinji-munthu ovwala covwala cofeba? cacendi, bala bamene ovwala covwala cofeba onkhala mumang'anda ya mafumu. ⁹ Koma mweluta kunja kuyoona-mneneri? Ee, nulabila kwa mweo, na woposa mneneri. ¹⁰ Uyu mwana elembewa za eve 'onani, nutumijya muthenga pa menso panu, wati akakonze njila yanu.' ¹¹ Nulabila kwa mweo zoona, paliye euka pa bala ebadwa kwa mwanakazi aliyemukulene kuposa Yohane Mbatizi. Ula munthu mutontho mu ufumu wa kululu nimukuleni kuposa mwalili. ¹² Kufumila masiku a Yohane Mbatizi mpaka lomba, Ufumu wa kululu uvutishiwa, na banthu ovutisha outola na mphamvu. ¹³ Pakuti aneneri bonse na cilamulo cenenela mpaka Yohane; ¹⁴ nakuti ngati mufuna kucivomela ici, ni Eliya enzofunika kuza. ¹⁵ Eve ali na matu ya kumvwa, lekani eve amvwe. ¹⁶ Niulinganijye na cinji mbadwo uyu? olingana na bana osebela mu msika, amene onkhala na kuitana ¹⁷ nakuti, ''tekuljyilani mtolilo, ndipo muliye vine. Telila, ndipo muliye lile nase.' ¹⁸ Pakuti Yohane ewela osandya buledi olo mukumwa vinyu, ndipo olabila kuti, 'ali na vibanda.' ¹⁹ Mwana wa mutnhu ewela kulya na kumwa ndipo bakuti, ''langani, uyu ni mkulu kulya ndipo ni cakolwa, muyawo wa okhomesha misonkho na wocimwa!' Koma nzeru yuyesewa yolungama na nchito zake.'' ²⁰ Yesu eyamba kuzuzula mizinda mwamene zodabwisha zake muzecitiwa, ndaba baliye lape. Soka kwa weo Korazini! ²¹ ''Soka kwa weo, Betisaida! ngati zodabwisha zecitika mu Turo na mu Sidoni zamene zecitiwa mwa weo, sembe betembenuka kale-kale mucovwala ca saka na milota. ²² Koma akalekelelewe ngako kwa Turo na Sidoni siku ya ciweruzo kuposa ca mweo. ²³ Weo Kapenamo, uganiza kuti ukankhale okwezewa kululu? Yai, ukankhale oselushiwa pansi ku Hade. Pakuti ngati ku Sodomo kwecita vodabwisha vamene vecitika mwa mweo, sembe vilipo mpaka lero. ²⁴ Koma nulabila kwa mweo kuti cikankhale cosavuta ku ziko la Sodomo pa siku la ciweruzo kuposa canu.'' ²⁵ Pa nthawi iyo Yesu eciti, ''nukuyamikani mweo, Atata, Ambuye wa kululu na pansi, cifukwa mwevibisa vinthu ivi kwa ba nzeru na kumvwishisha, na kuviulula kubana atontho. ²⁶ Ee Atata, pakuti ici cekuwamijyani mu menso mwanu. ²⁷ Vinthu vonse veikiwa kwa neo kufumila kwa Atata; Paliye aliyense oziba mwana kufumyako Atata, kuliye oziba Atata kufumyako mwana na aliyense kwa wala wamene mwana esankha kumuvumbulisila eve. ²⁸ Welani kwa neo, mweo monse obeba na munyamula volema, ndipo nikupaseni mpumulo. ²⁹ Nyamulani joko yangu nakuphunzila kwa neo, pakuti nine wofasa na wozicefya mu mtima, mupeze kupumula kwa myoyo yanu. ³⁰ Pakuti joko yangu niyosavuta ndipo katundu wangu niwopepuka.''