¹ Pasiku ilo Yesu efuma mung'anda na kunkhala mumbali mwa nyanja. ² Gulu likulu la banthu lesonkhana nakumzungulila, moteto eloba mu boti na kunkhala pamene gulu lonse lepanama mumbali mwa nyanja. ³ Ndipo Yesu elabila vinyinji mu mafanizo, eciti, ''Onani, mulimi eciyofesa mbeu. ⁴ Pofesa pala, ziyakine zeponera mumbali mwa njila, na nyoni ziwela na kulya mbeu. ⁵ Ziyakine zeponera pa miyala, penzeve lito linyinji. Pamene apo zimela pakuti lito lenze lini lakuya ngako. ⁶ Koma zuba pelebala, zefota ndaba lito yezeve mijyu, ndipo zeyuma. ⁷ Mbeu ziyakine zeponela pa minga. Minga zekula nakuchamwisha mbeu zila. ⁸ Mbeu ziyakine zeponela pa nthaka yabwino na kuthwala vipaso, ziyakine ma handiledi, ziyakine ma sikisite, ziyakine ma sate. ⁹ Uyo anamatu lekani amvwe.'' ¹⁰ Ophunzila ewela nakulabila kwa Yesu kuti, ''mulabililanji na banthu mumafanizo?'' ¹¹ Yesu ebayankha nakuti, ''mweo mwapasiwa mwaiwa kumvwishisha visinsi va ufumu wa kululu, koma kwa beve mwai uyu uliyepasiwe. ¹² Pakuti kwa ula alinavo kukapasiwe viyakine, ndipo akabe navo vinyinji. Koma ula aliye akalondewe nacalinaco. ¹³ Niye cifukwa cake nulabila nao mumafanizo: Pakuti olo olanga, olangishisha lini; olo kuti bakumvwa, bakumvwa lini, olo kuzindikila. ¹⁴ Kwa beve uneneli wa Yesaya ukwanilishiwa, wonena kuti, 'pakumva mukokumwa, koma simuza zindikila; kulanga mukolanga koma, mukozindikila lini. ¹⁵ Pakuti mitima ya banthu yankhala iliye nzeru, bankhala ovuta kumvwa, ndipo bavala meso yao, kuti basaone na meso yao, olo kumvwa na matu yao, olo kuzindikila na mitima yao, kuti batembenuke soti, ndipo ningaba cilishe.' ¹⁶ Koma niyodalisika meso yanu, pakuti yolanga, na matu yanu pakuti yakumvwa. ¹⁷ Nicendi nulabila kwa mweo kuti aneneli anyinji na banthu anyinji olungama benzofunishisha kuona vinyinji vumuona koma baliye vione. benzofunishisha kumvwa vamaukumvwa vinthu vamukumvwa koma baliye vimvwe. ¹⁸ Mvwani lomba fanizo ya mulimi ula eciyofesa mbweu. ¹⁹ Pamene aliyense akumvwa mau aufumu koma osamvwishisha, muipa owela nakumucosela mau bala bacaliwa mumtima mwake. Iyi niyembeu yefesewa mumbali ya njila. ²⁰ Yamene yecaliwa pa miyala ni munthu wamvwa mau ndipo pamene apo oyalandila mokondwela, ²¹ Koma aliye mijyu mwa eve eka ndipo nopilila mwa kanthawi katontho. lomba kamba ka mavuto na vobaba vuwela kamba ka mau, opona mwamsanga-msanga. ²² Zamene zecaliwa pa minga, uyu ni munthu akumvwa mau, koma vosamalila va moyo uno na cinyengo ca cuma vuchamwisha mau, ndipo othwala lini vipaso. ²³ Zila mbeu zefesewa pa nthaka yabwino, niula munthu akumvwa mau nomvishisha, othwala vipaso nakuleta mbeu, nakubala ziyakine handiledi, ziyakine sikisite ndipo ziyakine sate kulingana na mwecalila.'' ²⁴ Yesu epasa iyakine fanizo. Eciti, ''Ufumu waku lulu uli ngati munthu efesa mbeu zabwino mu munda wake. ²⁵ Koma banthu pebenzelele, mdani wake ewela nakufesa viuzu pakati pa tiligu nakuluta. ²⁶ Pevemela na kuthwala vipaso, viuzu veonekela navo. ²⁷ Banchito ba mwinekazi wa munda bewela nakumuujya kuti, 'baba muliye cale tyala mbeu zabwino zeka mu munda mwanu? lomba nanga mwankhala tyani viuzu?' ²⁸ ''eciti kwa beve, 'mdani niye wacita teti.' banchito eciti kwa yeve, 'mufuna kuti tivinyule?' ²⁹ Mwinekazi wa munda eciti, ''Yai pakuti ponyula viuzu, munganyulile pamozi na