¹ Yesu eita ophunzila bake twelufu pamozi nakubapasa ulamulilo pa mizimu iipa, kuyafumya, nakupolesha mitundu yonse ya zobaba na mitundu yonse ya matenda. ² Lomba mazina ya ophunzila bake tweufu benze ni aba. Oyamba; Simoni (wenzomuita soti kuti Petulo), na Andereya mkwao; Jemusi mwana wa Zebediya, na Yohane mkwao; ³ Philipo, na Batulumeyo; Thomasi, na Mateyo wosonkhesha msonkho; Jemusi mwana wa Alifeyo, na Tadeyo; ⁴ Simoni waku Kanani, na Yudasi Iskarioti, emupeleka eve. ⁵ Aba tweulufu Yesu ebatuma kunja. Ebalangiza nakuti, "osaluta kumalo alionse kwakunkhala akunja, nakusaloba mumzinda ulionse wa Asamaliya. ⁶ M'malo mwake mulute ku mbelele zosoba za mng'anda ya Israeli; ⁷ Ndipo pamukuya, lalikilani kuti, 'ufumu wawela pafupi.' ⁸ Poleshani olwala, ukishani akufwa, tubishani ba makhate, na kufumya vibanda. Mwaulele mwalandila, mwaulele pasani. ⁹ Musanyamule golide, siliva olo kopamu vikwama vanu. ¹⁰ Osanyamula cola ca paulendo wanu, olo malaya apadela, olo nsapato, olo ndodo, pakuti wanchito oyenela cakulya cake. ¹¹ Uliwonse mzinda olo munzi wati mukalobemo, mufune oyenela mwamene umo, ndipo munkhale mwamene umo mpaka kufumako. ¹² Pamuloba mng'anda pelekani moni. ¹³ Ngati ng'anda niyonela, lekani metendele wanu unkhale pa eve. Koma ngati niyosayenela lekani mtendele wanu uwelele kwa mweo. ¹⁴ Kwa bala osakulandilani, olo kumvwilila mau banu, pofuma mu ng'anda olo mumzinda, kunkhumulani kakungu wa ku mendo kwanu. ¹⁵ Moona nukuti kwa mweo, ukabe wocepa mulandu wa Sodoma na Gomola mu siku laciweluzo kusiyana na mzinda uyo. ¹⁶ Onani, neo tumizhya mweo monga mbelele pakati pa nkhandwe, teto mubeocenjela monga njoka na oona monga nkhunda. ¹⁷ Cenjelani nao banthu! beve akakupelekeni kwa akulu oweluza nao akakukwapuleni mumasunagoge bao. ¹⁸ Ndipo akakuleteni kwa akambe na ma mfumu cifukwa ca neo, ngati umboni kwa beve na kwa akunja. ¹⁹ Akayokupelekani mweo, osataya mtima mwati olo zati mweo mulabile, pakuti colabila mukapaswe pa nthawi iyo. ²⁰ Pakuti nimweo lini mwati mukalabile, koma muzimu wa Ausuwanu ndiye wati akalabile mwa mweo. ²¹ Pokwao akapelekane ku imfwa, na awisi mwana wao.Bana akaukile makolo bao nopangisha kuti beve akapaiwe. ²² Mweo mukanzondewe na banthu onse kamba ka zina yangu. Koma wati akapilile mpaka polekezhyela, uyo munthu akapulumushiwe. ²³ Akayokunzunzani mumzinda uno, utukilani mu uyakine, pakuti moona naeo nukuti kwa mweo, simkaisilizhya mizinda ya Israeli akaliye wela mwana wa munthu. ²⁴ Ophunzila sangapambane ophunzisa, olo kapolo ambuya bake. ²⁵ Nicokwanila kuti ophunzila abe monga ni ophunzisa, na kapolo ambuya bake. Ngati beve angaite ambuya wa ng'anda Beluzebule, angaipe motyani mazina bangaite apa banja pake! ²⁶ Mwa ici osabayopa beve, pakuti paliye kobwinyikiliwa kati kakaleke kuululika, na kobisa kati kakabe kosazibika. ²⁷ Zanukuuzhyani mweo mu mdima mukalabile muzuba, na zamukumvwa mweo mu matu banu lalikilani palulu pa ng'anda ²⁸ Osayopa bala angapaye mubili koma sangapaye moyo. M'malo mwake, muyope eve okwanisha kuononga vonse vibili moyo na mubili ku gehena. ²⁹ Ko mpheta zibili suzuguliwa na ka khobili? koma paliye kakuwa pansi cosaziba Ausuwanu. ³⁰ Koma olo sisi lakumutu kwanu nilobengewa. ³¹ Osayopa. Nimwe ofunikila kupambana mpheta zinyinji ³² Mwa ici onse onilumbilila pa menso pa banthu, nane nikalumbile pa menso pa Atata ali mululu. ³³ Koma eve onikana pa menso pa banthu, nane nikamkane pa menso ba Atat ali mululu. ³⁴ Osaganiza kuti neo nuwela kuzoleta mtemdele pa calo ca pansi. Niliye wele kuzoleta mtendele, koma cingwanja. ³⁵ Pakuti neo newela kuzosiyanisha munthu na ausuwake, na mwana mwanakazi na anyina wake, na mwana mwanakazi olunguliwa na apongozi bake anakazi. ³⁶ Adani bake ba munthu akabe bala abanja lake. ³⁷ Eve ula okonda awisi olo anyina wake kopambana neo niwosaniyenela neo; eve wala okonda mwana wake mwanalume olo mwana wake mwanakazi kopambana neo, niosaniyenela. ³⁸ Eve ula osazinyamulila mtanda wake nakunikonkha neo niosaniyenela. ³⁹ Eve wala opeza umoyo wake akautaye. Koma eve wala otaya umoyo wake cifukwa ca neo akaupeze. ⁴⁰ "Eve ula okulandilani mweo olandila neo, na wala olandila neo olandila soti wala enituma neo. ⁴¹ Eve wala olandila mneneri mzina ya mneneri, akalandile mphaso ya mneneri, na eve olandila munthu olungama mzina ya munthu olungama akalandile mohaso ya mnthu olungama. ⁴² Aliwonse opasa kwa umozi wa aba atontho atontho olo cikho ca manzi ozizila kuti amwe mu zina la opunzila, moona nukuuzhyani, eve sakataya mwanjila iliyonse mphaso yake."