¹ Eita ophunzila bake thwelufu panozi nobapasa mphamvu na ulamulilo ofumya vibanda nopolesha matenda. ² Ebatuma kuyolalikila ufumu wa Mulungu nopolesha olwala. ³ Ebauzya kuti, "musatole kalikonse kapaulwendo- ndodo yayi, cikwama yayi, buledi yayi, ndalama yayi, na covwala cosintha osanyamula yayi. ⁴ Nanda iliyonse yati mukalobemo, mukankhale mwamene mwala mpaka mukacokeko. ⁵ Kwati akakane kukulondelani, pofumako, mukakunkhumule kakungu kumendo kuti ukankhale umboni obasusha," ⁶ Teto befumakokula nopitila mumaminzi, enzolalikila uthenga wabwino nopolesha aliyense. ⁷ Lomba Helodi ngwazi ecimvwa zenzocitika, ndipo zemsokoneza, ndaba ayakine enzolabila kuti Yohane wauka kuakufa, ⁸ na ayakine enzekuti Eliya eonekela, na ayakine enzekuti niumozi wa aneneli akale wauka. ⁹ Helodi eciti, "Nempaya Yohane. Lomba uyu nibani wanukumvwa soti?" Pamene apo eyesa kuti amuone. ¹⁰ Pebewelela otumiwa, bemuuzya zonse zebenze becita. Lomba ebatola, nokuya nao kwabeka kumzinda uitiwa kuti Betisaida, ¹¹ Koma peyecimvwa gulu za izi, yemukonkha. Ebalondelela nobauzya za ufumu wa Mulungu, nopolesha onse kuzofunika kupoleshewa. ¹² Lomba siku yenze pafupi kusila, nabala thwelufu bewela kwa eve beciti, "batumeni aba banthu kuminzi yozungulula na kunja kuti akasakile malo na vakundya, ndaba kuno kwatili nikumbali ngako." ¹³ Koma ebauzya kuti, "bapeni mweo cakundya." Beciti, "tiliye seo koma tyala mabuledi faifi na somba zibili- Peka-peka tilute kuyogula vakulya vabanthu bonse aba." ¹⁴ (Analume enze faifi sauzande.) Eciti kwa ophunzila bake, "bauzyeni bankhale pansi mumagulu yama fifite gulu ilionse." ¹⁵ Ndipo becita ici, nonkhazika banthu pansi. ¹⁶ Etola mabuledi yala yali faifi na nsomba zibili, elanga kululu, nodalisa nonyema tutontho tutontho, nopasa ophunzila kuti bagabile gulu. ¹⁷ Onse becilya nokuta, vosalako bedoba nozyuzya maswanda yali- thwelufu yatonyema. ¹⁸ Cecitika penzopemphela Yesu payeka, ophunzila benze naye. Ebakosha, kuti, "magulu aba olabila kuti ndine bani?" ¹⁹ Bemuyankha, "Yohane mbatizi. Koma ayakine akuti Eliya, ayakine soti akuti ni umozi wa aneneli akale wauka." ²⁰ Lomba eciti kwa beve, "nanga mweo munena kuti ndine bani? Petulo eyankha kuti, "ndimwe Kristu wa Mulungu." ²¹ Koma ebacenjezya nobalangizya kuti asakauzye munthu aliyense, ²² eciti, "Mwana wa Munthu ofunika kuyovutika muzinyinji nokaniwa na akulu a mpingo, na akulu akulu ansembe na alembi, nopaiwa nakuyoushiwa pa siku yachitatu." ²³ Ndipo ebauzya bonse kuti, "aliyense ofuna kunikonkha, ofanika azikane yeka naku nyamula mtanda wake masiku onse nonikonkha. ²⁴ Aliyense ofuna kupulumusa moyo wake akautaye, koma aliyense otaya moyo wake kamba ka neo akau pulumushe. ²⁵ Ko ncabwino tyani kuti munthu wapeza ziko lonse, notaya moyo wake? ²⁶ Aliyense omvwila nsoni neo na mau bangu, naye Mwana wa Munthu akamumvwile nsoni akayowela mu ulemelelo wake nawa Atata nawa angelo atuba. ²⁷ Koma nulabila kwa mweo zoona, alipo ayakine apanama pano ati akalabe lini imfwa akaliye kuona ufumu wa Mulungu." ²⁸ Papepita masiku eiti Yesu walabila kale mau aba, etola Petulo na Yakobe noluta nao palupili kuyopemphela. ²⁹ Pe enzo pemphela, na cinso cake cecinja, na vovwala vake vetuba ngako. ³⁰ Onani, analume abili enzolabila naye, Mose na Eliya, ³¹ beonekela mu ulemelelo, benzolabila za Yeve mwati akalutile, ulwendo wenzoyenela kuusilizyila