tiligu. ³⁰ Lekani vonse vikulile pamozi mpaka powejya. Pa nthawi yowejya nikaujye bala owejya kuti, ''poyamba nyulani viuzu nakuvimanga mitolo nakuvishoka, koma unjikani tiligu nakuuika mcilulu.'''' ³¹ Ndipo Yesu ebapasa liyakine fanizo eciti, ''Ufumu wa kululu uli ngati ka mbeu ka mpilu kamene munthu etola nakufesa m'munda mwake. ³² Aka kambeu nikatontho pa mbeu zonse. Koma kakakula, nikakulu kuposa mbeu zonse za m'munda. konkhala cimuti, kwakuti nyoni za mululu zikuza nakuzopanga visa mu misambo yake.'' ³³ Yesu ebaujya fanizo liyakine. ''Ufumu wa kululu uli ngati yisiti yamene yetola mwanakazi muyakine naku yavijya na vipamba vitatu va unga wa tiligu mpaka vafufuma.'' ³⁴ Vinthu ivi Yesu elabila kuma gulu yabanthu mu ma fanizo; ndipo aliye labile nao kuliye fanizo. ³⁵ Ici cenze teto kuti velabilika kupitila mu m'neneli vikakwanilishiwe, peciti, ''Nikavule kamwa yangu mumafanizo. nikalabile vinthu vebisika kuyambila pa maziko ya ziko.'' ³⁶ Ndipo Yesu ebasiya magulu yala nakuloba mung'anda. Ophunzila bake bewela kwa eve nakuti, ''Mutimasulile fanizo ya viuzu va m'munda.'' ³⁷ Yesu eyankha kuti, '' wamene ofesa mbeu ni mwana wa munthu. ³⁸ Munda ni ziko ya pansi; na mbeu zabwino, aba ni bana ba mu Ufumu. Viuzu ni bana baula muyipa, ³⁹ ndipo mdani ebafesa ni mdielekezi. kuwejya ni kusila kwa ziko nabala owejya ni angelo. ⁴⁰ Mwa ici, pemene viuzu vusonkhanishiwa na kushokewa pamoto, niye mwati cikabele posila kwa ziko. ⁴¹ Mwana wa munthu akatume angelo bake, ndipo bakaunjike kufumya mu ufumu wake vinthu vonse vuleta ucimo nabala ophwanya lamulo. ⁴² Bakaponyewe mu moto, mwati mukankhale kulila na kukuta meno. ⁴³ Ndipo banthu olungama baka wale ngati zuba mu Ufumu wa awisi wao. Ali na matu, lekani amvwe. ⁴⁴ Ufumu wa kululu uli ngati cuma cobisika m'munda. Munthu ecipeza na kucibisa. mucikondwelelo cake, eluta kuyogulisa vonse venze navo nakuyogula munda ula. ⁴⁵ Soti, ufumu wa kululu uli ngati munthu wa malonda osakila ushalo. ⁴⁶ Pepeza ushalo wamtengo ukulene, eluta nakuyogulisa vonse venze navo nakuugula. ⁴⁷ Nasoti ufumu wa kululu uli ngati khombe yeponyewa pa nyanja, nokasha somba za mtundu wonse. ⁴⁸ Peyezula, asozi eyiguzila pasilya ndipo benkhala pansi nakuunjika zabwino noika mu vitundu, koma ziyipa ezitaya. ⁴⁹ Cinkhalae teto posila kwa ziko. Angelo akawele nakupatula baipa nakubacosa pakati pa olungama. ⁵⁰ Bakaponyewe mu moto mwati mukankhale kulila na kukuta meno. ⁵¹ ''Ko mwamvwishisha vinthu ivi vonse?'' Opunzila eciti, '' Inde.'' ⁵² Ndipo Yesu eciti kwa beve, ''Mwa ici, mlembi aliyense wamene wankhala ophunzila wa Ufumu wa kululu ali ngati munthu mwine ng'anda wamene ocosa vinthu vakale na valomba mu cuma cake.'' ⁵³ Lomba cecitika nicakuti Yesu pesilijya mafanizo bala, ecokako ku malo bala. ⁵⁴ Ndipo Yesu eloba mu dela lake na kuphunzisa banthu mu sinagoge wao. Cekonkhapo nicakuti bedabwa nakuti, ''Nikuni kwawafumya nzelu uyu munthu na mphamvu yodabwisha? ⁵⁵ Uyu simwana wa mpalamathabwa? Ko anyina si Mariya? Ko azinekwao si Jemusi, Yosefe, Simoni, na Yuda? ⁵⁶ Ko azilongosi bake sitili nao pamozi? Evitola kuni vinthu ivi vonse?'' ⁵⁷ Ekhumudwa naye. Koma Yesu eciti kwa beve, ''Mneneli opasiwa lini ulemu mu ziko lake na pa banja pake.'' ⁵⁸ Aliye cite vodabwisha vinyinji kula cifukwa ca kusakhulupilila kwao.