muyelusalemu. ³² Lomba Petulo na bala benze naye bebeba na tulo, koma pebeuka bwino bwino, beona ulemelelo wake na banthu babili benze bepanama naye. ³³ Pebenzofuma pali Yesu, Petulo emuuzya kuti, "Ambuye, nikwabwino kuti seo tili kuno. lekani tipange misakasa yatatu, umozi wamweo, umozi wa Mose, na umozi wa Eliya." (Enzoziba lini cenzolabila.) ³⁴ Penzolabila izi, mtambo wewela nakubazungulila, becita mantha pebeloba mumtambo. ³⁵ Mwefuma lizu mumtambo, kuti, "uyu mi mwana wangu, wamene ali osankhiwa; mumvwileni." ³⁶ Mau peyelabila, Yesu epezeka ali yeka. Benkhala duu osauzyako aliyense mmaziku yala za ici cibeona. ³⁷ Lomba pasiku yokonkhapo, pebeseluka lupili, gulu ikulu yekumana naye. ³⁸ Onani, mwanalume ekuwa mugulu, kuti, "mphunzisi, nukusengani kulanga pa mwana wangu, ndiye mwana wanili naye. ³⁹ Langani, cibanda cukondo mu lamulila na kuti okuwa mwazizizi, cukondomucitisha khunyu teto kuti ofuma povu kukamwa. cuvuta kuti cimuleke soti cumucita vilonda ngako. ⁴⁰ Nenze nesenga ophunzila banu kuti acipilikishe koma bekangiwa." ⁴¹ Yesu eyankha na kuti, "mweo mbadwe wosakhulupilila na wokhotakhota, ninkhale namwe nthawi itali tyani nakukulekelelani? Mulete mwana wako kuno." ⁴² Penzomuleta mnyamata, cibanda cemponya pansi na kumkunyukisha. Koma Yesu ecikalipila cimzimu ciipa nomupolesha mnyamata, nomuwezya kwa awisi. ⁴³ Bedabwa nao ukulu wa Mulungu. Koma peenze akaludabwa onse pa zonse zeenzocita eve, euzya ophunzila bake kuti, ⁴⁴ "lekani mau aya yalobe mmatu mwanu mofikapo: Mwana wa Munthu akamupeleke mmanja mwa banthu." ⁴⁵ Koma baliyomvwishishe cecilabila. Cenze cobisika kwa beve, kuti basazibe tanthauzo, noyopa bezebeyopa kuti akonshe pa za ici. ⁴⁶ Peuka mkangano pakati pao kuti wati abe mkulu nibani pali beve. ⁴⁷ Koma Yesu, eziba zibenzoganiza mumitima mwao mwao, etola kamwana katontho nokaika pambali pake ⁴⁸ nobauzya kuti, "aliyense olondelela uyu mwana mzina yangu, olondelela neo; naolondelela neo, olondelela wamene enituma. Ndaba aliyense ooneka mtontho pakati panu mweo monse ndiye mkulene." ⁴⁹ Yohane eyankha, "Ambuye, teona munthu muyakine enzopilikisha vibanda mzina yanu lomba seo temulesha, ndaba eve sokukonkhani pamozi na seo." ⁵⁰ "Osamulesha," Yesu elabila, "pakuti aliyense osakangana namweo ali na mweo." ⁵¹ Masiku peyefwendela yakuti yeze atole we kuya kululu, elanga cinso cake ku Yelusalemu. ⁵² Etuma amithenga pasogolo pake, beloba mumunzi wa msamaliya kukonzelatu zonse za eve. ⁵³ Koma banthu bauko kumalo baliyomulondele ndaba enzelangizya cinso cake ku Yelusalemu. ⁵⁴ Pamene ophunzila Yakobe na Yohane pebeona ici, eciti, ⁵⁵ "Ambuye, mufuna kuti tilamulile mulilo kuti uwe kululu nobaononga beve?" ⁵⁶ Koma ecunguluka nobakalipila, bepitilila kuluta kumunzi kuyake. ⁵⁷ Pebenzokuya munjila, muyakine emuuzya kuti, "nikukonkheni kulikonse kwati mulute." ⁵⁸ Yesu eciti kwa eve, "nkhandwe zilinayo milindi, nanyoni zamululu zina visa, koma Mwana wa Munthu aliye na polalika mutu." ⁵⁹ Ecizouzya muyakine kuti, "nikonkhe." Koma eciti, "Ambuye, poyamba lekani nikaikiletu atata." ⁶⁰ Koma emuuzya kuti, "leka bakufwa baike bakufwa bayake. Koma weo, luta mtali mtali nolalikila ufumu wa Mulungu." ⁶¹ Muyakine naye emuuzya kuti, "nikukonkheni, Ambuye, koma poyamba nikalaile kunanda kwangu." ⁶² Yesu emuyankha kuti, "kuliye munthu okatilila gejo nilanga kuvuli ali oyenela mu ufumu wa Mulungu."